Քաղաքապետի ուղերձ
  Ընդհանուր տեղեկություններ
  Կրթություն
  Մշակույթ
  Տուրիզմ և բիզնես
  Առողջապահություն
  Արտաքին կապեր
  Անվանի մարդիկ
  Լուսանկարներ
 
 
Նորություններ
2016-04-18
Լիդա Սերոբյանը՝ միջազգային մրցույթի հաղթող
Մեր համաքաղաքացի՝ Լիդա Սերոբյանը մասնակցելով Թուրքիայի Անթալիա քաղաքում անցկացվող «Future Fashion Faces World-2016» («Աշխարհի ապագա մոդելային դեմքեր-2016») մրցույթին՝ միանգամից հաղթել է երկու անվանակարգերում «Promisingե («Խոստումնալից») և «Personality» («Անհատականություն»): Միջազգային հեղինակավոր մրցույթին Հայաստանից մասնակցել են 23-ամյա Սյուզի Ազարյանը (Երևան), ով մասնակցել է հեռուստանախագծի և բազմաթիվ ցուցադրությունների, և մեր համաքաղաքացի՝ 16-ամյա Լիդա Սերոբյանը (ով ներգրավվել է նորաձևության ցուցադրություններում և մի շարք մրցույթներում: Հայկական մոդելային ասոցիացիայի ղեկավար Գ. Ասատրյանի ներկայացմամբ մրցույթի մասնակիցները եղել են մոդելային ասպարեզում իրենց երկրների առաջին դեմքերից, ինչպես նաև` հայտնի հաղորդավարներ: Ասոցիացիայի հիմնադիրը նաև նշել է, որ Լիդան եղել է մրցույթի ամենաերիտասարդ մասնակիցը: Լիդայից տեղեկացանք, որ հաղթող դառնալուց հետո արդեն հասցրել է մասնակցության հրավեր ստանալ այս ամիս Թբիլիսիում և Քութայիսում զուգահեռաբար անցկացվելիք «Miss Galaxy-2016» միջազգային մրցույթի տնօրենից: Նշենք, որ «Future Fashion Faces World-2016»-ին մասնակից երկրների թվում են Ֆրանսիան, Ալբանիան, Բուլղարիան, Պորտուգալիան, Կոսովոն, Նամիբիան, Անգոլան, Թուրքիան, Վրաստանը, Հունաստանը, Մակեդոնիան, Լատվիան, Լիտվան, Ալժիրը, Շրի Լանկան և այլն:

2016-03-27
Ցուցահանդես- վաճառք «Հին Դիլիջան» համալիրում
ԻԴԵԱ հիմնադրամի և Դիլիջանի համայնքային կենտրոնի նախաձեռնությամբ մարտի 27-ին «Հին Դիլիջան» պատմամշակութային համալիրում կազմակերպվեց կիրառական արվեստի ստեղծագործությունների ցուցահանդես- վաճառք: Միջոցառումը նվիրված էր Սուրբ Զատկի տոնին:Ցուցահանդեսում իրենց ստեղծագործություններն էին ներկայացրել քաղաքի մանկական գեղարվեստի դպրոցի «Հույսի Կամուրջ» հասարակական կազմակերպության սաները, անհատ ստեղծագործողներ: Տոնի խորհրդի վերբերյալ իր հոգևոր խոսքը հնչեցրեց Դիլիջանի հոգևոր հովիվ Տեր Շավարշ քահանա Սիմոնյանը: Միջոցառմանը ողջույնի խոսքով հնդես եկան և ստեղծագործող հեղինակներին իրենց երախտագիտությունն արտահայտեցին Դիլիջանի համայնքապետարանի ներկայացուցիչ Ալբերտ Սիմոնյանը և Դիլիջանի համայնքային կենտրոնի ծրագրերի տնօրեն Ռուբինա Տեր Մարտիրոսյանը: Միջոցառմանը գեղեցիկ ասմունքով , ժողովրդական երգ ու պարի կատարումներով հանդես եկան Դիլիջանի արվեստի քոլեջի համույթը, քաղաքի հանրակրթական դպրոցների, քաղաքապետարանի երաժշտական դպրոցի սաները, համայնքային կենտրոնի երգի-պարի խմբերը: Ցուցահանդեսին ներկա էին Դիլիջանի փոխքաղաքապետ Արմեն Մակարյանը, քաղաքի կրթամշակութային հաստատությունների ներկայացուցիչներ և արվեստագետներ:

2016-02-16
2016թ. փետրվարի 14-ին կայացած ՏԻՄ ընտրությունների մասին
Փետրվարի 14-ին Դիլիջանում կայացան համայնքի ղեկավարի և ավագանու ընտրություններ: Համայնքների խոշորացման ծրագրի արդյունքում Դիլիջան համայնքի մաս են կազմում Դիլիջան քաղաքը և հարակից 6 գյուղեր՝ Հաղարծինը, Գոշը, Թեղուտը, Աղավնավանքը, Խաչարձանը եւ Հովքը: Դիլիջան համայնքի ղեկավարի թեկնածուներ Ժորա Սահաբալյանի օգտին քվեարկել են 4353՝, Արմեն Սանթրոսյանի օգտին՝ 6797 ընտրողներ:

Դիլիջանի ավագանու 32 թեկնածուներից ամենաշատ քվե՝ 814, ստացել է Սուրեն Մելիքյանը: Նրանից բացի, Դիլիջանի ավագանու անդամ են ընտրվել Ռազմիկ Բալինյանը ( 643 քվե), Դավիթ Սարգսյանը( 586), Վարդան Էդիկի Մնացականյանը( 521), Տիգրան Ստեփանյանը (500), Վարդան Հախվերդյանը ( 499), Գառնիկ Դավթյանը (489 ), Արթուր Թամրազյանը ( 471), Արգամ Թամրազյանը ( 463 ), Սուրեն Գրիգորյանը (453), Սամվել Դավթյանը (452), Վարդան Վոլոդյայի Մնացականյանը (415), Սահակ Մկրտումյանը(409), Վարդան Մուկուչյանը (395), Գևորգ Սողոմոնյանը ( 377):

2016-02-05
Տավուշի մարզի Դիլիջան համայնքի տեղական ինքնակառավարման ընտրությունների համար առաջադրված թեկնածուներ
2016թ. փետրվարի 14-ի Տավուշի մարզի Դիլիջան համայնքի տեղական ինքնակառավարման ընտրությունների համար առաջադրված թեկնածուներն են՝

համայնքի ղեկավարի թեկնածուներ՝

Ժորա Սահաբալյան

Արմեն Սանթրոսյան

համայնքի ավագանու թեկնածուներ՝

Ալիխանյան Արարատ Յուրիկի

Աղաջանյան Վրեժ Շամիրի

Ասատրյան Հմայակ Ալբերտի

Ավագյան Լևոն Եղիշեի

Բալինյան Ռազմիկ Ռուսլանի

Բուդաղյան Լյովա Ռուդիկի

Գրիգորյան Սուրեն Հրանտի

Դավթյան Գառնիկ Ռազմիկի

Դավթյան Հովհաննես Արթուրի

Դավթյան Սամվել Արծրունի

Թաիրյան Համլետ Սերգեյի

Թամամյան Գոհար Արամայիսի

Թամրազյան Արգամ Լյովայի

Թամրազյան Արթուր Մերուժանի

Հախվերդյան Վարդան Վոլոդյայի

Հակոբյան Արմեն Ռաֆիկի

Հարոյան Ալբերտ Սամվելի

Հարությունյան Էդգար Տիգրանի

Հովհաննիսյան Արմեն Շվերնիկի

Մաթևոսյան Վարդան Շահենի

Մարտիրոսյան Սիմոն Հրաչիկի

Մելիքյան Սուրեն Աշոտի

Մկրտումյան Սահակ Սերգեյի

Մնացականյան Վարդան Էդիկի

Մնացականյան Վարդան Վոլոդյայի

Մուկուչյան Վարդան Ալյանսի

Ներսիսյան Արկադի Արտեմի

Սահակյան Սարգիս Օնիկի

Սահակյան Վարդան Հայկի

Սարգսյան Դավիթ Մարտունի

Սողոմոնյան Գևորգ Հովիկի

Ստեփանյան Տիգրան Հրահատի




2015-11-20
Հանդիպումներ դպրոցականների ծնողների հետ
Նոյեմբերի 18-ին և 19-ին քաղաքապետ Արմեն Սանթրոսյանը քաղաքի ավագ, թթ.2,4, և Վ. Անանյանի անվան դպրոցներում հանդիպումներ ունեցավ դպրոցականների ծնողների և մանկավարժների հետ: Հանդիպումների նպատակն էր ծնողների և մանկավարժների հետ քննարկել քաղաքապետարանի կողմից անապահով ընտանիքների երեխաների կարիքների համար կատարվող հատկացումներին առնչվող հարցերը: Հանդիպումները նպատակ ուներ նաև ծնողներին իրազեկել քաղաքապետարանի կողմից իրականացվող սոցիալական ծրագրերին, ծանոթանալ նրանց հուզող հարցերին: Հանդիպումների ընթացքում նշվեց, որ քաղաքապետարանը առաջնային նշանակություն է տալիս երեխաների կարիքներին, ժամանակին հոգում է անապահով ընտանիքների երեխաների դասագրքերի ծախսերը, վճարում է «Հույսի Կամուրջ» կազմակերպության ողջ տարվա կոմունալ ծախսերը, բացի դրանից հոգում է կազմակերպության մեջ ընդգրկված և շարժողական խնդիրներ ունեցող 22 երեխաների և նրանց ուղեկցողների տրանսպորտային ծախսերը: Նշվեց նաև քաղաքապետարանի կողմից նորածինների մայրերին տրվող օգնության մասին, որը յուրաքանչյուր տարի կազմում է շուրջ 4 մլն դրամ:
Քաղաքապետարանի ուշադրության կենտրոնում են նաև Հայրենական մեծ պատերազմի վետերանները: Հաղթանակի օրվա և այլ տոնական միջոցառումների առիթներով՝ վետերաններին տրվող դրամական օգնությունից բացի, 2016թ. բյուջեի նախագծով նախատեսված է նրանց համար սահմանել ամենամսյա վճար:
Անդրադարձ եղավ նաև բնակիչների սոցիալ-տնտեսական վիճակի բարելավմանն ուղղված միջոցառումների մասին, այդ թվում բազմաբնակարան շենքերի շքամուտքերի, տանիքների, վերելակների վերանորոգման, ջրամատակարարման , աղբահանության, առանձին հատվածներում ճանապարհների վերանորոգման, տրանսպորտային ծառայության և այլ հարցերի:
Նշվեց, որ քաղաքի 110 բազմաբնակարան շենքերից 81-ում ՝ Կաղնի խաչ թաղամասում, Շահումյան, Մյասնիկյան, Կալինինի և Գետափնյա փողոցներում շքամուտքերի վերանորոգման աշխատանքներն ավարտվել են, իսկ գարնանից կսկսվեն Թախտայի և Շամախյանի թվով 29 բազմաբնակարան շենքերի շքամուտքերի վերանորոգման աշխատանքները:
Կատարվելու են նաև տանիքների մասնակի վերանորոգման աշխատանքներ:
Ծնողները իրենց գոհունակությունը հայտնեցին ինչպես երեխաներին ցուցաբերվող ամենօրյա հոգատարության համար, այնպես էլ բնակիչների սոցիալ- տնտեսական խնդիրների լուծմանն ուղղված քաղաքապետարանի կատարած աշխատանքների համար:
Առաջարկություն եղավ նաև քաղաքապետարանի կողմից միջնորդել ՀՀ ոստիկանության ճանապարհային ստորաբաժանումների պատասխանատուներին՝ թիվ 2 դպրոցի կանգառում տեղադրել արագաչափ և ավելի մեծացնել ուշադրությունը մանկական հիմնարկների հատվածներում վարորդների կողմից անվտանգ երթևեկության կանոնների պահպանմանը:
Արծարծվեցին նաև աշխատանքի տեղավորման, բազմանդամ ընտանիքներին բնակարանային պայմանների բարելավման աջակցման, սոցիալական բնակարանաշինության և այլ խնդիրներին առնչվող հարցադրումներ, որոնց մասին տրվեցին պարզաբանումներ, իսկ քաղաքապետարանի աշխատակազմին հանձնարարվեց կարճ ժամանակահատվածում ուսումնասիրել բարձրացված հարցերը և առաջարկություններ ներկայացնել դրանց լուծման վերաբերյալ:

2015-10-30
Դիլիջանը կունենա նոր եկեղեցի
Հոկտեմբերի 30-ին Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի հանդիսապետությամբ Դիլիջանի հուշարձանային համալիրին հարող տարածքում կայացավ կառուցվելիք նոր եկեղեցու տարածքի օծման արարողությունը:
Արարողությանը մասնակցում էին Տավուշի մարզպետ Հովիկ Աբովյանը, ՀՀ ԱԺ պատգամավոր Հակոբ Հակոբյանը, Տավուշի հոգևոր թեմի առաջնորդ Բագրատ եպիսկոպոս Գալստանյանը, «Հայաստանի զարգացման նախաձեռնություններ»(IDeA) հիմնադրամի հիմնադիր, Ռուսաստանի հայտնի գործարար, բարերար Ռուբեն Վարդանյանը,նրա գործընկերները՝ բարերարներ Գագիկ Ադիբեկյանը, Մաքսիմ Աթայանցը և Արմեն Կարապետյանը:
Արարողությանը ողջույնի խոսքով հանդես եկավ Դիլիջանի քաղաքապետ Արմեն Սանթրոսյանը: Իր երախտագիտությունը հայտնելով Նորին Սրբությանը և բարերարներին, նա հույս հայտնեց, որ ընդամենը մի քանի տարի հետո դիլիջանյան այդ գողտրիկ անկյունում կհառնի դիլիջանցիների վաղուց փափագած վեհաշուք եկեղեցին՝ իր շուրջը համախմբելով իր բարեպաշտ զավակներին:
Ներկաներին իրադարձության առթիվ ողջունեց նաև Դիլիջանի զարգացման հիմնադրամի տնօրեն Արթուր Հակոբյանը, կարևորելով քաղաքի հետ փոխգործակցության ծրագրերը և սպասվող լուրջ ակընկալիքները:
Այնուհետև կատարվեց օրհնության կարգ: Հանդիսավոր ծիսական կարգով Վեհափառ Հայրապետը օրհնեց տարածքը և բարի աղօթքով հաջող ընթացք մաղթեց եկեղեցու կառուցման գործին:
Վեհափառ Հայրապետը իր գնահատանքի խոսքն ուղղեց բարերարներին այդ ազնիվ, աստվածահաճո ձեռնարկմանը աջակցելու համար, նաև Տավուշի մարզի և Դիլիջան քաղաքի իշխանություններին եկեղեցու կառուցման նախաձեռնության ջանքերին ակտիվորեն աջակցելու և ըստ ամենայնի նպաստելու համար:
Արարողությունը եզրափակվեց մանկական հոգևոր երգչախմբի և Հ. Շարամբեյանի անվան գեղարվեստի դպրոցի պարի խմբի սաների գեղեցիկ կատարումներով:

2015-10-20
Հայտարարություն
Հարգելի դիլիջանցիներ, հյուրեր.
Սիրով հրավիրում ենք բոլորիդ մասնակցելու Դիլիջանի եկեղեցու հողօրհնեքի արարողությանը, որը կկայանա Ամենայն Հայոց Կաթողիկոս Գարեգին 2-ի հանդիսապետությամբ՝ հոկտեմբերի 30-ին ժամը 10:30-ին, Երկրորդ աշխարհամարտում զոհված դիլիջանցիների հիշատակին նվիրված հուշահամալիրին հարող տարածքում:
Դիլիջանի քաղաքապետարան

2015-10-18
Զբոսաշրջային փոխգործակցության նոր հորիզոններ
Հոկտեմբերի 17-ին Դիլիջանի քաղաքապետ Արմեն Սանթրոսյանն ընդունեց Չեխիայի Հանրապետության Կրալովեգրադսկի երկրամասի Տրոտնով քաղաքի քաղաքապետ Իվան Ադամեքին: Տրուտնովի քաղաքապետի այցի նպատակը Դիլիջանի զբոսաշրջային ռեսուրսների ուսումնասիրումն էր և երկու քաղաքների միջև մշակութային և զբոսաշրջային փոխգործակցության հուշագրի նախապատրաստումը:
Զրույցի ընթացքում համառոտակի ներկայացրեցին քաղաքների բնութագրերը, հանգամանալից քննարկեցին համագործության առավել արդյունավետ ուղիները:
Բարձրաստիճան հյուրը ոչ միայն հիացած էր Դիլիջանի անկրկնելի բնությամբ, այլև մեծապես հետաքրքրվում էր Դիլիջանի նոր իրողություններով, այստեղ իրականացվող խոշորամասշտաբ ծրագրերով:
Նրանք կարևորեցին նաև այն հանգամանքը, որ փոխգործակցությանը կարող է մեծապես նպաստել Տավուշի մարզի և Կրալովեգրադսկի երկրամասի միջև արդեն իսկ գոյություն ունեցող մշակութային և զբոսաշրջային կապերը:
Դիլիջանի քաղաքապետ Արմեն Սանթրոսյանը սիրով ընդունեց չեխ գործընկերոջ հրավերը՝ դեկտեմբերին այցելել Տրոտնով:
Ընդունելությանը մասնակցում էին քաղաքապետարանի աշխատակիցներ և լրատվամիջոցների ներկայացուցիչներ:
Չեխիայի Հանրապետության Կրալովեգրադսկի երկրամասի Տրոտնով քաղաքը գտնվում է Կրկոնոշե լեռնազանգվածի ստորոտում՝Ուպե գետի հովտում:
Քաղաքն ունի 31 հազար բնակիչ:
Քաղաքի արդյունաբերության գլխավոր ճյուղը տեքստիլ արտադրությունն է:
Քաղաքի ինդրուստրիալիզացիան սկսվել է 19-րդ դարի սկզբին:
Ունի գեղեցիկ ճարտարապետություն և տեսարժան վայրեր:
Քաղաքը մոտ է գտնվում նշանավոր կուրորտ Յանսկե Լազնեին:

2015-10-15
Խորհուրդների փողոցը՝ նոր տեսքով
ՀՀ Կենտրոնական բանկի աջակցության և հովանավորության շնորհիվ վերակառուցվեց և նոր տեսք ստացավ մեր քաղաքի ևս մի կարևոր հատված: Ավարտվեց խորհուդների փողոցի՝ երկրագիտական թանգարանից նորակառույց հանգստյան տունն ընկած շուրջ 5000քմ մակերեսով ճանապարհի վերակառուցումը: Շինարարական աշխատանքները իրականացրել է «Մեծն Էրիկ» ընկերությունը: Շինարարական աշխատանքներին զուգահեռ նորացվել են ամբողջ ճանապարհահատվածի կոմունիկացիաները: Ողջ ճանապարհի երկարությամբ կառուցվել են հենապատեր, որոնք եզերվում են գեղեցիկ մետաղյա ցանկապատերով: Շինարարության մեջ ներառված էր և արդեն ավարտին մոտ է թաղամասի վերևի հատվածից Մյասնիկյան փողոց հասնող հետիոտն ճանապարհի հիմնանորոգումը (երկարությունը՝մոտ 80 գծամետր): Ավարտված են նոր աստիճանների տեղադրման և բետոնապատման աշխատանքները:
Քաղաքապետարանը իր երախտագիտությունն արտահայտելով ՀՀ Կենտրոնական բանկի ղեկավարությանը, նաև իր գնահատանքի խոսքն է ուղղում թաղամասի գլխավոր ճանապարհահատվածի հարևանությամբ բնակվող մեր համաքաղաքացիներին, նրանց ցուցաբերած ըմբռնումով մոտեցման և ծրագրի իրականացմանը նպաստելու համար:

2015-10-10
Մեկնարկեց Դիլիջանի միջազգային ակադեմիական ֆորումը
Հոկտեմբերի 10-ին Դիլիջանի երկրագիտական թանգարանում մեկնարկեց Եվրոպական Երիտասարդական Պառլամենտ Հայաստանի կողմից կազմակերպվող Դիլիջանի միջազգային ակադեմիական ֆորումը։ Ֆորումը իր ձևաչափով բացառիկ է, քանի որ 7 օրյա ծրագրի շրջանակներում Եվրոպայի շուրջ 30 երկրներից ժամանած շուրջ 120 մասնակիցներ համապատասխան կոմիտեներում քննարկելու են մերօրյա արդի հիմնախնդիրները՝ հանդես գալով նորարական գաղափարներով և հետաքրքիր լուծումներով:
Ֆորումի բացման պաշտոնական արարողությանը մասնակիցներին ողջունեցին ֆորումի նախագահ Արմինե Խամոյանը և ԵԵՊ Հայաստանի նախագահ Հովսեփ Պատվականյանը: Ֆորումի բացման պաշտոնական արարողությանը մասնակցում էր և ողջույնի խոսքով հանդես եկավ Դիլիջանի քաղաքապետ Արմեն Սանթրոսյանը: Ելույթ ունեցան նաև ֆորումի կազմակերպիչներից Եվա Կարապետյանը և Մինաս Շահինյանը։
Ծրագրում նախատեսված է, որ մասնակիցներն ամբողջ ընթացքում մնալու են Դիլիջանում։ Ֆորումի մասնակցության համար երիտասարդները նախապես դիմում են ներկայացրել։ Երիտասարդները նշել են նաև երգելու և պարելու ընդունակության մասին։ Ընտրությունը կատարել է 4 հոգանոց ժյուրին։ Միջոցառման ընթացքում ամեն երկիր ներկայացնելու է իր հագուստը, սնունդը և ընդհանրապես այն ամենն, ինչ կապված է մշակույթի հետ։ Միջոցառման ավարտին նրանք վկայականներ կստանան։ Նախաձեռնությունը հովանավորում է Գերմանիայի արտաքին գործերի նախարարությունը։

2015-10-05
Դիլիջանի քաղաքապետ Արմեն Սանթրոսյանի շնորհավորական ուղերձը
Հարգելի մանկավարժներ.
Դիլիջանի քաղաքապետարանի, համայնքի ավագանու և անձամբ իմ կողմից սրտանց շնորհավորում եմ ձեզ Ուսուցչի օրվա առթիվ, մաղթում եմ բոլորիդ անձնական երջանկություն և նորանոր հաջողություններ մատաղ սերնդի կրթության և դաստիարակության վեհ ու շնորհակալ աշխատանքում:
Այս տոնը նաև լավ առիթ է կրկին մեր երախտագիտությունն արտահայտելու մեր քաղաքի հարյուրավոր մանկավարժներին, որոնց հասարակությունը վստահել է իր համար ամենաթանկագինը և արժեքավորը՝ մեր երեխաներին կյանքին նախապատրաստելը, նրանց լավագույն գիտելիքներով զինելն ու Հայրենիքին նվիրվածության ոգով դաստիարակելը:
Մենք վստահ ենք, որ դուք այսօր անելու եք առավելագույնը՝ լիարժեք օգտագործելու Դիլիջանում ստեղծված կրթական ոլորտի լայն հնարավորությունները ի նպաստ մեր երեխաների համակողմանի զարգացման և ժամանակակից տեխնոլոգիաներին տիրապետելուն ուղղված նրանց ստեղծագործական կարողությունների ձեռքբերման:
Համոզված ենք, որ դուք, քաղաքի զարգացման ներկա ակտիվ փուլում ևս ձեր լուրջ նպաստն եք բերելու Դիլիջանում ֆինանսական, կրթական և զբոսաշրջային խոշոր կենտրոնի ձևավորմանն ուղղված գործընթացում:
Կրկին շնորհավորում եմ բոլորիդ, մաղթում լավագույն հաջողություններ:

Դիլիջանի քաղաքապետ՝ Արմեն Սանթրոսյան


2015-10-02
Երգի փառատոն Դիլիջանում
Հայաստանի կոմպոզիտորների միության նախաձեռնությամբ Հայաստանում անցկացվող Երգի փառատոն 2015-ի 2-րդ և 3-րդ փուլերը անցկացվեցին Դիլիջանի Էդվարդ Միրզոյանի անվան կոմպոզիտորների տան Բեթհովենի համերգասրահում:
Փառատոնը նվիրված էր հայ անվանի կոմպոզիտորներ Էդգար Հովհաննիսյանի 85 և Ալեքսանդր Աճեմյանի 90-ամյա հոբելյաններին: Համերգային ծրագրում ընդգրկված էին հայկական ժողովրդական և էստրադային երգեր, որոնց կատարումներով հանդես եկան Երևանի Կոմիտասի անվան պետական կոնսերվատորիայի ժողովրդական նվագարանների ֆակուլտետի սաներ (գեղարվեստական ղեկավար՝ ՀՀ պետական մրցանակի դափնեկիր, ՀՀ արվեստի վաստակավոր գործիչ, պրոֆեսոր Արզաս Ոսկանյան) և Հայաստանի էստրադային նվագախումբը, (գեղարվեստական ղեկավար՝ ՀՀ ժողովրդական արտիստ Երվանդ Երզնկյան):
Փառատոնին ներկա էր և ելույթով հանդես եկավ Հայաստանի կոմպոզիտորների միության նախագահ, կոմպոզիտոր Արամ Սաթյանը:

2015-09-30
Ձևավորվել է քաղաքաշինական և ներդրումների խրախուսման խորհուրդ
«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՎՈՒՇԻ ՄԱՐԶԻ ԴԻԼԻՋԱՆ ՔԱՂԱՔԱՅԻՆ ՀԱՄԱՅՆՔԻ ԵՎ ՀԱՐԱԿԻՑ ՏԱՐԱԾՔՆԵՐԻ ԶԱՐԳԱՑՄԱՆ ԵՎ ՆԵՐԴՐՈՒՄՆԵՐԻ ԽՐԱԽՈՒՍՄԱՆ ՄԱՍԻՆ» օրենքի պահանջներին համապատասխան, Դիլիջանի համայնքի ավագանու սեպտեմբերի 28-ի նիստում կայացված որոշմամբ՝ ձևավորվեց հասարակական հիմունքներով մշտապես գործող՝ ՔԱՂԱՔԱՇԻՆԱԿԱՆ ԵՎ ՆԵՐԴՐՈՒՄՆԵՐԻ ԽՐԱԽՈՒՍՄԱՆ խորհուրդ: Խորհրդի կազմը բաղկացած է 9 անդամներից, որոնցից 5-ը Դիլիջանում ներդրումային ծրագիր իրականացրած անձանց լիազոր ներկայացուցիչներն են, 1-ը՝ ավագանու անդամ, 3-ը՝ քաղաքաշինական բնագավառում 5 տարուց ավելի փորձառություն ունեցող քաղաքի բնակիչներ:
Խորհրդի ստեղծման նպատակը, ըստ օրենքի 3-րդ գլխի 7-րդ կետի՝ Դիլիջան քաղաքի գլխավոր հատակագծի, գոտիավորման, համայնքի քաղաքաշինական կանոնադրության, ճարտարապետական լուծումների, քաղաքաշինական նախագծերի, համայնքի սեփականությունը հանդիսացող հողամասի օտարման, վարձակալության, կառուցապատման, օգտագործման իրավունքով այլ ֆիզիկական և իրավաբանական անձանց տրամադրման, առաջարկվող ծրագրերի վերաբերյալ մասնագիտական եզրակացության տրամադրումն է, ինչպես նաև Հայաստանի Հանրապետության օրենսդրությամբ սահմանված քաղաք Դիլիջանում քաղաքաշինական գործունեության նորմատիվ իրավական ակտերով սահմանված պայմանների և պահանջների իրականացման նկատմամբ ուսումնասիրություն իրականացնելը:

2015-09-25
Նախագահը ներկա է գտնվել Դիլիջանի կենտրոնական դպրոցի բացմանը
Նախագահ Սերժ Սարգսյանը սեպտեմբերի 24-ին ներկա է գտնվել Դիլիջանի կենտրոնական դպրոցի բացման արարողությանը, որը ոչ միայն կրթական համակարգում, այլ նաև Դիլիջանի համայնքային զարգացման գործում ևս մեկ կարևոր ներդրում է:
Նախագահը շրջայց է կատարել նորաբաց ուսումնական հաստատությունում, ծանոթացել պայմաններին, ուսումնական ծրագրերին ու երեխաների բազմակողմանի զարգացումն ապահովելու նպատակով մշակված դասավանդման մեթոդաբանությանը: Բացման արարողությանը մասնակցում էին Տավուշի մարզպետ Հովիկ Աբովյանը, ՀՀ կրթության և գիտության նախարար Արմեն Աշոտյանը, ՀՀ կենտրոնական բանկի նախագահ Արթուր Ջավադյանը, Դիլիջանի քաղաքապետ Արմեն Սանթրոսյանը, Տավուշի թեմի առաջնորդ տեր Բագրատ եպիսկոպոս Գալստանյանը և այլ պաշտոնատար անձինք:
Բացման արարողությանը նախորդած մամուլի ասուլիսում ՀՀ կրթության և գիտության նախարար Արմեն Աշոտյանը, «Այբ» կրթական հիմնադրամի համահիմնադիր և «Այբ կրթական հանգույց» հիմնադրամի հոգաբարձուների խորհրդի նախագահ տեր Մեսրոպ քահանա Արամյանը, «Այբ» կրթահամալիրի գործադիր տնօրեն Դավիթ Սահակյանը պատասխանեցին լրագրողների հարցերին, որոնք հիմնականում վերաբերում էին Դիլիջանի կենտրոնական դպրոցի հեռանկարին, «Այբ» կրթահամալիրի՝ հանրապետության կրթական համակարգում ունեցած դերին և այլ հարցերի:
Դիլիջանի կենտրոնական դպրոցը ստեղծվել է 2013 թվականին, «Այբ» կրթական հիմնադրամի կողմից` ՀՀ կենտրոնական բանկի հետ համագործակցության արդյունքում: Այն հիմնական դպրոց է՝ նախատեսված 1-9-րդ դասարանի մինչև 160 աշակերտի համար:
ՀՀ կրթական համակարգ Դիլիջանի կենտրոնական դպրոցի մուտքով ստեղծվել է դպրոցի քաղաքային մոդել՝ հասանելի ոչ միայն ՀՀ ԿԲ աշխատակիցների, այլև Դիլիջանում բնակվող այլ ընտանիքների երեխաների համար:
Պատասխանատուների հավաստմամբ, իր գաղափարախոսությամբ և տեսլականով, ուսումնական ծրագրով, դասավանդման մեթոդաբանությամբ ու մոտեցումներով, ուսուցիչների և աշակերտների ընդունելության քաղաքականությամբ դպրոցն ամբողջությամբ սինխրոնացված է Երևանի «Այբ» տարրական և միջին դպրոցների հետ: «Այբ» կրթական հիմնադրամը պատասխանատու է դպրոցի կառավարման և «Այբ»-ի չափանիշներին համապատասխան ուսումնական բովանդակության վերահսկողության համար:
Դպրոցի շենքի կառուցումը և գործունեությունն ամբողջությամբ ֆինանսավորվում է ՀՀ ԿԲ կողմից:
Դիլիջանի կենտրոնական դպրոցի տարածքում է տեղակայված նաև Մասաչուսեթսի տեխնոլոգիական ինստիտուտի հետ համագործակցության արդյունքում ստեղծված ֆաբլաբը՝ գիտարդյունաբերական լաբորատորիան, որը ծառայելու է ինչպես դպրոցի աշակերտներին, այնպես էլ Դիլիջանի և հարակից քաղաքների աշակերտներին, ուսանողներին և ստեղծագործողներին:
Շրջայցի ժամանակ Նախագահ Սերժ Սարգսյանին տեղեկացրել են, որ ներկայումս դպրոցում սովորող 119 աշակերտների ավելի քան 80%-ը և դպրոցի աշխատակիցների 24%-ը Դիլիջան քաղաքից են, իսկ 22%-ը Երևանից Դիլիջան է տեղափոխվել ընտանիքով, աշխատակիցների 13%-ը Հայաստանի այլ մարզերից է, մնացած աշխատակիցները համատեղում են աշխատանքը Երևանում և Դիլիջանում:

2015-09-24
giz Գերմանիայի Դաշնային Հանրապետության տնտեսական համագործակցության կազմակերպության ներկայացուցիչների այցը
Սեպտեմբերի 24-ին Դիլիջանի քաղաքապետարան այցելեց գերմանական giz Գերմանիայի Դաշնային Հանրապետության տնտեսական համագործակցության կազմակերպության պատվիրակությունը: Պատվիրակության կազմում էին Գերմանիայի Դաշնային Հանրապետության տնտեսական համագործակցության և զարգացման նախարարության ներկայացուցիչներ պարոն Դիրկ Շատշնայդերը և պարոն Կլաուս Տանցբերգերը, Թբիլիսիում Գերմանիայի Դաշնային Հանրապետության դեսպանության ներկայացուցիչ Աննա Կատարինա Դերկորը, ԳՄՀԸ հայաստանյան գրասենյակի ղեկավար Աննե Քեմփան, ԳՄՀԸ «Համայնքների զարգացում Հարավային Կովկասում» ծրագրի հայաստանյան թիմի ղեկավար Քաթրին Շեֆերը:
Հիշեցնենք, որ 2009թ. giz տնտեսական համագործակցության ծրագրի, Դիլիջանի քաղաքապետարանի և «Տեղեկատվական համակարգերի զարգացման և վերապատրաստման կենտրոն» հկ-ի հետ համատեղ ներդրվեց քաղաքացիների սպասարկման գրասենյակը և ներկա այցի նպատակն էր տեղում ծանոթանալ գրասենյակի աշխատանքներին, քաղաքացիների սպասարկման ոլորտում կատարված փոփոխություններին: Գրասենյակի աշխատանքների մասին հյուրերին ներկայացրեց քաղաքապետարանի աշխատակազմի գլխավոր մասնագետ Լամարա Մանթաշյանը: Քաղաքապետ Արմեն Սանթրոսյանը բարձր գնահատանքի արժանացրեց ՔՍԳ գործունեությունը, շեշտելով, որ բավականին դյուրացնում է ՏԻՄ և քաղաքացի շփումը, հնարավորություն է տալիս քաղաքաի ազգաբնակչությանը ավելի արագ ստանալ անհրաժեշտ տեղեկատվություն, բարելավվում է սպասարկումը, խնայվում ժամանակը: Հյուրերին հետաքրքրող տարբեր հարցերին պարզաբանումներ տրվեցին փոխքաղաքապետ Արմեն Մակարյանի, ֆինանսական բաժնի պետ Գոհար Դավթյանի և մյուս պատասխանատու աշխատակիցների կողմից:

2015-09-24
Դիլիջան համայնքի ավագանու օգոստոսի 28-ի նիստում հաստատվել է համայնքում բաց լսումների և քննարկումների կազմակերպման և անցկացման կարգը:
Ընդունված փաստաթղթով կարգավորվում են տեղական ինքնակառավարմանն առնչվող օրենսդրական և ենթաօրենսդրական կարևորագույն նախաձեռնությունների և նախագծերի, մասնավորապես համայնքի զարգացման ծրագրերի և տարեկան բյուջեի, համայնքի կողմից մատուցվող հանրային ոլորտներում համայնքի ավագանու և ղեկավարի որոշումների, համայնքի գլխավոր հատակագծի, քաղաքաշինական, բնապահպանական կենսագործության միջավայրի ծրագրվող փոփոխությունների հանրային բաց լսումների և քննարկումների կազմակերպման և անցկացման հետ կապված իրավահարաբերությունները:
Նույն նիստում ավագանին հաստատել է «Համայնքի ղեկավարին կից խորհրդակցական մարմինների ձևավորման և գործունեության» կարգը:
Ակնկալվում է, որ ընդունված որոշումները մեծապես նպաստելու են համայնքի խնդիրների որոշման և լուծման գործում բնակչության լայն ներգրավվածությանը, նպաստելու է համայնքի բնակչության, քաղաքացիական հասարակության, մասնավոր հատված և համայնքում քաղաքականություն մշակող և որոշում ընդունող տեղական ինքնակառավարման մարմինների միջև փոխադարձ կապի և համագործակցության ապահովմանը:
Համոզված ենք, որ համատեղ աշխատանքի շնորհիվ կարող ենք ավելի ռացիոնալ ձևով որոշել քաղաքում իրականացվելիք աշխատանքների առաջնայնությունները և առավել հստակեցնելու դրանց լուծման ուղիները:
Նշված կարգերի հետ կարելի է ծանոթանալ հետևյալ հղումներով`
http://www.dilijancity.am/Pages/DocFlow/Default.aspx?a=v&g=c839583b-7722-4e66-a816-9a372b810190

http://www.dilijancity.am/Pages/DocFlow/Default.aspx?a=v&g=e8cdf119-3f75-4900-b94c-926983e8f59f


http://www.dilijancity.am/Pages/DocFlow/Default.aspx?a=v&g=62c3d6c9-f469-4851-a897-91a85aaac97b

2015-09-01
Դիլիջանի քաղաքապետ Արմեն Սանթրոսյանի շնորհավորական ուղերձը Գիտելիքի օրվա առթիվ
Սիրելի դպրոցականներ, հարգելի ուսուցիչներ, ծնողներ.
Սրտանց շնորհավորում եմ բոլորիդ Գիտելիքի օրվա առթիվ, մաղթելով անձնական երջանկություն: Այս հիշարժան օրը առանձանհատուկ ուզում եմ շնորհավորել մեր առաջին դասրանցիներին, որոնք սրտի թրթիռով են սպասում առաջին զանգին:
Մենք առանձնակի ուրախությամբ և հպարտությամբ ենք նշում այս տոնը, որովհետև ներկայացնում ենք մի քաղաք, որը հավակնում է դառնալու աշխարհի խոշոր կրթական կենտրոններից մեկը:
2014թ-ից գործում է Դիլիջանի միջազգային դպրոցը, որտեղ ներկայումս ամենաբարձրակարգ չափանիշներով կրթություն են ստանում աշխարհի 63 երկրներից ժամանած 190 սովորողներ:
Ուսման և կրթության լավագույն պայմաններով և ժամանակակից մեթոդներով է աշխատում հանրապետությունում եզակիներից համարվող Կենտրոնական դպրոցը:
Քաղաքի կրթամշակութային ոլորտի զարգացման գործում լուրջ դերակատարում ունի ՀՀ Կենտրոնական բանկի՝ «Գիտելիք հանուն զարգացման» կենտրոնը: Այն իր ակտիվ գործունեությամբ լավագույնս նպաստում է Դիլիջանի տարածաշրջանի պատանիների և երիտասարդության ստեղծագործական կարողությունների զարգացմանը:
Գնալով ավելի են սերտանում կապերը քաղաքի դպրոցների և նոր կրթական հաստատությունների միջև, ավանդույթ է դարձել համատեղ միջոցառումների կազմակերպումը և հանուն մեր մատաղ սերնդի որակյալ կրթության և հայեցի դաստիարակության ջանքերի համատեղումը:
Դիլիջանում գործող կրթական կենտրոնները մեծապես նպաստում են քաղաքի և քաղաքամերձ գյուղական համայնքների միջև կապերի ավելի սերտացմանը: Քաղաքամերձ համայնքների դպրոցականները լայնորեն ներգրավվում են Դիլիջանի կրթական կենտրոններում, ակտիվորեն մասնակցում քաղաքում կազմակերպվող դպրոցական և համաքաղաքային միջոցառումներին:
Այս հիշարժան օրը մեր դպրոցականներին մաղթում եմ ուսման սեր, հայ դպրության արժեքների բարձր գիտակցում, մեր դարաշրջանի մարտահրավերներին դիմակայելու ամուր կամք և հաստատակամություն:
Համոզված եմ, որ Դուք արժանիորեն պահպանելու ու հարստացնելու եք մեր հայրերի ու պապերի ստեղծած բարի ավանդույթները և Ձեր նպաստն եք բերելու մեր քաղաքի հետագա շենացման գործում:
Կրկին շնորհավորում եմ բոլորիդ ՝ լավագույն մաղթանքներով:

2015-08-30
«Մշակութային վերածնունդ» փառատոնն անցկացվեց Դիլիջանում
Օգոստոսի 29-ին, Դիլիջանում՝ կոմպոզիտորների տան Բեթհովենի անվան համերգասրահում անցկացվեց «Մշակութային վերածնունդ» ավանդական փառատոնը: Այստեղ ներկայացված էին դեկորատիվ և կիրառական արվեստի նմուշներ Հայաստանի բոլոր մարզերից և Արցախից:
«Զբոսաշրջությունը մշակույթներ է միավորում» կարգախոսի ներքո անցկացված միջոցառման շրջանակում հուշանվերների, գորգերի, նկարների, գոբելենի, ազգային տարազով տիկնիկների, հայ կանանց խոհանոցային գլուխգործոցների ցուցահանդես-վաճառք անցկացվեց: Հյուրերը վայելեցին համերգային ծրագիրն ու մասնակցեցին դեկորատիվ-կիրառական արվեստի վարպետության դասերին:
«Մշակութային վերածնունդ» փառատոնը Դիլիջանում արդեն երրորդ անգամ է անցկացվում:
Ինչպես թղթակիցների հետ զրույցում նշեց էկոնոմիկայի նախարարության զբոսաշրջության բաժնի պետ Մեխակ Ապրեսյանը, նմանատիպ միջոցառումները կազմակերպվում են հիմնականում երկրի մարզերում, ինչն ուղղված է տեղական համայնքներում զբոսաշրջության զարգացմանը:
Նրա խոսքով՝ փառատոնները նպաստում են պետական քաղաքականության մի շարք հարցերի լուծմանը, այդ հարցերից են` Հայաստանի համայնքներում զբոսաշրջության զարգացումը, մարզերի տնտեսական ակտիվության բարձրացումը, դրանց ներկայացված լինելն արտաքին և ներքին շուկայում, ինչպես նաև զբոսաշրջության ինդուստրիայի դիվերսիֆիկացումը:
Փառատոնը կազմակերպվել էր Էկոնոմիկայի նախարարության, Տարածքային կառավարման և արտակարգ իրավիճակների նախարարության, Դիլիջանի քաղաքապետարանի և Հայաստանի զարգացման հիմնադրամի օժանդակությամբ:
Միջոցառմանը մասնակցեցին Հայաստանի և Արցախի նախարարությունների, միջազգային և հասարակական կազմակերպությունների ներկայացուցիչները: Փառատոնին ներկա էին Դիլիջանի քաղաքապետ Արմեն Սանթրոսյանը, Հայաստանի կոմպոզիտորների միո

2015-08-28
ՀՀ մշակույթի նախարարի պաշտոնական այցը Դիլիջան
Օգոստոսի 27-ին պաշտոնական այցով Դիլիջանում էր ՀՀ մշակույթի նախարար Հասմիկ Պողոսյանը:
Նախարարը Տավուշի մարզպետ Հովիկ Աբովյանի և Դիլիջանի քաղաքապետ Արմեն Սանթրոսյանի հետ այցելեց Դիլիջանի երկրագիտական թանգարան- պատկերասրահ, Երևանի ժող ժողարվեստի թանգարանի Դիլիջանի մասնաճյուղ: Եղավ նաև գեղանկարիչ Ղազարոս Ղազարյանի և ժողովրդական վարպետ Աշոտ Բաբայանի արվեստանոցներում: Նախարարի հրամանագրով գեղանկարիչ Ղազարոս Ղազարյանը պարգևատրվել է ՀՀ մշակույթի նախարարության «Գրիգոր Նարեկացի» հուշամեդալով և նախարարության պատվոգրով, որն էլ նախարարի ձեռամբ հանձնվեց շնորհաշատ գեղանկարչին: Նախարարության պատվոգիր հանձնվեց նաև փայտագործ վարպետ Աշոտ Բաբայանին:
Երկրագիտական թանգարան- պատկերասրահում նախարարը դիտելով էքսպոզիցիան, միաժամանակ հետաքրքրվեց թանգարանի խնդիրներից, խոստանալով մեթոդական և մասնագիտական օգնություն ցուցաբերել հարուստ հավաքածուի ըստ արժանավույն ներկայացնելու համար: Դիլիջանի քաղաքապետ Արմեն Սանթրոսյանը նախարարին ներկայացրեց համայնքի միջոցներով թանգարանի հնագիտական բաժնի ձևավորման աշխատանքների ընթացքի և մշակույթի ոլորտի ուղղությամբ իրականացվող աշխատանքների ու ծրագրերի մասին :
Նախարարը մտահոգիչ է համարել Երևանի ժողարվեստի թանգարանի Դիլիջանի մասնաճյուղի շենքի վիճակը, անհրաժեշտ համարելով հիմնավոր վերանորոգման աշխատանքների իրականացումը, միաժամանակ նշելով, որ անհրաժետ են լուրջ ներդրումներ:
Նախարարը երեկոյան մասնակցեց կոմպոզիտորների տան Բեթհովենի անվան համերգասրահում կազմակերպված «Հույսի առագաստ» հեղինակային երգի փառատոնին, որին ներկա էին նաև Դիլիջանի քաղաքապետ Արմեն Սանթրոսյանը և Հայաստանի կոմպոզիտորների միության նախագահ Արամ Սաթյանը:

2015-08-20
Հանդիպումներ Դիլիջանի զարգացման հիմնադրամի գրասենյակում
Օգոստոսի 13-ին և 14-ին Դիլիջանի զարգացման հիմնադրամի տնօրինությունը, հանդիսանալով Դիլիջան քաղաքում խոշորամասշտաբ ներդրումներ իրականացնող կողմ, նախաձեռնել էր հանդիպում Դիլիջան քաղաքում գործունեություն ծավալող փոքր և միջին ձեռնարկությունների ներկայացուցիչների հետ: Հանդիպմանը մասնակցում էին սպասարկման ոլորտում ծառայություններ մատուցող, մասնավորապես՝ հյուրանոցների, հյուրատնային և բիզնեսի այլ ներկայացուցիչներ:
Հանդիպման նպատակն էր սույն թվականի օգոստոսի 1-ից ուժի մեջ մտած «Հայաստանի Հանրապետության Տավուշի մարզի Դիլիջան քաղաքային համայնքի և հարակից տարածքների զարգացման և ներդրումների խրախուսման մասին» ՀՀ օրենքի հիմնական դրույթների պարզաբանումը, Դիլիջանի զարգացման ծրագրի և եկեղեցու հետ կապված նախապատրաստական աշխատանքների ներկայացումը: Դիլիջանի զարգացման հիմնադրամի տնօրեն Արթուր Հակոբյանը, հիմնադրամի ներկայացուցիչներ Արա Ախոյանը և Դավիթ Իսկանդարյանը մանրամասն ներկայացրեցին Օրենքի ընդունմամբ պայմանավորված սպասվելիք զարգացումները, ստեղծված նոր միջավայրի ազդեցությունը բիզնեսի զարգացման և կատարելագործման տեսանկյունից, ինչպես նաև առաջիկայում հիմնադրամի կողմից նախատեսվող ծրագրերը, որոնք էական ազդեցություն են ունենալու բիզնես միջավայրի վրա:
Հանդիպման մասնակիցները ողջունեցին օրենսդրական հիմքերի ստեղծման փաստը, ինչը կարևոր ազդակ կհանդիսանա խոշոր ներդրողների ներգրավման, ՓՄՁ աշխուժացման, քաղաքաշինության բնագավառի համակարգված և հետևողական կատարելագործման համար՝ ստեղծելով անհրաժեշտ հիմքեր Դիլիջանը որպես կրթական կենտրոնի կայացման, պատմամշակութային և զբոսաշրջային կենտրոնի վերականգնման տեսանկյունից:
Հանդիպման ընթացքում ներկայացվեց Դիլիջանի եկեղեցու էսքիզային տարբերակը, որը հավանության է արժանացել Մայր աթոռ Սուրբ Էջմիածնի կողմից:
Առանձնահատուկ կարևորություն հայտնելով Դիլիջանում եկեղեցու կառուցման գործընթացին՝ հանդիպման մասնակիցները հայտնեցին իրենց պատրաստակամությունը եկեղեցու կառուցման գործում աջակցելու վերաբերյալ:
Հանդիպմանը ներկա մասնակիցները նաև կարևորեցին հիմնադրամի կողմից նախաձեռնված միջոցառումները, ինչպես նաև առաջարկեցին հիմնադրամի կողմից կազմակերպվող հասարակական նշանակության աշխատանքներին իրենց մասնակցությունը:
Օգոստոսի 7-ին հիմնադրամի գրասենյակում համանման հանդիպում էր կայացել քաղաքի կրթամշակութային ոլորտի աշխտողների հետ:
Ա. Հովհաննիսյան

2015-05-14
Մայիսի 17-ին կայանալիք Հանրաքվեի մասին
Հիմք ընդունելով ՀՀ Կառավարության 2015թ. մարտի 19-ի թիվ 271-Ն որոշումը և ղեկավարվելով ՀՀ ընտրական օրենսգրքի 16-րդ հոդվածի 1-ին մասով՝ Դիլիջանի քաղաքապետ Արմեն Սանթրոսյանի 2015թ. մարտի 30-ի որոշմամբՀայաստանի Հանրապետության Տավուշի մարզի Դիլիջան, Հաղարծին, Թեղուտ, Գոշ, Աղավնավանք, Խաչարձան, Հովք համայնքներում 2015թվականի մայիսի 17-ի տեղական հանրաքվեին նախապատրաստվելու համար Դիլիջանի քաղաքային համայնքում կազմավորվել են 11տեղամասային ընտրական կենտրոններ.

1. թիվ 1 Թիվ 3 մանկապարտեզ Մոլդովական 46

2. թիվ 2 Ակումբ Շամախյան 27/1

3. թիվ 3 Նախկին թեյարան Կալինինի 237ա

4. թիվ 4 Թիվ 1 մանկապարտեզ Գետափնյա 70/4

5. թիվ 5 Արվեստի պետական քոլեջ Կալինինի 57

6. թիվ 6 Թիվ 6 հիմնական դպրոց Կամո 131

7. թիվ 7 Մշակույթի պալատ Մյասնիկյան 53

8. թիվ 8 Թիվ 4 մանկապարտեզ Օրջոնիկիձե 63/1

9. թիվ 9 Պետական քոլեջ ՈՒսանողական 70

10.թիվ 10 «Մանուշակ» կինոթատրոն Շահումյան 2/1

11. թիվ 11 Թիվ 4 հիմնական դպրոց Շահումյան 6

2015-05-12
Եռատոնը Դիլիջանում
Դիլիջանում մայիսի 9-ին մեծ շուքով նշվեց Հայրենական մեծ պատերազմում տարած հաղթանակի 70-ամյա, Շուշիի ազատագրման ու Արցախի բանակի կազմավորման 23-ամյա հոբելյանները:
Հուշարձանային համալիրում հազարավոր դիլիջանցիներ իրենց հարգանքի տուրքը մատուցեցին Հայրենիքի համար զոհվածների հիշատակին՝ ծաղկեպսակներ ու ծաղիկներ խոնարհելով Հայրենական մեծ պատերազմում և Արցախյան ազատամարտում զոհվածների հիշատակը հավերժացնող հուշարձաններին:
Հնչում էր զինվորական խրոխտ երաժշտություն, կանոնավոր շարային երթով Անմար կրակի տարածք մտան զինվորականները, իսկ դպրոցականները կազմել էին «Անմահ զորագունդ»
ձեռքներին կրելով Մեծ հայրենականի մասնակիցների նկարները:
Եռատոնի առթիվ ներկաներին շնորհավորեց Դիլիջանի քաղաքապետ Արմեն Սանթրոսյանը:
Ելույթ ունեցան Տավուշի փոխմարզպետ Լևոն Սարգսյանը, զորամասի հրամանատարի տեղակալներ՝ փոխգնդապետ Արտյոմ Խոդերյանը և կապիտան էդգար Ավալյանը, վետերանների խորհրդի նախագահ Լևոն Ջառահյանը, Դիլիջանի հոգևոր հովիվ Տեր Շավարշ քահանա Սիմոնյանը:
Կատարվեց նաև պարգևների հանձնման արարողություն:
Դիլիջանի քաղաքապետ Արմեն Սանթրոսյանը հրապարակեց համայնքի ավագանու որոշումը՝ Հայրենական մեծ պատերազմի վետերան, պահեստի փոխգնդապետ Հենրիկ Սիմոնի Խառատյանին Դիլիջանի պատվավոր քաղաքացու կոչում շնորհելու մասին:
Հանձնելով հավաստագիրը, քաղաքապետը նշեց, որ վաստակաշատ վետերանը այդ կոչմանն արժանացել է երիտասարդության ռազմահայրենասիրական դաստիարակության գործում և քաղաքի հոգևոր մշակութային ոլորտում կատարած նշանակալի ներդրման համար:
Դիլիջանում տեղակայված զորամասի հրամանատարության կողմից մի խումբ վետերաններ պարգևատրվել են մեդալներով և պատվոգրերով: Պարգևները հանձնեց հրետանային գնդի հրամանատարի տեղակալ՝ փոխգնդապետ Արտյոմ Խոդերյանը :
Մայիսյան Եռատոնի միջոցառմանը իրենց ակտիվ մասնակցությամբ հանդես եկան մշակույթի պալատի անհատ կատարողները, Հ. Շարամբեյանի գեղարվեստի դպրոցի պարի խումբը և թիվ 1 մանկապարտեզի սաները:
Միջոցառումը եզրափակվեց զինվորականների պատվո քայլերթով:

2015-05-04
Այցելություն Հայրենիքի պաշտպաններին
Դիլիջանի քաղաքապետ Արմեն Սանթրոսյանի նախաձեռնությամբ ապրիլի 30-ից մայիսի 2-ը կազմակերպվեց ծնողների հանդիպում Պաշտպանության Բանակում ծառայող իրենց զավակների հետ:
Այդ նպատակով քաղաքապետարանը տրամադրել էր տրանսպորտային միջոցներ և շուրջ ութ տասնյակ մեր համաքաղաքացիներ հանդիպեցին Դիլիջանից զորակոչված իրենց զավակներին, ծանոթացան զորամասային պայմաններին և զինվորականների առօրյային:
Նախօրոք Ստեփանակերտ ժամանած քաղաքապետը և քաղաքի զինկոմ, փոխգնդապետ Հովհաննես Հակոբյանը անձամբ էին դիմավորում Դիլիջանից ժամանած ծնողներին, նրանց ուղեկցում զորամասեր, հոգ տանում հանդիպումների կազմակերպման մասին, հանձնում քաղաքապետարանի և քաղաքի հոգևոր հովիվ Տեր Շավարշ քահանա Սիմոնյանի կողմից պատրաստած նվերները՝ հեռուստացույցները, մարզական պարագաները:
Այցելություններ եղան Ստեփանակերտի, Մարտակերտի, Մարտունու և Հադրութի զարամասեր, որոնց ընթացքում Դիլիջանից ժամանած հյուրերը հպարտությամբ էին լսում դիլիջանցի զինծառայողների՝ Հայրենիքի նկատմամբ իրենց պարտքը բարձր պատասխանատվությամբ կատարելու մասին հրամանատարների դրվատանքի խոսքերը:
ՊԲ Ն զորամասում կայացած հանդիպման ընթացքում կատարվեց հիշատակի արարողություն՝ նվիրված իր ծառայողական պարտականությունների կատարման ժամանակ զոհված, մեր համաքաղաքացի, 12-րդ վաշտի հրամանատար, ավագ լեյտենանտ Մհեր Հովհաննեսի Հակոբյանի հիշատակին:
Արարողությանը ելույթ ունեցան և զինվորներին խաղաղ ու անվտանգ ծառայություն մաղթեցին Դիլիջանի քաղաքապետ Արմեն Սանթրոսյանը, քաջարի սպայի հայրը՝ Դիլիջանի զինկոմ, փոխգնդապետ Հովհաննես Հակոբյանը, զորամասի հրամանատարի տեղակալ, փոխգնդապետ Լալա Բաղդասարյանը, Մհերի ծառայակից ընկերները:
Զորամասի հրամանատարի տեղակալ, փոխգնդապետ Լալա Բաղդասարյանը հրապարակեց ՊԲ –ի հրամանատարության հրամանագիրը՝ որով Դիլիջանի քաղաքապետ Արմեն Սանթրոսյանը և քաղաքի զինկոմ՝ փոխգնդապետ Հովհաննես Հակոբյանը երիտասարդության ռազմահայրենասիրական դաստիարակության և մարտիկների բարոյական ոգու բարձրացման գործում ներդրած ավանդի համար պարգևատրվում են ՊԲ պատվոգրով:
Հանձնելով պարգևները, Լ. Բաղդասարյանը նրանց մաղթեց հետագա բեղմնավոր գործունեություն՝ բանակ- հասարակություն կապի ամրապնդման գործում:

2015-04-27
Հոգևոր առաջնորդների այցը Հաղարծին
Ապրիլի 21-ին՝ Հայոց Ցեղասպանության 100-ամյա տարելիցի կապակցությամբ Հայաստան ժամանած մի խումբ բարձրաստիճան հոգևորականներ այցելեցին Հաղարծնի վանքային համալիր: Պատվիրակության կազմում էին Ղպտի պատրիարք՝ Նորին Սրբություն Թավադրոս Բ-ն, Սլովենիայի պատրիարք, Ամենապատիվ՝ Ռաստիսլավը, Լոնդոնի եպիսկոպոս՝ Նորին Սրբազնություն, Մեծապատիվ Ռիչարդ Չարթրեսը :
Տավուշի հոգևոր թեմի առաջնորդ Գերաշնորհ Եզնիկ արքեպիսկոպոս Պետրոսյանի կողմից եկեղեցու բակում կազմակերպված հանդիսավոր ընդունելությանը ներկա էր Դիլիջանի քաղաքապետ Արմեն Սանթրոսյանը:
Հաղարծնի վանահայր Տեր Արիստակես վարդապետ Այվազյանի կողմից հնչեցված աղոթքից
հետո բարձրաստիճան հյուրերը Տավուշի հոգևոր թեմի առաջնորդ, Գերաշնորհ Եզնիկ արքեպիսկոպոս Պետրոսյանի ուղեկցությամբ շրջեցին վանքային համալիրում, ծանոթացան
վանքի պատմությանն ու գործունեությանը:
Այցելության ընթացքում կատարվեց նաև նվերների հանձնման արարողություն:
Նորին Սրբություն Ղպտի պատրիարք Թավադրոս Բ-ն եկեղեցական պարգևներ հանձնեց թեմի առաջնորդին և հոգևոր սպասավորներին:
Նորին Սրբությունն ի նշան երախտագիտության, եկեղեցական հուշամեդալ և խորհրդանշական նվեր հանձնեց Դիլիջանի քաղաքապետ Արմեն Սանթրոսյանին:

2015-04-20
Նոր մոտեցումներ՝ բյուջեի ձևավորման գործում
Գերմանիայի միջազգային համագործակցության ընկերության (ԳՄՀԸ) «Համայնքային զարգացում Հարավային Կովկասում» ծրագիրն աջակցում է ազգային և համայնքային մակարդակների գործընկերների՝ տեղական ինքնակառավարման համակարգի աշխատանքի ու հաշվետվողականության բարելավմանը ուղղված ջանքերին: 2013 թվականից Դիլիջանն ընդգրկված է պիլոտային ծրագրում և որոշակի արդյունքների է հասել համայնքի բյուջեի նոր ձևաչափի ներդրման ուղղությամբ:
Ապրիլի 15-ին ծրագրի համակարգող կազմակերպության կողմից Դիլիջանի քաղաքապետարանում կայացավ փորձի փոխանակում: Քննարկմանը մասնակցում էին Դիլիջանի և Աշտարակի քաղաքապետարանների աշխատակազմերի ներկայացուցիչները: Նոր ձևաչափի վերաբերյալ անհրաժեշտ պարզաբանումներ տրվեցին ֆինանսատնտեսական միավորման նախագահ Վահան Մովսիսյանի, ծրագրի ներկայացուցիչ Սուսաննա Բագրատունու կողմից: Այդ ուղղությամբ իրականացված աշխատանքները ներկայացրեց Դիլիջանի քաղաքապետարանի ֆինանսական բաժնի պետ Գոհար Դավթյանը: Ամփոփելով քննարկումը՝ Դիլիջանի քաղաքապետ Արմեն Սանթրոսյանը և ֆինանսիստների միավորման նախագահ Վահան Մովսիսյանը հույս հայտնեցին, որ շարունակվող համատեղ աշխատանքը մեծապես կնպաստի ՏԻՄ-երի աշխատանքների արդյունավետության բարձրացմանը:

2015-03-06
Դիլիջանի քաղաքապետ Արմեն Սանթրոսյանի շնորհավորական ուղերձը Կանանց Միջազգային օրվա՝ Մարտի 8-ի առթիվ
Սիրելի մայրեր, կանայք, քույրեր …
Սրտանց շնորհավորում եմ բոլորիդ գարնանային գեղեցիկ տոնի ՝ Մարտի 8-ի առթիվ, ցանկանալով անձնական երջանկություն և հաջողություններ:
Այս տոնը նաև առիթ է մեր սերն ու երախտագիտությունը արտահայտելու մեր կյանքի տարբեր ոլորտներում ձեր անուրանալի ներդրման առթիվ:
Ձեր բարությամբ ու համբերությամբ, դժվարություններին դիմակայե լու կարողությամբո ւ լավատեսությամբ, ընտանիքին ձեր անմնացորդ նվիրումով դուք ամբողջացնում եք հայ կնոջ կերպարն ու արժանի եք ամենաբարձր գնահատանքի:
Մեծ է ձերավանդը մեր հաղթանակների, մերպետության կայացման գործում։ Ձեր հոգածությամ է նաև այսօր օրօրի շենանում մեր սիրելի քաղաքը:
Ներկայումս մեր քաղաքում իրագործվող խոշորամասշտաբ ծրագրերի շնորհիվ ստեղծվում են հարյուրավոր աշխատատեղեր, մեծապես ընդլայնվում են մեր մատաղ սերնդի և երիտասարդության բարձրակարգ կրթություն ստանալու հնարավորությունները, իսկ իրականացվող սոցիալական ծրագրերը լրջորեն կնպաստեն են մեր բնակչության սոցիալական պայմանների բարելավմանը:
Համոզված եմ ,որ դուք մեր քաղաքի պատմության այս պատասխանատու փուլում ևս ձեր արժանի ներդրումն եք ունենալու:
Կրկին շնորհավորում եմ բոլորիդ, երջանկություն մաղթում ձեր ընտանիքներին:





2015-03-05
Գործնական հանդիպում
Մարտի 5-ին Դիլիջանի քաղաքապետարանում կայացավ <<Պատմական քաղաքներում համայնքների զարգացման ռազմավարություններ>> թեմայով հանդիպում, որի նպատակն էր

ավելի ամբողջական դարձնել պատմական քաղաքների մրցույթի ավարտական փուլում քաղաքի հնարավորությունների մասին պատկերացումները, տեղում ծանոթանալ պատմական ժառանգությանը և դրա պահպանության վիճակին:

Հյուրերին ողջունեց և քաղաքի զարգացման ներկա տեմպերի ու մշակութային ժառանգության պահպանման ուղղությամբ քաղաքապետարանի իրականացրած աշխատանքները համառոտակի ներկայացրեց Դիլիջանի փոխքաղաքապետ Արմեն Մակարյանը:
Միցույթի պայմանների, Եվրախորհրդի կողմից ներկայացվող չափորոշիչների վերաբերյալ պարզաբանումներով հանդես եկան ՀՀ էկոնոմիկայի նախարարի տեղակալ Սերգեյ Ավետիսյանը, Համաշխարհային ժառանգության քաղաքների կազմակերպության ներկայացուցիչ Մաթիաս Ռիփփը, ՀՀ մշակույթի նախարարության գլխավոր մասնագետ, ծրագրի ազգային համակարգող Գոհար Գրիգորյանը: Քննարկմանը մասնակցում էին Դիլիջանի գլխավոր ճարտարապետ Նվեր Դանիելյանը, քաղաքապետարանի կրթամշակութային ոլորտի պատասխանատու աշխատակիցներ:
Հավելենք, որ ՀՀ մշակույթի նախարարության և Համաշխարհային ժառանգության քաղաքների կազմակերպության կողմից հայտարարված մրցույթի առաջին փուլին մասնակցած 10 քաղաքներից մրցութային հանձնաժողովը նախապատվությունը տվել էր երեքին՝ Դիլիջանին, Գյումրուն և Գորսին:
Առաջիկայում կամփոփվեն արդյունքները և առաջնության շահած քաղաքը հնարավորություն կստանա Եվրոխորհրդի ծրագրով նախատեսված ժամկետում ծավալուն աշխատանքներ իրականացնել քաղաքի մշակութային ժառանգության պահպանության համար լավագույն պայմաններ ապահովելու, այն քաղաքի սոցիալ–տնտեսական խնդիրների լուծմանը նպատակաուղղելու ուղղությամբ:

2015-01-12
Ձմեռային առաջին զորակոչը Դիլիջանում
2015թ. հունվարի 11-ին Դիլիջնում ձմեռային առաջին զորակոչն էր: Քաղաքային հրապարակում հնչում էր հայրենասիրական խրոխտ երաժշտություն:
Հայրենիքի պաշտպաններին բանակ ճանապարհելու էին եկել նրանց հարազատները և ընկերները, Տավուշի մարզպետարանի ու Դիլիջանի քաղաքապետարանի աշխատակիցներն ու հանրության ներկայացուցիչները:
Բանակ մեկնողներին իրենց բարի մաղթանքները հղեցին Դիլիջանի զինկոմի տեղակալ, կապիտան Սիմակ Աղբալյանը, վետերանների խորհրդի նախագահ Լևոն Ջառահյանը, Հաղարծնի վանահայր, տեր Արիստակես վարդապետ Այվազյանը:
Զինկոմի տեղակալը նորակոչիկներին հանձնեց նաև քաղաքապետարանի կողմից
պատրաստված նվերները:
Բարի ծառայություն մաղթենք խաղաղ օրերի մեր զինվորներին:

2014-12-29
Դիլիջանի քաղաքապետ Արմեն Սանթրոսյանի շնորհավորական ուղերձը Ամանորի և Սուրբ Ծննդյան առթիվ
Սիրելի դիլիջանցիներ.
Քաղաքապետարանի աշխատակազմի, համայնքի ավագանու և անձամբ իմ կողմից սրտանց շնորհավորում եմ բոլորիդ՝ Ամանորի և Սուրբ Ծննդյան առթիվ, մաղթում եմ Ձեզ անձնական երջանկություն և նորանոր հաջողություններ գալիք՝ 2015 թվականին: 2014 թվականը մեր քաղաքի կյանքում նշանավորվեց այնպիսի խոշոր իրադարձություններով, որոնք էական ազդեցություն են ունենալու մեր առողջարանային քաղաքի հետագա զարգացման վրա: Ներկա սերունդը հպարտությամբ է հիշելու, որ ականատեսն ու մասնակիցն է եղել այդ իրոք պատմական իրողություններին:Հոկտեմբերի 11-ին բացվեց Դիլիջանի միջազգային դպրոցը, որի շնորհիվ մեր քաղաքը հավակնում է դառնալու տարածաշրջանային կրթական խոշոր կենտրոն: Շարունակվում է ֆինանսական կենտրոնի ձևավորման գործընթացը: ՀՀ Կենտրոնական բանկի կողմից քաղաքին ցուցաբերվող աջակցությունը մեծապես նպաստում է քաղաքային կյանքի տարբեր ոլորտների զարգացմանը: «Գիտելիք հանուն զարգացման » կենտրոնը դարձել է Դիլիջանի տարածաշրջանի պատանիների և երիտասարդության ստեղծագործական կարողությունների զարգացման կարևոր օջախներից մեկը: Արդեն գալիք ուսումնական տարում ՀՀ Կենտրոնական բանկի և «Այբ» հիմնադրամի համագործակցությամբ հիմնադրված Դիլիջանի կենտրոնական դպրոցը ուսումնական պարապմունքները կանցկացնի սեփական հարկի տակ: 2015 թվականին կբացվի ՀՀ ֆինանսների նախարարության ուսումնամեթոդական կենտրոնը, որը նույնպես կարևոր դերակատարում է ունենալու քաղաքի զարգացման գործընթացներում: Խոշորամասշտաբ ծրագրերի իրականացումը մեծապես նպաստում են նոր աշխատատեղերի ստեղծմանը, արտագաղթի նվազեցմանը: 2014թվականին մեզ հաջողվել է որոշակի առաջընթաց արձանագրել ազգաբնակչության սոցիալ- տնտեսական խնդիրների լուծման գործում: Բարեկարգվել են մեկ տասնյակից ավելի փողոցներ և նրբանցքներ, վերանորոգվել են բազմաթիվ բազմաբնակարան շենքերի մուտքեր, տանիքներ, վերելակներ: Ազգաբնակչության 85 տոկոսը ապահովված է շուրջօրյա ջրամատակարարմամբ: Մեզ հաջողվեց մեծ ծավալի հակասողանքային աշխատանքներ իրականացնել, որը կենսական նշանակություն ունի Դիլիջանի համար: Հուսով եմ, որ 2015-ին այն ավարտին կհասցվի և քաղաքի ողջ կենտրոնական հատվածի համար կստեղծվի հուսալի հակասողանքային դրենաժային համակարգ: Քաղաքն ապրում է ակտիվ հոգևոր- մշակութային կյանքով: Դիլիջանում են անցկացվել պարարվեստի, փողային նվագախմբերի հանրապետական փառատոնները, իսկ գորգագործության փառատոնը արդեն դարձել է ավանդական:

Ես հպարտ եմ, որ մեր համաքաղաքացիները իրենց ակտիվ մասնակցությունն են հանդես բերում հարազատ քաղաքի շենացման գործում: Մեր համատեղ արդյունավետ աշխատանքի շնորհիվ 2014թ. Դիլիջանը ճանաչվեց հանրապետության Լավագույն քաղաքային համայնք: Մեր ձեռքբերումները շարունակական են լինելու և համոզված եմ, որ 2015 թվականը բոլորիս համար լինելու է նոր հաջողությունների տարի:



2014-12-19
«Հայաստանի զարգացման նախաձեռնություններ» (IDeA) հիմնադրամի Դիլիջանի զարգացման ծրագրի շրջանակում նախատեսվում է քաղաքում կանանց ռեսուրս կենտրոն հիմնել:
IDeA-ի նախաձեռնությամբ այսօր Դիլիջանում կազմակերպվել է տեղաբնակ կանանց ձեռքի աշխատանքների ցուցահանդես-վաճառք: Ներկայացվել են ասեղնագործական, գոբելենագործական, գորգագործական, նկարչական աշխատանքներ, արհեստական եւ բնական քարերից պատրաստված զարդեր:

«Ցուցահանդեսը կազմակերպվել է՝ գնահատելու համար, թե տեղացի կանայք հատկապես արհեստագործական որ ուղղություններն են նախընտրում, ինչն էլ կանխորոշիչ կդառնա ապագա ռեսուրս կենտրոնի զարգացման ուղղությունների ընտրության, անհրաժեշտ միջոցառումների գնահատման համար, որոնք կապահովեն կենտրոնի հետագա բարեհաջող գործունեությունը: Նմանատիպ նախագիծ իրականացվել է Գորիսում՝ «Տաթեւի վերածնունդ» ծրագրի շրջանակում, ստեղծվել է բավականին հետաքրքիր փորձ, որն օգտակար կլինի նաեւ Դիլիջանի կենտրոնի գործունեության համար»,- ասել է Դիլիջանի զարգացման ծրագրի ներդրումների բաժնի ղեկավար Դավիթ Իսկանդարյանը:

Նախատեսվում է, որ կենտրոնի անդամ կանայք կվերապատրաստվեն, իսկ նրանց ձեռքի աշխատանքները կիրացվեն նաեւ որպես հուշանվերներ:

IDeA հիմնադրամի եւ UWC Դիլիջան քոլեջի նախաձեռնությամբ Դիլիջանում այսօր
մեկնարկել է մեկ այլ միջոցառում եւս. քաղաքի փոքրիկները դեկտեմբերի 19-ին, 21-ին եւ 22-ին հնարավորություն կունենան դիտելու Հենրիկ Մալյանի անվան թատրոնի ներկայացումները:

«IDeA հիմնադրամը, որը կարեւոր ծրագրեր է իրականացում քաղաքում, արդեն երկրորդ տարին է, որ Ամանորին նման կրթամշակութային միջոցառումներ է կազմակերպում քաղաքի փոքրիկների համար: Կարծում ենք, սա լավ նախաձեռնություն է, եւ երեխաները կարող են վայելել հետաքրքիր թատերական ներկայացումները»,- ասել է Դիլիջանի երիտասարդական կենտրոնի տնօրեն Արմինե Գրիգորյանը:



www.mediamax.am

2014-11-27
ՀԱՆՐԱՅԻՆ ԼՍՈՒՄՆԵՐԻ ՀՐԱՎԵՐ
2014թ․ դեկտեմբերի 1-ին ժամը 12-ին Դիլիջանի քաղաքապետարանի նիստերի դահլիճում տեղի կունենա Դիլիջանի քաղաքային համայնքի 2015թվականի բյուջեի նախագծի հանրային բաց լսումներ։ Կարող են մասնակցել բոլոր շահագրգիռ ֆիզիկական և իրավաբանական անձիք՝ համայնքի հրատապ կարիքները վերհանելու և համայնքի առաջնահերթ հիմնախնդիրները լուծելու նպատակով։
Համայնքի ղեկավարն ու աշխատակազմը ակնկալում են համայնքի ավագանու անդամներիև բնակչության շահագրգիռ մոտեցումը և ակտիվ ներգրավվածությունը բյուջեի վերջնական տարբերակի մշակման, ինչպես նաև դրա ընդունման, կատարման և վերահսկման գործում:

2014-11-17
ԱՍԲԱ-ն ցանկանում է օժանդակել սիրիահայության բնակարանային խնդիրների լուծմանը
Դիլիջանում 2013թ. մարտից մեկնարկած ԱՍԲԱ-ի՝ մատչելի բնակարանաշինության ծրագրի առաջին փուլի արդյունքներով արդեն շահագործման են հանձնվել 50 բնակարաններ: ԱՍԲԱ-ի տնօրինությունը մտադիր է նաև աջակցել սիրիահայերի բնակարանային խնդիրների լուծմանը և ցանկության դեպքում նրանց ևս ընդգրկել ծրագրում:Տեղում պայմաններին ծանոթանալու նպատակով ԱՍԲԱ հիմնադրամի գործադիր տնօրեն Արա Նազինյանի ուղեկցությամբ նոյեմբերի 14-ին Դիլիջան ժամանեցին մի խումբ սիրիահայ մեր հայրենակիցներ: Քաղաքապետարանում կայացած հանդիպման ընթացքում Դիլիջանի քաղաքապետ Արմեն Սանթրոսյանը համառոտ ներկայացրեց քաղաքը, նրա զարգացման ներկա փուլը և առաջիկա հեռանկարները: Հանդիպման ընթացքում քաղաքապետ Արմեն Սանթրոսյանը, փոխքաղաքապետ Արմեն Մակարյանը և Արա Նազինյանը պատասխանեցին հյուրերին հետաքրքրող հարցերին, որոնք վերաբերվում էին ինչպես ծրագրում ընդգրկվելու պայմաններին, այնպես էլ քաղաքում պահանջարկ ունեցող մասնագիտություններին և աշխատանքով ապահովելու հնարավորություններին: Այնուհետև հյուրերն այցելեցին նորակուռույցներ, տեղում ծանոթացան շենքային պայմաններին:

2014-11-11
Այս տարվա լավագույն քաղաքը Դիլիջանն է
Հայաստանում տեղական ինքնակառավարման օրվա կապակցությամբ նոյեմբերի 10-ին անցկացվեց «Լավագույն համայնք-2014» մրցանակաբաշխությունը, որին ներկա էին ՀՀ տարածքային կառավարման նախարարի պաշտոնակատար Վաչե Տերտերյանը, Երեւանի քաղաքապետ Տարոն Մարգարյանը, համայնքապետեր, ավագանու անդամներ, հասարակական կազմակերպությունների ներկայացուցիչներ: «Հայաստանի Հանրապետության տոների եւ հիշատակի օրերի մասին» ՀՀ օրենքի համաձայն` նոյեմբերի 10-ը պաշտոնապես նշվում է որպես Տեղական ինքնակառավարման օր: ՏԿ նախարարի պաշտոնակատար Վ. Տերտերյանը շնորհավորեց ՏԻ մարմինների ներկայացուցիչներին եւ համայնքների զարգացման, տեղական ժողովրդավարության ամրապնդման գործում արդյունավետ աշխատանք մաղթեց: «Ակնհայտ է, որ 18 տարին բավարար ժամանակահատված է որոշակի եզրահանգումներ,արդյունքներ ձեւավորելու համար, սակայն մյուս կողմից, հաշվի առնելով ՏԻՄ համակարգի բազմաշերտ ու բարդ համակարգ լինելը, անկասկած, փոքր ժամանակահատված է այս ոլորտում շատ արագ, վերջնական արդյունքներ գրանցելու համար: Բայց մենք պետք է հետեւողական լինենք եւ մեր արդյունավետ աշխատանքով փորձենք լուծել համակարգի առջեւ ծառացած խնդիրները»,- նշեց Վ. Տերտերյանը: Նա ընդգծեց, որ վերջին տարիներին ՏԻՄ համակարգի զարգացման առումով բավականին լուրջ աշխատանքներ են կատարվել, մասնավորապես` կարեւորելով Երեւան քաղաքում ՏԻՄ համակարգի ներդրման ու զարգացմանն ուղղված աշխատանքները, որտեղ գործարկված շատ մոդելներ եւ մեխանիզմներ փորձ կարվի տարածել նաեւ հանրապետության մյուս համայնքներում: ՏԻՄ համակարգի կազմավորման եւ ընթացիկ տարում գրանցած էական ձեռքբերումների համար ՀՀ վարչապետի շնորհակալագրերով պարգեւատրվեցին Կապան, Ստեփանավան քաղաքային համայնքների եւ Ակունք գյուղական համայնքի ղեկավարները: «Լավագույն համայնք-2014» մրցանակաբաշխության արդյունքներով` լավագույն քաղաքային համայնք ճանաչվեց Տավուշի մարզի Դիլիջան քաղաքը, լավագույն գյուղական համայնք՝ Շիրակի մարզի Ախուրյան համայնքը։«Մաքուր համայնք» անվանակարգում մրցանակը շնորհվեց Գեղարքունիքի մարզի Գավառ քաղաքային համայնքին:«Կանաչապատ համայնք» ճանաչվեց Արմավիրի մարզի Էջմիածին քաղաքային համայնքը, մշակութային լավագույն քաղաքային համայնք` Շիրակի մարզի Արթիկ քաղաքը:«Տարվա լավագույն համայնքային կայք» մրցանակին արժանացավ Շիրակի մարզի Գյումրի քաղաքը: «Լավագույն համայնք» մրցանակաբաշխությունն անցկացվում է ՀՀ տարածքային կառավարման նախարարության եւ «Հայաստանի համայնքների միության» կողմից:
www.hetq.am

2014-10-27
ՀՀ Ազգային Ժողովի տնտեսական հարցերի մշտական հանձնաժողովի արտագնա նիստ Դիլիջանում
Հոկտեմբեր 24-ին Դիլիջանի քաղաքապետարանում կայացավ ՀՀ Ազգային Ժողովի տնտեսական հանձնաժողովի արտագնա նիստ` «Շրջանառության հարկի» մասին ՀՀ օրենքում կատարված փոփոխությունների պազաբանման մասին» թեմայով: Միջոցառման նպատակը հանրությանը լավագույնս իրազեկելն էր և տեղում բնակչության և գործարարների կարծիքներին առավել մոտիկից ծանոթանալը: Նիստը վարում էր հանձնաժողովի նախագահ Վարդան Այվազյանը: Մասնակցում էին Տավուշի մարզպետ Հովիկ Աբովյանը, Դիլիջանի քաղաքապետ Արմեն Սանթրոսյանը, ԱԺ մշտական հանձաժողովի պատգամավորներ, փորձագետներ և կառավարության համապատասխան լիազոր ներկայացուցիչներ, մանր բիզնեսով զբաղվող գործարարներ, լրատվամիջոցների ու հկ-ների ներկայացուցիչներ:

Հանձնաժողովի նախագահի և կառավարության լիազոր ներկայացուցչի կողմից պարզաբանվեցին մասնակիցներին հետաքրքրող հարցերը:


2014-10-27
Աշխատանքային տոնավաճառ Դիլիջանում
Հոկտեմբերի 24-ին Դիլիջանի մշակույթի պալատի նախասրահում Աշխատանքի և սոցիալական հարցերի նախարարության Զբաղվածության պետական գործակալության Դիլիջանի մասնաճյուղի նախաձեռնությամբ կազմակերպվեց աշխատանքի տոնավաճառ: Նպատակն էր գործազուրկ դիլիջանցիներին տեղեկացնել ազատ աշխատատեղերի մասին և նրանց աշխատանք ունենալու հնարավորություն ընձեռել:
Աշխատանք փնտրող մեր համաքաղաքացիները հնարավորություն ունեցան ծանոթանալ քաղաքի 27 կազմակերպությունների կողմից առաջարկող աշխատատեղերին: Տոնավաճառին ներկա էին Դիլիջանի քաղաքապետ Արմեն Սանթրոսյանը, Աշխատանքի և սոցիալական հարցերի նախարարության Զբաղվածության պետական գործակալության պետի տեղակալ Գարիկ Սահակյանը:

2014-10-24
Մարզադպրոցը 50 տարեկան է
Հոկտեմբերի 24-ին նշվեց Դիլիջանի քաղաքապետարանի մանկապատանեկան մարզադպրոցի 50-ամյա հոբելյանը:

Միջոցառմանը մասնակցում էին տարբեր քաղաքների պատվիրակություններ, քաղաքապետարանի` սպորտի ոլորտը համակարգող պատասխանատու աշխատակիցներ, սպորտի վետերաններ, հասարակական կազմակերպությունների և լրատվամիջոցների ներկայացուցիչներ:

Ներկաներին ջերմորեն ողջունեց և մարզահամալիրի անցած ուղին համառոտակի ներկայացրեց մարզահամալիրի տնօրեն Թալորիկ Պետրոսյանը: Իսկ այդ ուղին բավականին խոսուն է և իր մեջ ներառում է լուրջ մարզական հաջողություններ հանրապետական և միջազգային հարթակներում:

Ներկայումս գործում են հունահռոմեական ըմբշամարտի, մանկապատանեկան ֆուտբոլի, վոլեյբոլի, բասկետբոլի խմբեր, որոնցում ընդգրկված են 130 պատանիներ ու աղջիկներ: Մարզադպրոցը հայտնի է իր հունահռոմեական ոճի ըմբիշներով, որոնք մասնակցելով հանրապետական մրցաշարերի, գրավում են մրցանակային տեղեր:

Մարզադպրոցի սաներից Սասուն Ղամբարյանը լուրջ ձեռքբերումներ է ունեցել մասնակցելով աշխարհի մեծահասակների առաջնությանը, արժանանալով միջազգային կարգի սպորտի վարպետի կոչման, իսկ Արմեն Մարտիրոսյանը ժամանակին դարձել է ԽՍՀՄ պատանիների առաջնության հաղթող:
Իր ելույթում տնօրենն անդրադարձավ այն մեծ ուշադրությանը, որ ցուցաբերվում է քաղաքապետարանի, անձամբ քաղաքապետ Արմեն Սանթրոսյանի կողմից մանկապատանեկան սպորտի զարգացմանն աջակցելու ուղղությամբ:
Մարզական ոլորտում երկարամյա աշխատանքի համար մի խումբ աշխատակիցներ պարգևատրվեցին Դիլիջանի քաղաքապետարանի պատվոգրերով:

2014-10-23
ՀՀ Տավուշի մարզպետ Հովիկ Աբովյանի մամուլի ասուլիսը
Հոկտեմբերի 23-ին կայացավ ՀՀ Տավուշի մարզպետ Հովիկ Աբովյանի մամուլի ասուլիսը: Ողջունելով ներկա լրատվամիջոցների ներկայացուցիչներին, մարզպետ Հովիկ Աբովյանն իր խոսքում կարևորեց նման հանդիպումները, լրագրողների կարծիքին ու գնահատականին ծանոթ լինելը՝ նշելով, որ դրանք միշտ ձևավորվում են հասարակության հետ անմիջական շփումների հիման վրա: Ապա մարզպետն իր խոսքում անդրադարձ կատարեց սահմանամերձ համայնքների խնդիրներին՝ ընդգծելով հատկապես հուլիս-օգոստոս ամիսների ընթացքում հակառակորդի գնդակոծությունից տուժած համայնքներում իրականացվող աշխատանքները: Իր խոսքում մարզպետը շեշտեց կառավարության կողնից սահմանամերձ շրջանների նկատմամբ ցուցաբերվող հատուկ ուշադրության մասին: Կառավարությունը այս տարի 88 մլն դրամ է հատկացրել սահմանամերձ շրջաններում իրականացվող աշխատանքների համար , կարևորելով հատկապես կրթական օջախների անվտանգության ապահովումը: Անդրադառնալով տարվա գյուղատնտեսական աշխատանքներին, նա նշեց,որ ձեռքբերումները շոշափելի են չնայած գարնանային ցրտահարությանն ու ամռան կարկտահարությանը: Հաջողվել է մթերել 30 հազար տ հացահատիկ, 10550 հազար տ խաղող,մյուս գյուղատնտեսական կուլտուրաների գծով նույնպես արդյունքները գոհացուցիչ են: Հովիկ Աբովյանը նաև անդրադարձավ քաղաքաշինության, կրթության,առողջապահության ոլորտներում իրականացվող աշխատանքներին և առկա խնդիրներին: Հանդիպմանը ծավալվեց մտքերի ակտիվ փոխանակություն, լրագրողների հարցերին տրվեցին կոնկրետ պատասխաններ:

2014-10-21
Հանդիպում լրագրողների հետ
Հոկտեմբերի 20-ին ՄԱԿ-ի Հանրային տեղեկատվության վարչության երևանյան գրասենյակի նախաձեռնությամբ ՀՀ Կենտրոնական բանկի «Գիտելիք հանուն զարգացման» կենտրոնում անցկացվեց հանդիպում լրագրողների հետ:
Հանդիպմանը մասնակցում էին ՄԱԿ-ի երևանյան գրասենյակի պատասխանատու աշխատակիցներ, հանրապետության լրատվամիջոցների ներկայացուցիչներ, ազատ լրագրողներ:
Հանդիպման սկզբում կենտրոնի տնօրեն Վլադիմիր Կոնստանդյանը հյուրերին ներկայացրեց կենտրոնի գործունեությանը:
ՄԱԿ-ի մասին ընդհանուր տեղեկությամբ հանդես եկավ ՄԱԿ ՀՏՎ գրասենյակի պատասխանատու Արմինե Հալաջյանը: Մարդու իրավունքների մեխանիզմների, Համընդհանուր պարբերական զեկույցի, երեխաների, փախստականների և կանանց իրավունքների վերաբերյալ զեկուցումներով հանդես եկան ՄԱԶԾ ծրագրի համակարգող Մարինե Մալխասյանը, ՄԱԿ-ի մշտական համակարգողի ավագ խորհրդական Տաթևիկ Մովսիսյանը, ՄԱՄՀ/ UNICEF հաղորդակցության հարցերով պատասխանատու Զառա Սարգսյանը, ՄԱՓԳՀ արտաքին կապերի պատասխանատու Անահիտ Հայրապետյանը, ՄԱԲՀ հաղորդակցության հարցերով օգնական Մհեր Մանուկյանը: Միջոցառման նպատակն էր նպաստել ՄԱԿ-ի գործունեության լուսաբանման վերաբերյալ լրագրողական մրցույթին ակտիվ մասնակցությանը, որի արդյունքներն ամփոփվելու են ընթացիկ տարվա դեկտեմբերին: Հանդիպմանը կայացավ մտքերի ակտիվ փոխանակում:
Հյուրերը հանդիպումից հետո այցելեցին «Հին Դիլիջան» պատմամշակութային համալիր և Դիլիջանի միջազգային դպրոց:

2014-10-09
ՀՀ գյուղատնտեսական համատարած հաշվառում 2014
Հանրապետությունում` հոկտեմբերի 11-ից 31-ը անցկացվելիք գյուղատնտեսական համատարած հաշվառման աշխատանքների կապակցությամբ ԱՎԾ Տավուշի մարզային գործակալության կողմից
հոկտեմբերի 8-ին Դիլիջանի քաղաքապետարանում անցկացվեց խորհրդակցություն: խորհրդակցությանը մասնակցում էին ԱՎԾ Դիլիջանի տարածաշրջանի պատասխանատու աշխատակիցներ, ԳՀՀ-ի գործընթացում ընդգրկված աշխատողներ:Խորհրդակցության ընթացքում Դիլիջանի փոխքաղաքապետ Արմեն Մակարյանը ընդգծելով համապետական հաշվառման կարևորությունը վստահեցրեց, որ ամբողջ գործընթացի ընթացքում կապահովվի քաղաքապետարանի օգնությունն ու աջակցությունը:
Ինչպես օրենքի պահանջների պարզաբանման, այնպես էլ աշխատանքների կազմակերպման վերաբերյալ ընդարձակ պարզաբանումներով հանդես եկավ ԱՎԾ Տավուշի մարզային գործակալության պետ Ա. Աչինյանը:
Ա. Աչինյանը աշխատակիցներին մանրամասն հրահանգավորելուց հետո պատասխանեց նրանց հուզող հարցերին:

2014-10-07
Ընդունելություն Ուսուցչի օրվա առթիվ
Հոկտեմբերի 6-ին Դիլիջանի քաղաքապետարանում Ուսուցչի օրվա կապակցությամբ կազմակերպված ընդունելության ժամանակ քաղաքապետ Արմեն Սանթրոսյանը քաղաքապետարանի պատվոգրեր հանձնեց մանկավարժական ոլորտում աչքի ընկած մի խումբ ուսուցիչների: Իր շնորհավորական ելույթում քաղաքապետը նշեց, որ մեր հասարակությունը բարձր է գնահատում այն շնորհակալ գործունեությունը, որ իրականացնում են մեր ուսուցիչները Հայաստանի ապագա քաղաքացիների աշխարհահայացքի ձևավորման, նրանց ապագայի կերտման գործում:
Քաղաքապետը և մանկավարժները շնորհավորեցին նաև ավագ դպրոցի տնօրեն Արա Արամյանին` Հայաստանի Հանրապետության վարչապետի հուշամեդալով պարգևատրվելու կապակցությամբ:
Ներկաները իրենց հերթին գոհունակություն հայտնեցին մանկավարժների աշխատանքը բարձր գնահատելու և քաղաքապետարանի, անձամբ քաղաքապետի կողմից դպրոցների նկատմամբ ցուցաբերվող մշտական հոգատարության համար:
Ընդունելության ընթացքում արծարծվեցին նաև քաղաքի կրթական ոլորտին առնչվող կոնկրետ խնդիրներ, նախանշվեցին դրանց իրականացման հնարավորությունները:
Ընդունելությանը ներկա էին փոխքաղաքապետ Արմեն Մակարյանը և քաղաքապետարանի այլ պատասխանատու աշխատակիցներ:






2014-10-06
Տոնական Դիլիջան
Հոկտեմբերի 4-ին մեծ հանդիսավորությամբ նշվեց Դիլիջանի հիմնադրման 470-ամյակը: Տոնակատարությանը մասնակցում էին ՀՀ փոխվարչապետ Արմեն Գևորգյանը, Տավուշի մարզպետ Հովիկ Աբովյանը, ՀՀ Ազգային Ժողովի պատգամավոր Հակոբ Հակոբյանը, ՀՀ նախագահի աշխատակազմի ղեկավարի տեղակալ Վարդան Արամյանը, ՀՀ ֆինանսների փոխնախարար Սուրեն Կարայանը, միջազգային դպրոցի համահիմնադիրներ Ռուբեն Վարդանյանը, Վերոնիկա Զոնաբենդը, Հայաստանում Ռումինիայի արտակարգ և լիազոր դեսպան Սորին Վասիլեինը, Համայնքային զարգացման ծրագրի տնօրեն Հայաստան Ստեփանյանը և այլ բարձրաստիճան հյուրեր:
Տոնականորեն զարդարված քաղաքի թաղամասերում կազմակերպել էին միջոցառումներ, որտեղ գեղարվեստական կատարումներով հանդես եկան քաղաքի դպրոցների և մանկապարտեզների սաները: Միջոցառումների ցիկլը սկսվեց քաղաքապետարանի երաժշտական դպրոցի հիմնանորոգման աշխատանքների ավարտին նվիրված արարողությամբ: Այնուհետև կազմակերպվեց շրջայց UWC Դիլիջանի միջազգային դպրոց, որտեղ հյուրերը ծանոթացան կատարված աշխատանքներին և դպրոցի առաջիկա բացման նախապատրաստությանը: Միջազգային դպրոցում հյուրերին ողջունեցին Դիլիջանի քաղաքապետ Արմեն Սանթրոսյանը և դպրոցի տնօրեն Ջոն Պադըֆութը: Տնօրենը նաև ծավալուն հարցազրույց տվեց լրատվամիջոցներին: ՈՒրախ տոնական միջոցառումներ անցկացվեցին նաև երկրագիտական թանգարանում, որտեղ գեղարվեստական կատարումներով հանդես եկան Դիլիջանի արվեստի պետական քոլեջի սաները: Հաջորդ միջոցառումը քաղաքային ամֆիթատրոնում էր, որտեղ փոքրիկ դիլիջանցիները հյուրընկալել էին Երևանի պետական կրկեսի արտիստներին: Տոնական եզրափակիչ միջոցառումը կայացավ երեկոյան` քաղաքային հրապարակում: Տոնի առթիվ իր ողջույնի խոսքը հղեց Դիլիջանի քաղաքապետ Արմեն Սանթրոսյանը: Ներկաներին շնորհավորեց և իր տերունական աղոթքը հղեց Տեր Շավարշ քահանա Սիմոնյանը: Հանդիսավոր պայմաններում հրապարակվեց համայնքի ավագանու որոշումը, որով միջազգային դպրոցի համահիմնադիր Վերոնիկա Զոնաբենդը, քաղաքի զարգացման գործում ներդրած նշանակալի ավանդի համար արժանացել է «Դիլիջանի պատվավոր քաղաքացու» կոչման և պարգևատրվել քաղաքապետարանի ոսկե հուշամեդալով: «Դիլիջանի պատվավոր քաղաքացու» հավաստագիրը և հուշամեդալը հանձնեց Դիլիջանի քաղաքապետ Արմեն Սանթրոսյանը: Քաղաքապետարանի ոսկե հուշամեդալով պարգևատրվել է նաև քաղաքի հոգևոր հովիվ Տեր Շավարշ քահանա Սիմոնյանը: Միջոցառմանը ելույթ ունեցան Հայաստանի Հանրապետության ճանաչված և սիրված երգիչներ Լեյլա Սարիբեկյանը, Զարուհի Բաբայանը, Աիդա Սարգսյանը, Մխիթար Քեթցյանը : Տոնական համերիգին իրենց երաժշտական ողջույնը հղեցին երգիչ – երգահան Սամվել Ղասաբյանը, երգիչներ Խաչիկ Ղազարյանը, Արթուր Քեթցյանը, Նշան Մանուչարյանը, դուդուկահար Վարդան Հովսեփյանը, Հ. Շարամբեյանի անվան գեղարվեստի դպրոցի պարի խմբի սաները: Տոնախմբությունը եզրափակվեց ճոխ հրավառությամբ:

2014-10-03
Դիլիջանը 470 տարեկան է
Դիլիջանը 470 տարեկան է

2014-10-02
Դիլիջան 470
2014 թվականի հոկտեմբերի 4-ին կազմակերպվելու են միջոցառումների շարք և տոնախմբություն` նվիրված Դիլիջանի հիմնադրման 470-ամյա հոբելյանին:
Միջոցառումները կկայանան հետևյալ ծրագրով.

Ժամը 11:00-12:30`

· Կամո թաղամաս. Թիվ 6 մանկապարտեզի դահլիճում,

· Շամախյան թաղամաս. Թիվ 3 մանկապարտեզի գլխավոր մուտքի մոտ,

· Թախտա թաղամասի բնակելի շենքերի տարածքում,

· Կաղնի խաչ թաղամաս` Գայի փողոցում, «Դիանա» խանութի մոտ,

· Գետափնյա փողոցի թիվ 68 և 70 շենքերին հարող տարածքում(Խանութի մոտ),

· Ժամը 11.00- ին. Մանկական երաժշտական դպրոցի վերակառուցված շենքի բացման արարողություն (ՈՒսանողական փողոց 41),

· ժամը 13:00-ին. Շրջայց UWC Դիլիջանի քոլեջի տարածքում,

· ժամը 15:00-ին. Դիլիջանի երկրագիտական թանգարանի պատկերասրահում ցուցահանդեսի բացում քաղաքի բարերարների հովանավորությամբ և համերգային ծրագիր Դիլիջանի արվեստի պետական քոլեջի ժող նվագարանների համույթի ու անհատ երաժիշտների ուժերով,

· ժամը 16:00-ին. Բացօթյա ամֆիթատրոնում` Երևանի պետական կրկեսի ելույթը,

· ժամը 17:00-ին. Քաղաքային հրապարակում` հանդիսավոր մաս, տոնական համերգ, ճոխ հրավառություն:


2014-09-30
01.07.2014թ. – 01.10.2014թ. ընկած ժամանկահատվածում քաղաքապետարանի կատարած աշխատանքները
Դիլիջան համայնքի 2014թ. բյուջեն մշակվել է` հիմք ունենալով համայնքի 2013-2016թթ. քառամյա զարգացման ծրագիրը:
2014թ. երրորդ եռամսյակում տեղական մուտքերի արդյունավետ հավաքագրման շնորհիվ հավաքագրվել է 297000.0 հազ. դրամի եկամուտ, որը հնարավորություն է տալիս ավելի իրատեսորեն կանխագծելու առաջիկա անելիքները:
Քաղաքապետարանի ուշադրության կենտրոնում են սոցիալապես անապահով ընտանիքները, 20 ընտանիքի տրվել է դրամական օգնություն:
Յուրաքանչյուր նորածին երեխաների համար 29 ընտանիքի տրվել է միանվագ դրամական օգնություն:
Դիլիջան քաղաքում գործող «Հույսի Կամուրջ» հասարակական կազմակերպություն հաճախող հաշմանդամ երեխաների ուսումնադաստիարակչական աշխատանքները առավել արդյունավետ կազմակերպելու և անցկացնելու համար համայնքի բյուջեից յուրաքանչյուր ամիս ցուցաբերվում է ֆինանսական աջակցություն:
Մանկապարտեզ հաճախող ավագ խմբերի երեխաների համար, որոնք հրաժեշտ են տալիս մանկապարտեզին ամֆիթատրոնում` մեկ միասնական ծրագրով կազմակերպվեց «Հրաժեշտի ժամ» տոնական հանդես, 198 երեխների տրվեցին նվերներ։
Դիլիջան քաղաքի դպրոցների առաջին դասարան հաճախող թվով 220 երեխաների համար սեպտեմբերի 1-ի կապակցությամբ ձեռք են բերվել և տրամադրվել նվերներ:
Oգոստոսին Դիլիջանի քաղաքային հրապարակում անցկացվեց «Մշակութային վերածնունդ» գորգագործության և դեկորատիվ- կիրառական արվեստների երկրորդ փառատոնը: Սեպտեմբերին Դիլիջանում մեկնարկեց «Մարզային գավաթ» հեծանվային մրցաշար, որի կազմակերպիչն էր «Սիրողական հեծանվային սպորտի և հեծանվային զբոսաշրջության ֆեդերացիա» հկ-ն:
Ավարտվել է Երաժշտականա դպրոցի հիմնանորոգման աշխատանքները։ Իրականացվել են Շամախյան փողոցի 3բ հասցեի բազմաբնակարան բնակելի շենքի վերելակի հիմնանորոգման, Կալինինի փողոցի մետաղական ճաղաշարերի վերականգնման աշխատանքները։ Սկսվել են Մոլդովական 1 բազմաբնակարան բնակելի շենքի վերելակի հիմնանորոգման աշխատանքները։
Քաղաքի տարբեր հատվածներում կատարվել են համայնքային ենթակայության ճանապարհների փոսային նորոգման աշխատանքներ։ Կատարվել է Կամո փողոցի 2-րդ նրբ.թիվ 16 հասցեի տնից մինչև 26 հասցեի տունն ընկած տարածքի ավտոտրանսպորտի երթևեկելի մասի բետոնացման և Գետափնյա փողոցի գերեզմանատան ճանապարհի խճապատման աշխատանքներ։ Շամախյան, Անդրանիկի և Գոլովինո թաղամասերում ավտոտրանսպորտի երթևեկելի մասի ասֆալտի ջարդոնով փոսալցման և հարթեցման աշխատանքներ։ Սկսվել են Շահումյան փողոցի 17 բնակելի շենքերի դռների և պատուհանների փոխման, Շահումյան 11 և 18 բազմաբնակարան բնակելի շենքերի տանիքների նորոգման աշխատանքները։ Գազաֆիկացվում է Սարի փողոցը։
Քաղաքապետարանը միջոցներ է ձեռնարկում իր ենթակայության ենթակառույցների նյութեխնիակական բազայի ամրապնդման ուղղությամբ։
«Դիլիջանի քաղաքապետարանի մարզահամալիր» ՀՈԱԿ-ի համակարգում գործող մանկապատանեկան մարզադպրոցի 50-ամյակին նվիրված կազմակերպվում է դպրոցականների աշնանային մարզախաղեր և հունա-հռոմեական ըմբշամարտի բաց առաջնություն։
Զգալի աշխատանքներ են իրակնացվել լուսավորության, աղբահանության և սանիտարական մաքրման բարելավման հանար։ Իրականացվել է աղբավայրի խնամք։ Ձեռք են բերվել և տեղադրվել աղբամաններ: Համայնքում իրականացվում են կանաչապատման և կանաչ տարածքների սպասարկման կազմակերպման աշխատանքներ։
Քաղաքի տարբեր թաղամասերում տեղադրվել են խաղահրապարակներ, զրուցատաղավարներ և նստարաններ։

2014-09-29
Վաչե Գրիգորյանը նշեց իր հասարակական գործունեության 10 տարին
Վաչե Գրիգորյանը նշեց իր հասարակական գործունեության 10 տարին:
Դիլիջանի բնակիչ Վաչե Գրիգորյանի գործունեության մասին խոսվել է բազմիցս տպագիր մամուլի և հեռուստատեսային հաղորդումների ու տեսաֆիլմերի միջոցով: 2002 թվականից Վաչեն մասնակցել է հասարակական կազմակերպությունների կողմից իրականացվող տարբեր դասընթացների՝ հզորացնելով իր կարողություններն ու գիտելիքները: Մասնակցել է քաղաքային և հանրապետական տարբեր միջոցառումների, նաև ստեղծագործում է: 2011 թվականից հանդիսանում է <<Արդար Հայաստան>> հասարակական կազմակերպության անդամ և համակարգում է կրթական և մշակութային ծրագրերը, խմբագրում <<100% Դիլիջանում>> ամսաթերթը: 2013-ից Վաչեն վարում է dilijanews.blogspot.com բլոգը և համակարգում <> կամավորների խումբը: Վաչեն երգում է ,ստեղծագործում , հեղինակ է երկու տասնյակից ավելի երգերի , ութսունից ավելի բանաստեղծությունների, թղթակցում է տեղական, և մարզային մամուլին: Վաչեն նրբանկատ է, ընկերասեր և պատասխանատու.<<Այս օրվան պատրաստվել եմ մի քանի ամիս և երկար եմ սպասել>>.նշեց Վաչեն: Սեպտեմբերի 19-ին մարդաշատ էր Դիլիջանի մշակույթի պալատը և հանդիսատեսը վայելեց Վաչեի կատարումները, նրա հետ նշեց իր հասարակական գործունեության 10 ամյակը՝ <<Դիլիջանը ե՛ս եմ>> խորագրով: Համերգին ելույթներով հանդես եկան <<Հայացք>> պարի համույթը, ավաք դպրոցի աշակերտուհի Էդիտա Ավագյանը, Ալյոշա Հարությունյանը: ՄԻջոցառման վերջում Վաչեն իրեն աջակցելու համար երախտիքի խոսք ուղղեց հայտնեց Դիլիջանի քաղաքապետարանին, մշակույթի պալատի տնօրինությանը, <<Մուշ Հանգստյան տուն>> հյուրանոցին, <<Դիլնետ>> բիզնեսի աջակցության ՍՊԸ.ին, tesankyun.am մարզային կայքին, Ազգային ժողովի պատգամավոր Հակոբ Հակոբյանին և իր ընկերներին:

2014-09-27
«Հետադարձ հայացք՝ 100 տարի անց»
Սեպտեմբերի 27-28-ը Հայաստանում անցկացվեցին Եվրոպական ժառանգության օրերը՝ «Հետադարձ հայացք՝ 100 տարի անց» խորագրի ներքո: Եվրոպական ժառանգության օրերի շրջանակում իրականացվող միջոցառումները, որոնք նվիրված էին Առաջին աշխարհամարտի դեպքերին, վկայակոչված էին ապահովելու մի հուզական ճամփորդություն՝ ճանաչելու մշակութային ցեղասպանության հետևանքով հայ ժողովրդի կրած մշակութային ժառանգության՝ պատմաճարտարապետական կոթողների և հոգևոր արժեքների անդառնալի կորուստը, վերապրելու պատմության անցած 100 տարիները և վերաարժեվորելու հայ մարդու մոխիրներից վերստին հառնող ստեղծագործ ուժը:
Դիլիջանի երկրագիտական թանգարանը այս տարի ևս մասնակցեց ամենամյա այս ծրագրին` ներկայացնելով ասեղնագործ Սերիկ Դավթյանի, ՀՀ վաստակավոր նկարիչ Հովհաննես Շարամբեյանի,գեղանկարիչներ` Ղազար Ղազարյանի, Համլետ Ասատրյանի գործերը: Ցուցադրվեցին դրվագներ հայկական միջնադարյան կիրառական արվեստի պատմությունից: Ֆոտոների, գրությունների, գրավոր աղբյուրների միջոցով մեր այցելուներին ներկայացրեցինք կապիտան Դմիտրի Տոմիչի կյանքն ու գործունեությունը
Հիշեցնենք, որ Եվրոպական ժառանգության օրերը Եվրոպայի խորհրդի և Եվրամիության համատեղ նախաձեռնությունն է, որն իրականացվում է Եվրոպական մշակութային կոնվենցիային միացած 50 եվրոպական երկրներում:
Նույն ծրագրի շրջանակներում քաղաքի կենտրոնական գրադարանում կազմակերպվեց համապատասխան գրականության ցուցահանդես: Միջոցառմանը ընթերցողների առջև զեկուցումով հանդես եկավ թիվ 5-րդ դպրոցի պատմության ուսուցչուհի Լուսինե Գասպարյանը:

2014-09-24
Տարվա լավագույն զբոսաշրջային քաղաք
«Արմենիա տուրիստիչեսկայա» ամսագրի կողմից հայտարարված մրցույթի արդյունքներով Դիլիջանը ճանաչվել է «Տարվա լավագույն զբոսաշրջային քաղաք» և պարգևատրվել հատուկ դիպլոմով:


2014-09-12
Հոբելյանական հուշամեդալների հանձնման արարողություն
Սեպտեմբերի 11-ին Դիլիջանի քաղաքապետարանի նիստերի դահլիճում
տեղի ունեցավ Բելոռուսի ազատագրման 70-ամյա հոբելյանին նվիրված հուշամեդալների հանձնման արարողություն:
Հոբելյանական հուշամեդալներով պարգևատրվել են մեր համաքաղաքացի վետերաններ Բաղդասար Թովմասյանը, Հրանտ Ղալեչյանը (հետմահու), Արտավազդ Ալիխանյանը, Վարդանուշ Մանուկյանը և Սիրանույշ Դանիելյանը:
Ներկաներին ողջունեցին և շնորհավորական խոսքեր հղեցին Դիլիջանի քաղաքապետ Արմեն Սանթրոսյանը, Հայաստանում Բելոռուսի արտակարգ և լիազոր դեսպան Ստեպան Սուխարենկոն` ընդգծելով Հայրենական մեծ պատերազմում տարած հաղթանակի կարևորությունը և մեր վետերանների ավանդը այդ նշանակալի գործում:
Այնուհետև դեսպանը հանձնեց Բելոռուսի Հանրապետության նախագահի կողմից տրված հուշամեդալներն ու շնորհակալական նամակները: Արարողությանը մասնակցում էին Տավուշի փոխմարզպետ Լյովա Սարգսյանը, Դիլիջանի փոխքաղաքապետ Արմեն Մակարյանը, վետերանների խորհրդի նախագահ Լևոն Ջառահյանը:

2014-08-27
ՀՀ նախարարի այցը Դիլիջան
Օգոստոսի 25-ին ՀՀ սպորտի և երիտասարդության հարցերի նախարար Գաբրիել Ղազարյանը Տավուշի մարզ կատարած աշխատանքային այցի շրջանակներում այցելեց Դիլիջան:
Նախարարը Տավուշի փոխմարզպետ Լյովա Սարգսյանի, Դիլիջանի քաղաքապետ Արմեն Սանթրոսյանի, նախարարության և մարզի սպորտային ոլորտի պատասխանատու աշխատակիցների ուղեկցությամբ այցելեց մանկապատանեկան մարզական համալիր, տեղում ծանոթացավ քաղաքի գլխավոր մարզաբազայի նյութատեխնիկական վիճակին և կատարվող աշխատանքներին:
Նախարարը հանգամանալից զրույց ունեցավ մարզահամալիրի տնօրինության և մարզիչների հետ, համապատասխան տեղեկատվություն ստանալով գործող խմբակների, դրանցում պատանիների ընդգրկվածության, առաջնահերթ լուծում պահանջող հարցերի մասին:
Այնուհետև մարզահամալիրում կայացավ աշխատանքային խորհրդակցություն, որի ընթացքում վեր հանվեցին աշխատանքներին խոչընդոտող հիմնական հանգամանքները, և արվեցին առաջարկություններ, աշխատանքների կազմակերպման արդյունավետության բարձրացման ուղղությամբ:
Խորհրդակցության ընթացքում Դիլիջանի քաղաքապետ Արմեն Սանթրոսյանը մտահոգիչ համարեց քաղաքի դպրոցների մարզադահլիճների վիճակը և հույս հայտնեց, որ բոլոր շահագրգիռ կողմերի աջակցությամբ հնարավոր կլինի վիճակը բարելավել:
Նախարարը պատրաստակամություն հայտնեց աջակցություն ցուցաբերել ինչպես այդ, այնպես էլ մարզչական կադրերի հարցում: Նա նաև կորևորեց տեղի մարզական կառույցների և տարբեր մարզաձևերի օլիմպիական ֆեդերացիաների հետ կապերի սերտացումը:

2014-08-18
Գորգագործության և դեկորատիվ-կիրառական արվեստների դիլիջանյան երկրորդ փառատոնը
Oգոստոսի 16-ին Դիլիջանի քաղաքային հրապարակում անցկացվեց «Մշակութային վերածնունդ» գորգագործության և դեկորատիվ-կիրառական արվեստների երկրորդ փառատոնը: Միջոցառման իրականացման նախաձեռնությունը պատկանում է «MEDIA ONIX» ընկերությանը: Փառատոնի կազմակերպմանն աջակցել էին ՀՀ էկոնոմիկայի նախարարությունը, ՀՀ Տավուշի մարզպետարանը, Դիլիջանի քաղաքապետարանը և USAID EDMC միջազգային կազմակերպությունը: Փառատոնը Դիլիջանում կազմակերպվում է երկրորդ անգամ և միտում ունի դառնալու ավանդական: Այդ մասին իր ողջույնի խոսքում նշեց նաև Դիլիջանի քաղաքապետ Արմեն Սանթրոսյանը, միաժամանակ իր երախտագիտությունը արտահայտելով փառատոնի գլխավոր կազմակերպչին և հովանավորողներին: Փոռատոնին մասնակցեցին ինչպես համաշխարհային շուկայում հայտնի «Մեգերյան կարպետ» և «Ղարաբաղ կարպետ» գորգագործական կազմակերպությունները, այնպես էլ Արցախի գորգագործության թանգարանը, անհատ գորգագործեր՝ տարածաշրջանի գորգարվեստի իրենց բացառիկ նմուշներով:
Բացի գորգերի ցուցադրությունից, հրապարակում տեղադրված էին տաղավարներ, որոնց վրա ցուցադրված էին ՀՀ մարզերի և Արցախի դեկորատիվ կիրառական արվեստի ցուցանմուշներ, իսկ մշակույթի տան նախամուտքում քաղաքի ռեստորանային համալիրների կողմից ներկաներին մատուցվում էին հայկական ազգային կերակուրներ:
Միջոցառմանը համերգային ծրագրով մասնակցում էր Հայաստանի հեռուստատեսության և ռադիոյի էստրադային-սիմֆոնիկ նվագախումբը, կոմպոզիտոր Երվանդ Երզնկյանի գլխավորությամբ:
«Տերյան մշակութային կենտրոնի» կողմից ներկայացվեց ազգային հագուստների ցուցադրում–բեմականացում: Միջոցառման ընթացքում տարբեր անվանակարգերում մրցանակներ շնորհվեցին «Մեգերյան կարպետ» ընկերության թանգարանին, ԼՂՀ գորգարվեստի թանգարանին, «Ղարաբաղ կարպետ» ընկերությանը, «Տերյան մշակութային կենտրոնին», «Կարին» ավանդական երգի պարի խմբին:

2014-07-11
Մանկապարտեզների հանդեսը` ամֆիթատրոնում
Հուլիս ամիսը հիշարժան է մեր մանկապարտեզ հաճախող փոքրիկների համար, հատկապես ավագ խմբերի, որոնք հրաժեշտ են տալիս մանկապարտեզին: Եվ պատահական չէ, որ քաղաքի մանկապարտեզները հատուկ խնամքով են նախապատրաստվում ավարտական հանդեսներին: Իսկ այս տարի այն ուղղակի վերածվեց մանկական տոնի, քանի որ քաղաքապետարանի նախաձեռնությամբ հանդեսներն անցկացվեցին ամֆիթատրոնում` մեկ միասնական ծրագրով: Տոնականորեն զարդարված ամֆիթատրոնը հուլիսի 10-ին ընդունեց իր փոքրիկ հյուրերին: Միջոցառումը բազմամարդ էր, հնչում էր տոնական երաժշտություն: Մանկապարտեզին հրաժեշտ տվող փոքրիկները հանդես եկան գեղեցիկ գեղարվեստական համարներով, հիանալիորեն ցուցադրելով իրենց ստացած գեղագիտական դաստիարակությունը:
Միջոցառմանը մասնակցում էին Դիլիջանի քաղաքապետ Արմեն Սանթրոսյանը, քաղաքապետարանի կրթամշակութային ոլորտի պատասխանատուներ, ծնողներ, լրատվամիջոցների ներկայացուցիչներ:
Փոքրիկներին հանձնվեցին նաև քաղաքապետարանի կողմից պատրաստված նվերները: Հավելենք, որ Դիլիջանում տարեց տարի ավելանում է մանկապարտեզ հաճախող երեխաների թիվը: Ընթացիկ տարում քաղաքի 6 մանկապարտեզներում ընդգրկված էին շուրջ 650 երեխաներ:

2014-07-01
Դիլիջանի քաղաքային համայնքի ղեկավարի հաշվետվությունը
Դիլիջան համայնքի 2014թ. բյուջեն մշակվել է` հիմք ունենալով համայնքի 2013-2016թթ. քառամյա զարգացման ծրագիրը:
2014թ. երկրորդ եռամսյակում տեղական մուտքերի արդյունավետ հավաքագրման շնորհիվ հավաքագրվել է 198000.0 հազ.դրամի եկամուտ, որը հնարավորություն է տալիս ավելի իրատեսորեն կանխագծելու առաջիկա անելիքները:
Քաղաքապետարանի ուշադրության կենտրոնում են սոցիալապեսան ապահով ընտանիքները:
Յուրաքանչյուր նորածին երեխաների համար 46 ընտանիքի տրվել է միանվագ դրամական օգնություն:
Դիլիջան քաղաքում գործող «Հույսի Կամուրջ» հասարակական կազմակերպություն հաճախող հաշմանդամ երեխաների ուսումնադաստիարակչական աշխատանքները առավել արդյունավետ կազմակերպելու և անցկացնելու համար համայնքի բյուջեից յուրաքանչյուր ամիս ցուցաբերվում է ֆինանսական աջակցություն:
Համայնքը փոխհատուցել է «Հույսի կամուրջ» հասարակական կազմակերպություն հաճախողթվով 23 երեխաների և նրանց ուղեկցող ծնողների տրանսպորտային ծախսերը:
Կազմակերպվել է հիշատակի արարողություն և ծաղկեպսակներ են դրվել Մեծ եղեռնի զոհերի հիշատակը հավերժացնող հուշարձան-խաչքարին: Մայիսի 9-ին` Հայրենական մեծ պատերազմում տարած հաղթանակի 69-րդ տարելիցի և Շուշիի ազատագրման 22-ամյակի կապակցությամբ կազմակերպվեց միջոցառում, հազարավոր դիլիջանցիներ իրենց հարգանքի տուրքը մատուցեցին զոհվածների հիշատակին: Հայրենական պատերազմի մասնակից վետերաններին տրամադրվեց դրամական օգնություն:
Հունիսի 1-ին Դիլիջան քաղաքում կազմակերպել է Երեխաների պաշտպանության օրվան նվիրված միջոցառում:
Դիլիջան քաղաքից 2014թ. ամառային զորակոչով ՀՀ Զինված ուժերում ծառայության մեկնող թվով 70 զորակոչիկների տրվել են նվերներ:
Դիլիջանի համայնքային ենթակայության նախադպրոցական հիմնարկների ավագ նախադպրոցական խմբեր հաճախող թվով 191 երեխաներ համար ձեռք է բերվել և տրվել նվերներ:
Շարունակվում է Երաժշտական դպրոցի հիմնանորոգման աշխատանքները, Կալինինի փողոցի բազմաբնակարան բնակելի շենքերի պատուհանների և դռների փոխման և Գետափնյա փողոցի բնակելի շենքերի շքամուտքերի նորոգման աշխատանքները:
Քաղաքի տարբեր հատվածներում կատարվել են համայնքային ենթակայության ճանապարհների փոսային նորոգման աշխատանքներ։ Կատարվել է Մանթաշյան փողոցի թիվ 1 տնից մինչև Սայաթ-Նովա փողոցի հատման երթևեկելի մասի և Կամոյի փողոցի թիվ 4 հասցեի տանը հարակից տարածքի ավտոտրանսպորտի երթևեկելի մասի բետոնացման և Սարալանջ թաղամասի ճանապարհի հիմնահատակի իրականացման աշխատանքներ։
Նորոգվել են Շահումյան 13, Գայի 31, Օրջոնիկիձե 81, Թբիլիսյան խճուղի 12, Հովսեփյան 79,
Գայի 76, Շամախյան 2 բ հասցեի բազմաբնակարան բնակելի շենքերի և թիվ 4 մանկապարտեզ ՀՈԱԿ-ի շենքի տանիքները։
Քաղաքապետարանը միջոցներ է ձեռնարկում իր ենթակայության ենթակառույցների նյութատեխնիակական բազայի ամրապնդման ուղղությամբ։
Մանկապատանեկան սպորտի մասսայականացման և առողջ ապրելակերպի արմատավորման նպատակով Դիլիջան քաղաքում կազմակերպել են դպրոցականների գարնանային մարզախաղեր։
Զգալի աշխատանքներ են իրակնացվել լուսավորության, աղբահանության և սանիտարական մաքրման բարելավման հանար։ Համայնքում իրականացվում են կանաչապատման և կանաչ տարածքների սպասարկման կազմակերպման աշխատանքներ։
Դիլիջանի քաղաքային զբոսայգին նոր սեզոնին նախապատրաստելու, ինչպես նաև բնակիչների ակտիվ հանգիստը առավել հարմարավետ և անվտանգ դարձնելու նպատակով իրականացվել է զբոսայգու խաղային ատրակցիոնների վերանորոգման աշխատանքներ:


2014-06-21
Աշխատանքային հանդիպում`«Համայնքների խոշորացումը երիտասարդների ընկալմամբ» թեմայով
Հունիսի 20-ին Դիլիջանի քաղաքապետարանում կայացավ աշխատանքային հանդիպում` «Համայնքների խոշորացումը երիտասարդների ընկալմամբ» թեմայով: Հանդիպմանը մասնակցում էին համայնքների խոշորացման պիլոտային ծրագրում ընդգրկված համայնքների և երիտասարդական հասարակական կազմակերպությունների ներկայացուցիչներ: Հանդիպման նպատակն էր համայնքների խոշորացման գործընթացի վերաբերյալ կառավարության դիրքորոշման իրազեկումը: Հանդիպմանը ներկա էին ՀՀ տարածքային կառավարման նախարարի առաջին տեղակալ Վաչե Տերտերյանը և Քաունթերփարթ ինթերնեշնլի հայաստանյան գրասենյակի գլխավոր ներկայացուցիչ Կարլ Հոֆստրան: Կառավարության դիրքորոշումը ներկայացրեց ՀՀ տարածքային կառավարման նախարարության տեղական ինքնակառավարման վարչության պետ Աշոտ Գիլոյանը: Համայնքների խոշորացման մոդելների վերաբերյալ պարզաբանումներ տվեց Քաունթերփարթ ինթերնեշնլի հայաստանյան գրասենյակի ինստիտուցիոնալ կարողությունների մասնագետ Արեգնազան Մարտիրոսյանը: Խնդրո առարկայի, ինչպես նաև գործընթացում երիտասարդության դերի վերաբերյալ ծավալվեց ակտիվ քննարկում, որի ընթացքում լրացուցիչ պարզաբանումներ տվեց և իր տեսակետներն արտահայտեց ՀՀ տարածքային կառավարման նախարարի առաջին տեղակալ Վաչե Տերտերյանը: Հանդիպման արդյունքներն ամփոփեց Քաունթերփարթ ինթերնեշլի հայաստանյան գրասենյակի ՏԻՄ ծրագրի ղեկավար Արթուր Դրամփյանը:

2014-06-17
Պարարվեստի փառատոն
Հունիսի 22-ին ժամը 14.00-ին Դիլիջանի բացօթյա ամֆիթատրոնում կկայանա պարարվեստի փառատոն` նվիրված Դիլիջանի հիմնադրման 470-ամյա հոբելյանին: Կմասնակցեն «Հայասի», «Արեգ», «Հաճն», «Էրիվան», «Շասսե» պարային համույթները և Դիլիջանի Հովհ. Շարամբեյանի անվան գեղարվեստի մանկական դպրոցի պարային ստուդիան:

2014-06-17
Հայտարարություն
2014թ. հունիսի 20-ին, ժամը 12:00-ն Տավուշի մարզի Դիլիջան քաղաքապետարանում տեղի կունենա «Հայհիդրոէներգանախագիծ» ՓԲԸ-ի կողմից փորձաքննության ներկայացված «Դիլիջան քաղաքի Մեծ- Թալա շրջանի թիվ 1 ցամաքուրդային թունելի ՊԿՕ+00-:-ՊԿ6+56 հատվածամասի վերակառուցման» շրջակա միջավայրի վրա ազդեցության վերաբերյալ հասարակական լսումներ:
Նախագծային փաստաթղթերին կարելի է ծանոթանալ ք. Երևան, Կոմիտաս 29 հասցեում կամ Դիլիջանի քաղաքապետարանում: Հեռ. 22-02-18, 22-15-68, 22-14-85:


2014-06-02
Նշվեց Երեխաների պաշտպանության միջազգային օրը
Հունիսի 1-ը` մեր փոքրիկները կհիշեն վառ հիշողություններով, քանի որ հոգ էր տարվել օրվան նվիրված միջոցառումները հետաքրքիր և առավել մասսայական անցկացման ուղղությամբ:

Միջոցառումըմեկնարկեց քաղաքային հրապարակում`ժամը 11:00-ին:Այնհագեցածէր երգուպարով, խաղերով, երեխաները զբաղվում էին կավճանկարչությամբ և այլ նկարներ նկարելով:

Տոնի առթիվ ներկաներին ողջունեց և հաճելի ժամանց մաղթեց Դիլիջանի փոխքաղաքապետ Արմեն Մակարյանը: Իր շնորհավորական խոսքում փոխքաղաքապետը անդրադարձավ նաև քաղաքապետարանի կողմից մանկական հիմնարկներին ցուցաբերվող ամենօրյա ուշադրությանը և մեր քաղաքի գործընթացներում, առավել ևս կրթական ոլորտի միջոցառումներին և ծրագրերին Դիլիջանի միջազգային դպրոցի կողմից ցուցաբերվող ակտիվ աջակցությանը:

Ներկաներին ողջունեց և բարի մաղթանքներ հղեց նաև Դիլիջանի զարգացման հիմնադրամի տնօրեն Արթուր Հակոբյանը:

Հիմնադրամը հանդես էր եկել նաև բարեգործական ակցիայով` ողջ միջոցառման ընթացքում անվճար պաղպաղակներ բաժանելով փոքրիկներին:

Միջոցառման հաջորդ հարթակը քաղաքային ամֆիթատրոնն էր, որտեղ փոքրիկների ուժերով կայացավ տոնական համերգ:

Ելույթ ունեցան քաղաքի թ. 1, թ. 2, թ. 3 մանկապարտեզների երեխաները, «Հույսի կամուրջ» ՀԿ-ի սաները, գեղարվեստի դպրոցի պարի և երաժշտական դպրոցի ժողգործիքների խմբերը:

Հանդիսավոր պայմաններում կատարվեց նաև շնորհակալագրերի և հուշանվերների հանձնման արարողություն: 2013 թվականին ունեցած ձեռքբերումների համար պարգևատրված աշակերտներին և խմբերին պարգևները հանձնեց քաղաքապետարանի աշխատակազմի քարտուղար Արա Մարտիրոսյանը:

Միջոցառումը շարունակվեց քաղաքային զբոսայգում, որտեղ փոքրիկներին սպասվում էր հաճելի ժամանցը:

Տոնի կապակցությամբ քաղաքապետ Արմեն Սանթրոսյանի հովանավորությամբ զբոսայգին սպասարկվում էր անվճար:

2014-05-19
Մանուկների տոն` միջազգային
Մայիսի 18-ին Դիլիջանի միջազգային դպրոցը հանդես եկավ հերթական հետաքրքիր նախաձեռնությամբ: Քաղաքի դպրոցների ստեղծագործող երեխաների համար կազմակերպվեց մանուկների տոն:

Այս անգամ նախաձեռնության հեղինակները միջազգային դպրոցի շինարարությունն իրականացնող ՌԴ «Քոնսթրաքշն Մենեջմենթ Արմենիա» ընկերությունն էր և «Իդեա» ֆոնդը:

Ծրագիրը հարուստ էր և բազմազան: Այն ներառում էր խաղեր, պարերի ուսուցում, երգի և ասմունքի կատարումներ, իսկ ամենաուշագրավ հատվածը թերևս «Երազանքների տուն» խորագրով մանուկների նկարչական աշխատանքների մրցույթն էր:

Միջոցառման համար հատկացված նորակառույց սրահներում հնչում էր երաժշտություն, փոքրիկները իրենց վառ երևակայությամբ նկարում էին, յուրաքանչյուրը փորձելով պատկերել իր երազանքների տունը:

Ընդհանուր խանդավառության մթնոլորտում ժյուրին ամփոփեց երեխաների աշխատանքները:

Գեղանկարների մրցույթում առաջին, երկրորդ և երրորդ տեղերը գրաված Վահե Ասատրյանին, Զինա Դանիելյանին և Գոռ Հակոբյանին մրցանակները և խրախուսական նվերները հանձնեցին միջազգային դպրոցի ծրագրի տնօրեն Դմիտրի Լետովը, ընկերության և «Իդեա» ֆոնդի պատասխանատուները:

Տարբեր անվանակարգերում հաղթող ճանաչված երեխաները նույնպես արժանացան խրախուսական նվերների:

Նվերները շատ բազամզան էին` սկսած նոթբուքից, պլանշետից, բջջային հեռախոսից մինչև խաղալիքներ:

Վերջում փոքրիկներին սպասում էր քաղցրավենիքներով և անուշեղենով սեղանը:


2014-04-25
Հարգանքի տուրք` Հայոց մեծ եղեռնի զոհերի հիշատակին
Ապրիլի 24-ին Հայոց մեծ եղեռնի 99- ամյա տարելիցի կապակցությամբ հարյուրավոր դիլիջանցիներ հուշարձանային համալիրում հարգանքի տուրք մատուցեցին 1915 թ. Օսմանյան կայսրությունում կազմակերպած ցեղասպանությանը զոհ դարձած մեկուկես միլիոն հայ անմեղ զոհերի հիշատակին:

Արարողությանը մասնակցում էին Դիլիջանի քաղաքապետ Արմեն Սանթրոսյանը, համայնքի ավագանու անդամներ, քաղաքապետարանի պատասխանատու աշխատակիցներ, զինվորականներ, կրթամշակութային հաստատությունների կոլեկտիվներ, հասարակական կազմակերպությունների և լրատվամիջոցների ներկայացուցիչներ:

Ծաղիկներ և ծաղկեպսակներ դրվեցին Հայոց մեծ եղեռնի զոհերի հիշատակը հավերժացնող հուշարձան- խաչքարին:

Հիշատակի արարողությանը ոգեկոչման կարգ կատարեց Հաղարծնի վանահայր` տեր Արիստակես վարդապետ Այվազյանը:


2014-04-18
«Մեկնարկեց «Դիլիջանի զարգացման հիմնադրամը»
Ապրիլի 17-ին քաղաքապետարանի նիստերի դահլիճում կազմակերպվեց
UWC Դիլիջան քոլեջի և Դիլիջանի զարգացման հիմնադրամի գործունեության մեկնարկի շնորհանդեսը:
Ներկաներին ջերմորեն ողջունեց և արգասաբեր գործունեություն մաղթեց Դիլիջանի քաղաքապետ Արմեն Սանթրոսյանը:
Իր ելույթում քաղաքապետը նշեց, թե ինչպիսի մեծ ազդեցություն է ունենալու միջազգային դպրոցը քաղաքի , կրթամշակութային և սոցիալ- տնտեսական տարբեր ոլորտների զարգացման գործում և հույս հայտնեց, որ ՙԴիլիջանի զարգացման հիմնադրամի» գործունեությունը մեծապես նպաստելու է քաղաքի զարգացման խնդիրների արագ և համակարգված լուծմանը:
«Դիլիջանի զարգացման հիմնադրամի» նպատակների և խնդիրների համառոտ ներկայացմամբ հանդես եկավ միջազգային դպրոցի համահիմնադիր Վերոնիկա Զոնաբենդը:
Հիմնադրամի ծրագրերը ըստ ոլորտների ներկայացրեց հիմնադրամի տնօրեն Արթուր Հակոբյանը:
Շնորհանդեսին անդրադարձ եղավ նաև միջազգային դպրոցի կոնցեպցիայի և քաղաքի հետ ինտեգրման հարցերին, որոնց վերաբերյալ հանգամանալից ելույթ ունեցավ դպրոցի հիմնադիր տնօրեն Ջոն Փադըֆութը:
Միջոցառմանը մասնակցում էին քաղաքի կրթամշակութային հիմնարկությունների աշխատակիցներ, արվեստագետներ, հասարակական կազմակերպությունների և լրատվամիջոցների ներկայացուցիչներ:
Շնորհանդեսին մասնակցում էր և ելույթ ունեցավ Տավուշի մարզպետ Արմեն Ղուլարյանը:

2014-04-16
Մասնագիտությունների օր Դիլիջանում 2014
ՄԱՍՆԱԳԻՏՈՒԹՅՈՒՆՆԵՐԻ ՕՐ ԴԻԼԻՋԱՆՈՒՄ 2014
Վայրը՝ Դիլիջան քաղաքի ՀՀ ԿԲ «Գիտելիք հանուն զարգացման» կենտրոնի 2-րդ հարկի սրահ (նախկին գրադարանի շենք)
Հարգելի՛ աշակերտներ, ծնողներ, մանկավարժներ,
Եթե դպրոցական եք, մտածում եք՝ ինչ մասնագիտություն ընտրել, եթե ծնող եք կամ ուսուցիչ, մտահոգված եք Ձեր երեխայի կամ աշակերտի մասնագիտության ընտրության հարցերով, չգիտեք ինչպես օգնել նրան՝ չիտակցված կատարելու իր ապագայի հետ կապված այս կարևոր որոշումը, ապա այս նախաձեռնությունը Ձեզ համար է․
այցելե՛ք «Մասնագիտություններ օր Դիլիջանում» միջոցառմանը։
Այստեղ Ձեզ խորհրդատվություն կտան մասնագետները, կստանաք
տեղեկատվություն Երևանի Վ․ Բրյուսովի անվան պետական լեզվաբանական համալսարանի բակալավրական և մագիստրոսական ծրագրերի մասին՝ խնայելով Ձեր ժամանակը և միջոցները։
Սիրով սպասում ենք
Երևանի Վ․ Բրյուսովի անվան պետական լեզվաբանական համալսարան
Մասնագիտական կողմնորոշման մեթոդական կենտրոն ՊՈԱԿ

2014-04-11
ՀԱՅՏԱՐԱՐՈՒԹՅՈՒՆ
2014թ. մարտի 10-ից մինչև ապրիլի 18-ը ԱՍԲԱ հիմնադրամը հայտարարում է Դիլիջան Բնակարանային Համալիրում վարձակալությամբ բնակվող ցանկացողների դիմում-հայտերի ընդունում:
Դիմում հայտերի լրացման համար Դիլիջանի Բնակարանային Ռեգիստրում (http://www.base.asba.am) գրանցումը պարտադիր է:
Դիմում-հայտի ձևաթուղթը կարող եք ներբեռնել Դիլիջանի Բնակարանային Ռեգիստրի կայքից, իսկ լրացված դիմումները կարող եք հանձնել Դիլիջանի քաղաքապետարանում (համապատասխան բաժին) մինչև 2014թ. ապրիլի 18-ը ներառյալ:
Հարցերի դեպքում դիմել ԱՍԲԱ հիմնադրամին հետևյալ հեռախոսահամարներով`
(010)58-16-04, (095) 15 - 17-19

2014-04-03
01.01.2014թ. – 01.04.2014թ. ընկած ժամանկահատվածում քաղաքապետարանի կատարած աշխատանքները
Դիլիջան համայնքի 2014թ. բյուջեն մշակվել է` հիմք ունենալով համայնքի 2013-2016թթ. քառամյա զարգացման ծրագիրը:
2014թ. առաջին եռամսյակում տեղական մուտքերի արդյունավետ հավաքագրման շնորհիվ հավաքագրվել է 103000.0 հազ.դրամի եկամուտ։ Հաշվետու ժամանակաշրջանում եկամուտների հավաքագրումը կազմել է 119 տոկոս, ինչը հնարավորություն է տալիս համայնքում իրականացնել մեծածավալ աշխատանքներ:
Քաղաքապետարանի ուշադրության կենտրոնում են սոցիալապես անապահով ընտանիքները: 12 անապահով ընտանիքների տրվել է դրամական օգնություն:
Յուրաքանչյուր նորածին երեխաների համար 15 ընտանիքի տրվել է միանվագ դրամական օգնություն:
Դիլիջան քաղաքում գործող «Հույսի Կամուրջ» հասարակական կազմակերպություն հաճախող հաշմանդամ երեխաների ուսումնադաստիարակչական աշխատանքները առավել արդյունավետ կազմակերպելու և անցկացնելու համար համայնքի բյուջեից յուրաքանչյուր ամիս ցուցաբերվում է ֆինանսական աջակցություն:
Հայրենական մեծ պատերազմի կին մասնակիցներին մարտի 8-ի կապակցությամբ տրամադրվել է դրամական օգնություն:
Շարունակվում է Երաժշտականա դպրոցի վերանորոգման աշխատանքները։ Սկսվել են Կալինինի փողոցի բազմաբնակարան բնակելի շենքերի պատուհանների և դռների փոխման և Գետափնյա փողոցի բնակելի շենքերի շքամուտքերի նորոգման աշխատանքները:
Իրականացվում է Մյասնիկյան փողոցի 1-ին նրբանցքից դեպի գերեզմանատուն տանող ճանապարհի բարեկարգման և հենապատի կառուցման աշխատանքները։
Քաղաքապետարանը միջոցներ է ձեռնարկում իր ենթակայության ենթակառույցների նյութատեխնիակական բազայի ամրապնդման ուղղությամբ:
Զգալի աշխատանքներ են իրակնացվել լուսավորության, աղբահանության և սանիտարական մաքրման բարելավման հանար։ Համայնքի աղբահանության աշխատանքները առողջարանային քաղաքին վայել կազմակերպեու նպատակով ձեռք են բերվել 2 աղբահավաք և 1 ինքնաթափ մեքենա: Պատվիրվել են 40 կենցաղային աղբամանների պատրաստման աշխատանքներ, որից 20 արդեն ձեռք են բերվել և տեղադրվել քաղաքի տարբեր հատվածներում։

2014-03-28
Հանդիպում հայ գրողների հետ
Մարտի 27-ին Հայաստանի գրողների միության կողմից անցկացվող «Մանկապատանեկան գրքի շաբաթի» հերթական հանգրվանը Դիլիջանն էր:
Գրողներին և մանկական պարբերականների խմբագիրներին` որոնց գլխավորում էր Հայաստանի գրողների միության նախագահ Էդվարդ Միլիտոնյանը, ընդունեց Դիլիջանի քաղաքապետ Արմեն Սանթրոսյանը: Նա ողջունելով ներկաներին, համառոտակի ծանոթացրեց քաղաքում իրականացվող խոշոր ծրագրերի ընթացքին: Հյուրերին հատկապես հետաքրքրում էր միջազգային դպրոցի հետ կապաված քաղաքաի հետագա զարգացման հեռանկարները:
Անդրադարձ եղավ նաև քաղաքի մշակութային անցյալին : Քաղաքապետը և հյուրերը հույս հայտնեցին, որ հաճախակի շփումների միջոցով կարելի է վերականգնել և ավելի զարգացնել քաղաքի մշակութային նախկին ավանդույթները:
Այնուհետև հյուրերը այցելեցին ավագ դպրոց, ուր կայացավ ջերմ հանդիպում դպրոցականների հետ: Դպրոցականները սիրով ունկնդրեցին սիրված մանկագիրների ստեղծագործությունները` հենց հեղինակների ընթերցմամբ:
Հանդիպման ընթացքում հայ գրողների կողմից մեծարանքի խոսքեր հնչեցին նաև հայ անվանի գրող Վախթանգ Անանյանի հասցեին: Ներկա էր նաև գրողին նվիրված աշխատությունների հեղինակ Լյուդվիգ Կարապետյանը:
Հանդիպման վերջում հեղինակները գրքեր նվիրեցին դպրոցի աշակերտներին և ուսուցիչներին:


2014-03-19
Հակասողանքային ծրագիրը գործողության մեջ
Հակասողանքային միջոցառումները կենսական նշանակություն ունեն մեր քաղաքի համար, առավել ևս ներկա փուլում, երբ իրականացվում են խոշորամասշտաբ ծրագրեր:
Ակտիվ շինարարական փուլում են գտնվում «Արփա- Սևանշին» ԲԲԸ կողմից իրականացվող թունելախորշերի մաքրման և պատերի ամրացման աշխատանքները: Ինչպես տեղեկացանք ընկերության թունելային տեղամասի պետ Համլետ Մովսիսյանից, աշխատանքներն ընթանում են նախագծին համապատասխան և բարձր որակով: Աշխատանքներում ընդգրկված են շուրջ 100 թունելագործներ, որոնց մի մասը տեղացի կադրեր են: Աշխատանքներն ընթանում են առանց ընդհատման` 4 հերթափոխով:

2-րդ ուղեգծի շինարարությունը սկսվել է 2013թ-ին: Ընդհանուր երկարությունը կազմում է 673 գծամետր: Ներկա դրությամբ արդեն կառուցվել է 560 –ը: Այս հատվածում աշխատանքները կավարտվեն ամռանը:

Այժմ ընթանում են դրենաժային անցքերի հորատման, լցամղման, մակերևութային հորատանցքերի փորման աշխատանքներ:

Դիլիջանի սողանքային երևույթների ուսումնասիրությունը սկսվել է դեռևս 20-րդ դարասկզբին:

1937-38 թթ, ռուս գիտնական Դեմոխինը իր հետազոտության մեջ կոնկրետ նշել է շինարարության համար առավել նպաստավոր ոչ սողանքային հատվածները:

Առողջարանային ոլորտի ընդլայնման նպատակով 1971թ. ՀԽՍՀ Մինիստրների Խորհրդի կողմից առաջադրանք է տրվել ՀԳԱ Երկրաբանական ինստիտուտին, Հայկ ԽՍՀ Երկրաբանական վարչությանը և Հիդրոնախագիծ ինստիտուտին, կատարել անհրաժեշտ հետազոտություններ Մեծ Թալա հատվածում սահքի երևույթի վերաբերյալ և միջոցներ ձեռնարկել դրանք լիկվիդացնելու համար:

Մեծ Թալա հատվածը, ըստ հետազոտությունների, գտնվում է սահող մարմնի վրա, իսկ ռելեֆը բարդ է և ծածկված անտառներով:

Սողանքային հատվածը տեղակայված է Աղստև և Գոլովինկա գետերի աջափնյա լանջերի միջև:

1970-80-ականների ուսումնասիրությունները պարզել են, որ սահանքի հիմնական պատճառը գրունտների գերխոնավ և ջրհագեցած լինելն է և խնդիր է դրվել ցամաքուրդային համակարգի միջոցով կատարել ջրազրկում:

80-ական թվականներին սկսված թիվ 1 և թիվ 2 ուղեգծերի շինարարությունը (որոնց ընդհանուր երկարությունը կազմում է 2160 մետր) ժամանակին լիովին չի ավարտվել, իսկ 90-ականներից թունելախորշերը դադարել են գործելուց և միայն 2011թ. հատուկ նախագծով սկսվեցին վերականգնման աշխատանքները:

Նաատեսվում է թիվ1 և թիվ 2 ուղեգծերի թունելների միացման միջոցով ստեղծել հուսալի դրենաժային համակարգ, որը լավագույն երաշխիքն է լինելու քաղաքի կենտրոնական հատվածի հակասողանքային ծրագրի իրագործման գործում:


2014-03-07
Դիլիջանի քաղաքապետ Արմեն Սանթրոսյանի շնորհավորական ուղերձը Կանանց միջազգային օրվա` Մարտի 8-ի առթիվ
Սիրելի մայրեր, կանայք, քույրեր…
Քաղաքապետարանի աշխատակազմի, համայնքի ավագանու և անձամբ իմ կողմից սրտանց շնորհավորում եմ բոլորիդ գարնանային այս գեղեցիկ տոնի` Մարտի 8-ի առթիվ, մաղթում եմ ձեզ անձնական երջանկություն և հետագա հաջողություններ ձեր իղձերի և նպատակների իրականացման գործում:
Մարտի 8-ը նաև լավ առիթ է կրկին մեր երեխտագիտությունն արտահայտելու մեր մայրերին, կանանց, որոնց դերը անգնահատելի է հայ ընտանիքի ամրության և մեր ազգային ավանդույթների պահպանման ու հաջորդ սերունդներին փոխանցման գործում:
Մենք քաջ գիտակցում ենք, այն սոցիալ- տնտեսական դժվարությունները, որոնց առկայության պայմաններում ավելի է դժվարանում ընտանիքի կարիքները հոգալու հայ կնոջ գործը և աշխատում ենք անել ամեն հնարավորը մեր ազգաբնակչության վիճակը բարելավելու ուղղությամբ:
Չկա մոր համար ավելի մեծ արժեք, քան իր զավակներին կրթելը, դաստիարակելը, նրանց ապագայի նկատմամբ վստահություն ունենալը:
Ուրախ եմ հավաստելու, որ մենք ապրելու ենք ավելի լավ Դիլիջանում: Սրանք լոկ լավատեսական ցանկություններ չեն, այլ պայմանավորված են մեր քաղաքի ներկա առաջընթացով:
Այս տարի սեպտեմբերին աշխարհի մի քանի տասնյակ երկրներից ժամանած 90 սովորողների առջև իր հյուըընկալ դռները կբացի միջազգային դպրոցը, որը մեծ հռչակ է բերելու ողջ Հայաստանին, նրան նորովի ներկայացնելով աշխարհի կրթական ոլորտում:
Մեր շնորհալի զավակները կարող են միջազգային չափանիշներով կրթություն ստանալ հարազատ քաղաքում: Գնալով ընդլայնվում են մեր պատանիների ու աղջիկների կրթական հնարավորությունները, ստեղծվում են նրանց ստեղծագործական կարողությունների զարգացման համար նոր կենտրոններ:
Արդեն իսկ ՙԳիտելիք հանուն զարգացման» կենտրոնը դարձել է մեր դպրոցականների ամենասիրած օջախներից մեկը;
Իր ակտիվ գործունեությունն է ծավալել ՙԱյբ» կրթական հիմնադրամը, որի միջոցներով ստեղծված Կենտրոնական դպրոցն ընդլայնվելով, էլ ավելի մեծ հնարավորություններ կստեղծի մեր կրթական համակարգի համար:
Արդեն գործում է` ՀՀ Կենտրոնական բանկի ուսումնահետազոտական կենտրոնը, քաղաքում շարունակվում են ավելի ակտիվանալ ֆինանսաբանկային գործընթացները:
Մեզ մոտ իրականացվող խոշորամասշտաբ ծրագրերը բացի իրենց նշանակությունից, տևական ժամանակով հազարավոր աշխատատեղեր են ստեղծում մեր համաքաղաքացիների համար, իսկ արդեն գործող հիմնարկություններում մասնագիտական աշխատանքով ապահովվում են մեր շատ երիտասարդ կադրեր:
Առաջընթացն ակնառու է նաև առողջապահության ոլորտում: Արդեն մեկ տարուց ավելի է քաղաքում գործում է մարզային նշանակության, ամենաժամանակակից սարքավորումներով կահավորված ՙՏավուշ» ախտորոշիչ կենտրոնը: Միջոցներ են ձեռնարկվում ՙԴիլիջան» բժշկական կենտրոնի նյութատեխնիկական բազայի արդիականացման և, սպասարկման որակի բարելավման ուղղությամբ:
Սիրելի կանայք, հուսով եմ, որ ինչպես միշտ, մեր քաղաքի զարգացման այս կարևոր փուլում ևս դուք կունենաք ձեր արժանի ներդրումը:
Կրկին շնորահովորում եմ բոլորիդ, մաղթում նորանոր հաջողություններ:

2014-02-26
Քաղաքի շինարարական ռիթմը
Վերջին տարիներին քաղաքում իրականացվող մեծամասշտաբ ծրագրերի պայմաններում Դիլիջանը դարձել է մի մեծ շինհրապարակ: Օրերս այցելեցինք Շամախյան թաղամաս` տեղում ծանոթանալու այստեղ իրականացվող աշխատանքներին: Թաղամասը նորովի է ներկայանում այցելուներին` իր ժամանակակից քաղաքաշինական տեսքով` կանոնավոր կերպով բարեկարգված փողոցներով և մայթերով, ճարտարապետական ամբողջական լուծումներով կառուցված հատվածներով: Նախորդ 2 տարիներին այստեղ կառուցվել են 150 երկհարկանի գեղեցիկ քոթեջներ` փակ լողավազանով, սպորտային մասնաշենքով, սրճարաններով, հանրախանութով և այլ օժանդակ շինություններով: Ներկայումս իրականացվում են բարեկարգման աշխատանքներ: Աշխատանքներն իրականացնում է իտալական «Ռենկո ԱրմԷստեյտ» ընկերությունը, որում մեծ թիվ են կազմում տեղացի շինարարները: Վ. Անանյանի անվան թիվ 5 դպրոցի հարևանությամբ «Այբ» կրթական հիմնադրամի միջոցներով կառուցվում է կրթական համալիր, որտեղ տեղափոխվելու է ժամանակավորապես ՀՀ Կենտրոնական բանկի ուսումնամեթոդական կենտրոնում իր ուսումնական պարապմունքներն անցկացնող Կենտրոնական դպրոցը:: Թաղամասի մեկ այլ հատվածում ընթանում է ԱՍԲԱ –ի` մատչելի բնակարանաշինության ծրագրով իրականացվող շինարարությունը: Առաջին փուլը նախատեսվում է ավարտել 2015-ին, սակայն արդեն 2014- ընթացքում մի քանի տասնյակ ընտանիքներ կարող են ապահովվել մատչելի բնակարաններով: Զարգացման Եվրոպական Բանկի և ՀՀ կառավարության հետ համատեղ «Հայաստանի փոքր համայնքների ջրային ծրագրի» շրջանակներում մեկնարկել է Շամախյան թաղամասի ողջ ջրամատակարարման համակարգի վերակառուցման աշխատանքները: Կառուցվում է նոր պոմպակայան, ջրամբարներ: Ծրագրի շրջանակներում մասնակիորեն փոխվում են նաև որոշ կոյուղագծեր: Դիլիջանի քաղաքապետարանի կողմից հետևողական աշխատանք է տարվում ոչ միայն տեղացի շինարարներին լայնորեն աշխատանքներում ընդգրկելու ուղղությամբ, այլև այդ օբյեկտների գործարկվելուց հետո ֆունկցիոնալ առումով ազգաբնակչության ակտիվ ներգրավման, հատկապես երիտասարդ մասնագետ կադրերին հիմնական աշխատանքով ապահովելու համար:

2014-02-01
Շարունակվում է ընդունելությունը «UWC Դիլիջան» միջազգային դպրոց եւ UWC քոլեջների ցանց
Շարունակվում է ընդունելությունը «UWC Դիլիջան» միջազգային դպրոց եւ UWC քոլեջների ցանց` 2014-2016թթ. համար: 2014 թ. սեպտեմբերին «UWC Դիլիջան» միջազգային դպրոցը իր դռները կբացի առաջին 90 աշակերտների առջեւ: Այս տարի UWC համակարգում կարող են ուսանել Հայաստանի 17 քաղաքացիներ` 10-ը «UWC Dilijan միջազգային դպրոցում» եւ 7-ը` UWC-ի այլ երկրների քոլեջներում: «UWC Dilijan» միջազգային դպրոցում եւ UWC այլ դպրոցներում սովորելու հայտ կարող են ներկայացնել Հայաստանի Հանրապետության բոլոր այն քաղաքացիները, որոնք 2014թ. օգոստոսի վերջի դրությամբ կլինեն 16 տարեկան, բայց ոչ ավելին, քան 18 տարեկան: Բոլոր ցանկացողները կարող են հայտադիմումը լրացնել www.am.uwc.org կայքի միջոցով: Հայտեր ներկայացնելու վերջնաժամկետը լրանում է 2014թ. փետրվարի 17-ին: 2014թ. մարտին իրականացվելու է դիմորդների ընտրության գործընթացը: Քանի որ դասավանդումը դպրոցում լինելու է անգլերեն լեզվով, դիմորդները պետք է բավարար չափով տիրապետեն անգլերեն լեզվին: Ընդունելության հայտում աշակերտները հնարավորություն ունեն հերթականությամբ նշել UWC այն դպրոցների ցանկը, որտեղ ցանկանում են սովորել։ Ընդունելությունը կազմակերպվում է անկախ մարմնի` UWC-ի Հայաստանի ազգային կոմիտեի կողմից: Կոմիտեն կազմավորվում է UWC-ի կողմից, դրանում ընդգրկվում են նաեւ UWC դպրոցների շրջանավարտներ: Ընդունելության մասին վերջնական որոշումը կայացվում է «UWC Dilijan» միջազգային դպրոցի կողմից` UWC-ի Հայաստանի ազգային կոմիտեի ներկայացրած առաջարկությունների հիման վրա: Ընտրությունը UWC-ի դպրոցներում կատարվում է բացառապես մրցակցային հիմունքներով, եւ առավելությունը տրվում է տաղանդավոր ու սոցիալապես ակտիվ երիտասարդներին՝ անկախ նրանից, թե ի՞նչ ծագում ունեն: Ընտրության այդպիսի համակարգը թեկնածուներին ընձեռում է հավասար հնարավորություններ՝ անկախ նրանց ազգությունից, դավանանքից, լեզվից ու ծնողների ֆինանսական կարողությունից, եւ թույլ է տալիս մեկ վայրում հավաքել հետաքրքիր, ոչ ստանդարտ մտածելակերպ ունեցող, սոցիալապես ակտիվ եւ ստեղծագործ մարդկանց, որոնք ներկայացնում են տարբեր մշակույթներ: UWC համակարգում դասավանդվում է Միջազգային Բակալավրիատի (IB) դիպլոմա ծրագիրը, որն հետագայում աշակերտներին հնարավորություն կընձեռի ուսումը շարունակել աշխարհի առաջատար համալսարաններում: «UWC Dilijan» միջազգային դպրոցում սովորելու մեկ տարվա արժեքը կկազմի մոտ $30 հազար, սակայն աշակերտների 90%-ը դպրոցում սովորելու է անվճար` բարերարների կողմից հատկացված կրթաթոշակների շնորհիվ: UWC համակարգի տարբեր դպրոցներ առաջարկում են ուսման տարբեր պայմաններ: Օրինակ, Սինգապուրի UWC դպրոցը պատրաստ է մեկ տեղ հատկացնել հայաստանցի դիմորդի համար եւ ապահովում է նրա ուսման հետ կապված բոլոր ծախսերը: Կլինեն դեպքեր, երբ UWC դպրոցները տեղեր կտրամադրեն առանց կրթաթոշակի եւ այդ դեպքում դիմորդը ինքնուրույն պետք է հոգա այդ ծախսը: Բացառիկ տաղանդավոր երեխաների դեպքում «UWC Dilijan» միջազգային դպրոցի հիմնադիրները կարող են միանալ հովանավորներ ներգրավելու գործին:


www.Lragir.am

2014-01-09
ՀՀ քաղաքներում հիմնական խնդիրն աշխատատեղերն են. քաղաքապետներ
Հայաստանի մի քանի քաղաքների քաղաքապետներ, Tert.am-ի հետ զրույցում ամփոփելով 2013 թվականը և խոսելով 2014 թվականից իրենց սպասելիքների մասին, ասում են, որ հիմնական խնդիրը համարում են աշխատատեղերի հարցը, իսկ 2014 թվականից բավական մեծ ակնկալիքներ ունեն:

Չարենցավանի քաղաքապետ Հակոբ Շահգալդյանն ասաց, որ 2013 թվականին քաղաքի բյուջեն կատարել են 100 տոկոսով՝ և՛ բյուջետային, և՛ ծախսային մասով: Աշխատավարձերի պարտքեր չունեն:

«Կան ձեռքբերումներ, սոցներդրումներ հիմնադրամով մանկապարտեզներ նորոգեցինք, ասֆալտապատ ճանապարհների, տանիքների հիմնանորոգում եղավ»,-ասաց Հակոբ Շահգալդյանը:

Ըստ քաղաքապետի՝ հետընթացն այն է, որ բնակիչների սոցիալական վիճակը վատ է, աշխատատեղերի խնդիր կա. «Այս տարի այստեղ բացվեց մեկ հզոր գործարան «Ասկե գրուպը», որը մոտ 300 աշխատատեղ ապահովեց բարձր աշխատավարձով, բայց մեր քաղաքն արտադրության հիմքի վրա դրված քաղաք է, ուրիշ զբաղմունք չկա այստեղ: Սեփական տներ չկան, հողամասեր չկան, որպեսզի բնակիչները գյուղատնտեսությամբ զբաղվեն»։

Չարենցավանի քաղաքապետը նաև նշեց, որ դրանից ելնելով էլ իրենց բնակիչների սոցիալական վիճակը մի քիչ վատ է, և ստիպված՝ գնում են արտագնա աշխատանքի:

Հարցին, թե հնարավո՞ր է, որ մոտ ապագայում էլի գործարաններ բացվեն Չարենցավանում, Հակոբ Շահգալդյանը պատասխանեց, որ արտասահմանից ներդրողներ կան և ջերմոցային տնտեսություն են ուզում կառուցել, որտեղ մոտ 100 մարդ կաշխատի:


«Ցանկանում եմ, որ 2014 թվականը մեր ժողովրդի համար լավագույն տարիներից մեկը լինի, գոնե ժողովրդի սոցիալական խնդիրները լուծվեն: Ինձ թվում է, որ 2014-ը բեկումնային տարի է լինելու մեր ժողովրդի համար»,- եզրափակեց Հակոբ Շահգալդյանը:

Սպիտակի քաղաքապետ Գագիկ Սահակյանն ասաց, թե իր ղեկավարած քաղաքում անելիքները շատ են, ինչպես մյուս քաղաքներում: Բայց ամենակարևոր խնդիրներից մեկը, որի լուծումն ընթացքի մեջ է, թռչնաբուծական ֆաբրիկայի կառուցումն է, որը 250 աշխատատեղ կստեղծի բնակիչների համար:

«Մենք ծրագրել էինք քաղաքի վարպետների համար արհեստանոց ստեղծել, արհեստները ֆինանսավորել, բայց այն մի փոքր ուշացավ, սակայն չձախողվեց, հետաձգվեց մինչև մայիս ամիս»,- ասաց Գագիկ Սահակյանը՝ հավելելով, թե շատ մեծ ակնկալիքներ ունեն 2014 թվականից՝ նախևառաջ հույսները դնելով իրենց քաղաքի բյուջեի վրա:


Սպիտակի քաղաքապետն ասաց նաև, որ Մաքսային միության հետ էլ են որոշ հույսեր կապում:


«Համոզված եմ, որ եթե Ռուսաստանի հետ ազատ մաքսային ելումուտ ունենանք, բնական է, որ ներմուծվող շատուշատ ապրանքներ առնվազն 20%-ով կէժանանան: Դա արդեն լավ է բոլորիս համար: Կարծում եմ, որ արտագնա աշխատանքի մեկնողներն առանց արգելքի կմեկնեն: Եթե ազատ տնտեսական գոտի լինի, եթե Ռուսաստանում աշխատանք կա, ապա այդ աշխատանքը կտեղափոխվի նաև Հայաստան»,– ասաց նա:


Գագիկ Սահակյանն ասաց, թե շատ լավատեսորեն է տրամադրված, որ Մաքսային միությունը միայն դրական արդյունք կունենա բոլորիս համար:

Դիլիջանի քաղաքապետ Արմեն Սանթրոսյանը որպես ձեռքբերում նշեց այն, որ Կենտրոնական բանկն իր հիմնական ծրագիրն արդեն ավարտել է, մեծ քանակությամբ աշխատատեղեր են բացվել քաղաքում:

«Միջազգային դպրոցը ևս շատ լավ, ծավալուն աշխատանքներ է իրականացնում: Պետեկամուտների կոմիտեն նույնպես շարունակում է իր գործունեությունը, ներդրումներ են կատարվում քաղաքում: Ջրագծերի և կոյուղագծերի կառուցումը ևս խոշոր ձեռքբերում եմ համարում, ծրագիրն արդեն մեկնարկել է, վատ եղանակային պայմանների պատճառով աշխատանքներն այս պահին դադարեցվել են, գարնանը նույն տեմպերով կշարունակվեն»,- ասաց Դիլիջանի քաղաքապետը:


Արմեն Սանթրոսյանի խոսքով՝ քաղաքային տրանսպորտի և աղբահանության հարցն է մնում քաղաքի խնդիրների ցանկում. «Մանավանդ՝ ամռան ամիսների ընթացքում մեծ քանակությամբ աղբ է կուտակվում, որովհետև զբոսաշրջիկների այցով պայմանավորված՝ այդ ամիսներին բնակչության թիվը կրկնապատկվում է, և մեծ խնդիր ունենք այդ առումով: Հուսով եմ, որ այս տարվա ընթացքում և՛ աղբատար մեքենաների ձեռքբերման, և՛ տրանսպորտի հարցը կկարողանանք կարգավորել»,- ասաց նա։Դիլիջանի քաղաքապետը համոզմունք հայտնեց, որ 2014 թվականը քաղաքի համար բեկումնային տարի է լինելու, որովհետև սեպտեմբերին բացվելու է միջազգային դպրոցը, ինչը դրական արդյունք է ապահովելու Դիլիջանի համար:



http://www.tert.am/am/news/2014/01/08/mayors/


2013-12-28
Դիլիջանի քաղաքապետ Արմեն Սանթրոսյանի շնորհավորական ուղերձը Ամանորի Սուրբ Ծննդյան առթիվ
Հարգելի համաքաղաքացիներ .

Քաղաքապետարանի աշխատակազմի, համայնքի ավագանու և անձամբ իմ կողմից սրտանց շնորհավորում եմ բոլորիդ Ամանորի և Սուրբ Ծննդյան տոների առթիվ, մաղթում եմ Ձեզ անձնական երջանկություն և արգասաբեր աշխատանքային գործունեություն: Թող նոր` 2014 թվականը լինի բոլորիս հույսերի և նպատակների իրականացման տարի: Մենք Ձեզ հետ միասին լուրջ ակնկալիքներ ունենք 4014-ին: Դիլիջանում իրականացվող ծրագրերը, ոչ միայն իրենց մասշտաբներով, այլև իրենց նշանակությամբ մեծապես նպաստելու են մեր քաղաքի տարբեր ոլորտների արագ և դինամիկ զարգացմանը, նրա համբավի էլ ավելի մեծացմանը: Արդեն գործում է ՀՀ Կենտրոնական բանկի ուսումնահետազոտական կենտրոնը, Դիլիջանում են կազմակերպվում տարածաշրջանային և հանրապետական նշանակության բիզնես ֆորումներ, ինչպես նաև ավելի է մեծանում մեր քաղաքին ցուցաբերվող ուշադրությունն ու աջակցությունը: Կենտրոնական բանկի ՙԳիտելիք հանուն զարգացման» կենտրոնում ընդգրկված են շուրջ 200 դպրոցակններ: Հոկտեմբերից սկսեց գործել Կենտրոնական բանկի և Այբ հիմնադրամի համագործակցությամբ ստեղծված Կենտրոնական դպրոցը, որը նույնպես հանրապետության եզակի կրթօջախներից է: Ընդլայնվում է քաղաքի առողջապահական ոլորտը: Արդեն շուրջ մեկ տարի է գործում է մարզային նշանակության ՙՏավուշ» ախտորոշիչ կենտրոնը: Հաջորդ տարի ձեզ հետ միասին ներկա կլինենք միջազգային դպրոցի բացմանը: Բացի այն հպարտությունը, որ մեր քաղաքում է գործելու աշխարհի նմանատիպ 10 լավագույն կրթօջախներից մեկը և մեր աշակերտները ևս հնարավորություն են ստանալու հարազատ քաղաքում ստանալ միջազգային չափանիշներին համապատասխան կրթություն, ծրագիրն իր մեծ մասշտաբայնությամբ և ընդգրկումով լոկոմիտիվի դեր է կատարելու մեր քաղաքի զարգացման գործում և արդեն իսկ, այն կարևոր գործոն է մեր զարգացման բոլոր կանխատեսումներում: Քաղաքի զարգացումը մեծապես նպաստելու է նաև նոր աշխատատեղերի ստեղծմանը, արտագաղթի նվազեցմանը: Մենք նոր` 2014թ-ին կանենք հնարավորը թեթևացնելու Ձեր հոգսերը և համոզված եմ համատեղ ջանքերի շնորհիվ մեզ կհաջողվի լուծել մեր առջև դրված կարևոր խնդիրները և նոր առաջընթաց արձանագրել ինչպես քաղաքի զարգացման, այնպես էլ մեր ապրելակերպի բարելավման ուղղությամբ: Կրկին շնորհավորում եմ բոլորիդ` մաղթում նորանոր հաջողություններ:

2013-12-28
ՙՏարվա Քաղաքապետ»
ՙԴե ֆակտո» հեղինակավոր ամսագիրը ՙՏարվա Քաղաքապետ» է ճանաչել Դիլիջանի քաղաքապետ Արմեն Սանթրոսյանին: Ամսագրի հրապարակման համաձայն` նա այդ գնահատանքին է արժանացել Դիլիջանի զարգացման գործում ներդրած մեծ ավանդի և 2013թ. ընթացքում քաղաքում իրականացված աշխատանքների ու բարեփոխումների համար:

2013-12-27
Արժանացել են շնորհակալագրերի
2013 թվականի արդյունքներով` իրենց ծառայողական պարտականությունների կատարման գործում աչքի ընկած մի խումբ աշխատակիցներ արժանացել են քաղաքապետարանի շնորհակալագրերի: Դեկտեմբերի 28-ին քաղաքապետարանում կազմակերպած ընդունելության ընթաքում Դիլիջանի քաղաքապետ Արմեն Սանթրոսյանը հանձնելով շնորհակալագրերը, նրանց մաղթեց հետագա աշխատանքային հաջողություններ:



Նորածինների մայրերի ընդունելություն




Դեկտեմբերի 28-ին քաղաքապետարանում նորածինների մայրերի հերթական ընդունելությունն էր: Քաղաքապետ Արմեն Սանթրոսյանը ջերմորեն շնորհավորելով մայրերին երեխաների ծննդյան և գալիք տոների կապակցությամբ` նրանց հանձնեց քաղաքապետարանի կողմից սահմանված հատկացումը: Դրամական աջակցություն ստացան 32 նորածինների ծնողներ: Ընդունելությանը մասնակցում էին քաղաքապետարանի պատասխանատու աշխատակիցներ և լրատվամիջոցների ներկայացուցիչներ:



2013-12-25
Ռումինիայի դեսպանի այցը
Դեկտեմբերի 24-ին Դիլիջան այցելեց Ռումինիայի նորանշանակ արտակարգ և լիազոր դեսպան Սորին Վասիլեն: Պատվարժան հյուրին քաղաքապետարանում ընդունեցին Դիլիջանի քաղաքապետ Արմեն Սանթրոսյանը և քաղաքապետարանի պատասխանատու աշխատակիցները: Այցելությունը պայմանավորված էր ոչ միայն քաղաքում իրականացվող խոշորամասշտաբ ծրագրերին ծանոթանալու դեսպանի ցանկությամբ, այլև Դիլիջան և Ռոման քաղաքների միջև առկա բարեկամական կապերի հանգամանքով: Դիլիջանի քաղաքապետ Արմեն Սանթրոսյանը դեսպանին համառոտակի ներկայացրեց քաղաքում իրականացվող ծրագրերի ընթացքի և հեռանկարների մասին: Օգտվելով առիթից նա իր երախտագիտությունն արտահայտեց նախորդ տարի Ռոման այցելած Դիլիջանի պատվիրակությանը ցուցաբերված ջերմ ընդունելության համար: Դեսպանը խիստ տպավորված էր Դիլիջանի միջազգային դպրոցի շինարարության տեմպերից և մասշտաբից: Զրույցի ընթացքում կողմերը կարևորեցին այն դերը, որ խաղալու են միջազգային դպրոցն ու ՀՀ Կենտրոնական բանկի ուսումնահետազոտական կենտրոնը քաղաքի զարգացման գործում: Երկու երկրների փոխգործակցության մեջ կարևորվեց տուրիզմի դերը դիտարկվելով առկա հարուստ ռեսուրսները: Անդրադարձ եղավ նաև առողջապահական ոլորտում համագործակցության հեռանկարին` նկատի առնվելով Դիլիջանի առողջարանային բնական ռեսուրսներն ու առողջապահական ներկա հնարավորությունները:

2013-12-25
2013թ. քաղաքապետարանի կատարած աշխատանքների մասին
2013թ. ընթացքում հավաքագրվել է 315000.0 հազ.դրամի եկամուտ, ինչն ուղղվել է համայնքի սոցիալ-տնտեսական խնդիրների լուծմանը: Համայնքային ենթակայության 13 ոչ առևտրային կազմակերպությունների, քաղաքապետարանի, քաղաքացիական կացության ակտերի գրանցման բաժնի, աղբահանության և սանիտարական մաքրման, ինչպես նաև լուսավորության սպասարկման բնագավառներում ֆինանսավորումները կատարվել են ժամանակին` ծրագրով նախատեսված ծախսերին համապատասխան:
Քաղաքապետարանի ուշադրության կենտրոնում են սոցիալապես անապահով ընտանիքները: Շուրջ 90 անապահով ընտանիքների տրվել է դրամական օգնություն:
Յուրաքանչյուր նորածին երեխաների համար 200 ընտանիքի տրվել է միանվագ դրամական օգնություն: 220 անապահով ընտանիքների երեխաների դասագրքերի վարձավճարը ապահովել է քաղաքապետարանը, այդ նպատակով հատկացվել է 875.1 հազ. դրամ: Քաղաքային համայնքի ենթակայության նախադպրոցական հիմնարկությունների թվով 178 աշխատողների տրվել է ֆինանսական աջակցություն հերթական բժշկական ստուգումների անցկացման նպատակով:
Դիլիջան քաղաքում գործող «Հույսի Կամուրջ» հասարակական կազմակերպություն հաճախող հաշմանդամ երեխաների ուսումնադաստիարակչական աշխատանքները առավել արդյունավետ կազմակերպելու և անցկացնելու համար համայնքի բյուջեից յուրաքանչյուր ամիս ցուցաբերվում է ֆինանսական աջակցություն: Համայնքը փոխհատուցել է «Հույսի կամուրջ» հասարակական կազմակերպություն հաճախող թվով 22 երեխաների և նրանց ուղեկցող ծնողների տրանսպորտային ծախսերը:
Կազմակերպվել է հիշատակի արարողություն և ծաղկեպսակներ են դրվել Մեծ եղեռնի զոհերի հիշատակը հավերժացնող հուշարձան-խաչքարին:Մայիսի 9-ին`Հայրենական մեծ պատերազմում տարած հաղթանակի 68-րդ և Շուշիի ազատագրման 21-ամյակի կապակցությամբ կազմակերպվեց միջոցառում, հազարավոր դիլիջանցիներ իրենց հարգանքի տուրքը մատուցեցին զոհվածների հիշատակին:Հայրենական պատերազմի մասնակից վետերաններին տրամադրվեց դրամական օգնություն: Գույքահարկի գծով Հայրենական մեծ պատերազմի վետերաններին տրվել է արտոնություն:
Դիլիջանի համայնքային ենթակայության նախադպրոցական հիմնարկությունների և «Հույսի կամուրջ» Հ/Կ հաճախող թվով 621 երեխաների Ամանորի միջոցառման համար ձեռք են բերվել և տրվել նվերներ: Նախադպրոցական հիմնարկների ավագ նախադպրոցական խմբեր հաճախող թվով 178 երեխաներ համար ձեռք է բերվել և տրվել նվերներ: Դիլիջան քաղաքի դպրոցների առաջին դասարան հաճախող թվով 230 երեխաների համար սեպտեմբերի 1-ի կապակցությամբ տրամադրվել է նվերներ:
Քաղաքի մանկապարտեզներում և գեղարվեստի դպրոցներում ներդրվել է վարձավճարի զեղչերի համակարգ: Մանկական երաժշտական դպրոցում իրականացվում է անվճար ուսուցում, որն ապահովելու համար քաղաքապետարանը տարեկան հատկացնում է շուրջ 10 միլիոն դրամ:
Գարնանային և աշնանային զորակոչով ՀՀ Զինված ուժերում ծառայության մեկնող զորակոչիկների տրվել են նվերներ:
Կազմակերպվել է Ամանորի տոնական միջոցառում:
Քաղաքապետարանը միջոցներ է ձեռնարկում իր ենթակայության ենթակառույցների նյութատեխնիակական բազայի ամրապնդման ուղղությամբ: «Քաունթերփարթ Ինթերնեշնլի» «Քաղաքացիական հասարակության և տեղական ինքնակառավարման աջակցության» ծրագրի շրջանակներում «Դիլիջանի թիվ 4 մանկապարտեզ» ՀՈԱԿ-ի համար ձեռք է բերվել գույք և կազմակերպել վերապատրաստում մանկավարժական անձնակազմի և ծնողական խմբերի համար` ներգրավելով համայնքում գործող ՀԿ-ներին: ՏԻՄ խրախուսման դրամաշնորհային ծրագրի շրջանակներում «Քաունթերփարթ ինթերնեշնլի» հայաստանյան կազմակերպության հետ համատեղ իրականացվում է «Դիլիջանի երաժշտական դպրոց» ՀՈԱԿ շենքի վերանորոգման աշխատանքները: Դիլիջանի քաղաքային զբոսայգին նոր սեզոնին նախապատրաստելու, ինչպես նաև բնակիչների ակտիվ հանգիստը առավել հարմարավետ և անվտանգ դարձնելու նպատակով իրականացվել է զբոսայգու խաղային ատրակցիոնների վերանորոգման աշխատանքներ: Դիլիջան համայնքի մշակույթի տան «Հովք» պարային համույթի համար ձեռք է բերվել հանդերձանք:
Ներհամայնքային ենթակայության ճանապարհների ասֆալտապատման համար հատկացվել է 72000.0 հազար դրամ: Շահումյան, Կալինինի, Մյասնիկյան, Գետափնյա փոզոցներում կատարվել է փողոցների մայթերի հիմնանորոգման, կանաչապատման և գազոնների վերականգնման աշխատանքներ, ինչի համար հատկացվել է 12000.0 հազ.դրամ:
Վերակառուցվել են Աղայան փողոցի թիվ 4 հասցեի տանը հարակից հենապատը. Իրականացվել է քաղաքի ներհամայնքային նշանակության Իվանովո, Օրջոնիկիձե, Շահումյան 3-րդ նրբ., ՈՒսանողական փողոցները և քաղաքային հիվանդանոցի հարակից տարածքի, Ուսանողական փ.2-րդ նրբ.թիվ 62 տնից մինչև Սայաթ-Նովա փ.ավտոտր.երթ.մասի ավտոտրանսպորտի երթևեկելի մասի փոսային նորոգման, Կամարինի փողոցի թիվ 25 հասցեի տանն հարակից հենապատի վերակառուցման և Կամարինի փողոցի թիվ 1 տնից մինչև Կամարինի թիվ 19 տունն ընկած հատվածի ավտոտրանսպորտի երթևեկելի մասի փոսային նորոգման, Ուսանողական փ.2-րդ նրբ.թիվ 62 տնից մինչև Սայաթ-Նովա փողոց ավտոտրանսպորտի երթևեկելի մասի բետոնացման աշխատանքներ, ինչպես նաև Գետափնյա ձախ փողոցի վերջնահատվածում գտնվող հեղեղատարի և Սայաթ-Նովա 24 և Սայաթ-Նովա 26 հասցեների բնակելի տներին հարակից հեղեղատարի մաքրման աշխատանքներ: Գետափնյա փ. 68,70,72,74,76,78,80,82,84,86,88,90 և Կամո փ. 72,74 հասցեների բազմաբնակարան բնակելի շենքերի շքամուտքերի պատուհանների և դռների հիմնանորոգման աշխատանքների համար:
Դիլիջանի քաղաքային համայնքում կատարվել է 100 շենքերի համարակալում, տեղադրվել են ճանապարհային նշաններ, լուսաֆորներ, կատարվել է փողոցների նշագծում:
Զգալի աշխատանքներ են իրակնացվել լուսավորության, աղբահանության և սանիտարական մաքրման բարելավման, այն առողջարանային քաղաքին վայել կազմակերպեու ուղղությամբ: Դիլիջան քաղաքի տարբեր մասերում տեղադրվել են թվով 20 կենցաղային շարժական մետաղակ աղբամաններ: Հայաստանի վերականգնվող էներգետիկայի և էներգախնայողության հիմնադրամ, միջազգային կազմակերպության հետ համատեղ 300 լուսավորության սյան լուսատուներ փոխարինել են էներգախնայողական լուսատուներով: Անդրանիկի թաղամասի որոշ հատվածներում կատարվել է փողոցային լուսավորության ցանցի վերակառուցման աշխատանքներ:
Քաղաքապետարանի կողմից անհրաժեշտ ուշադրություն է ցուցաբերվում սպորտի զարգացմանը : Մարզահամալիրի սաները մասնակցել են մ շարք հանրապետական մրցումների: Հունիսի 15-28 –ը Դիլիջանի երկրագիտական թանգարանում անցկացվեց ՖԻԴԵ-ի կանանց «Գրան Պրի» մրցաշարի 2-րդ շրջափուլը:
Հայաստանի շախմատի ֆեդերացիայի փոխնախագահ Սմբատ Լպուտյանի նախաձեռնությամբ աշխարհահռչակ շախմատիստ Գատա Կամսկին միաժամանակյա սեանս կաղաց մարզի 45 պատանի շախմատիստների հետ:
Զգալի գործունեություն է ծավալվել քաղաքի երիտասարդական կյանքն ակտիվացնելու, երիտասարդական ներուժը համախմբելու ուղղությամբ: Քաղաքի երիտասարդների ու ՏԻՄ միջև համագործակցությունը ընդգրկել է մի շարք ոլորտներ, որոնց թվում բնապահպանություն, տեղեկատվության բարձրացում, քաղաքաշինություն, սոցիալ-տնտեսական, մշակութային և այլն:


2013-12-23
ՈՒրախ հանդիպումներ
Տարեմուտի նախօրյակին Դիլիջանի միջազգային դպրոցը հանդես եկավ հերթական գեղեցիկ նախաձեռնությամբ: Դեկտեմբերի 21-ից 23-ը Դիլիջանի արվեստի պետական քոլեջում` մեր քաղաքի կրտսեր դպրոցականների և մանկապարտեզի սաների համար կազմակերպվեցին տոնածառի հանդեսներ: Փոքրիկ հանդիսատեսները մեծ հետաքրքրությամբ դիտեցին «Միմի» ստուդիայի և Թումանյանի տիկնիկային թատրոնի կողմից բեմադրված «Մադագասկար» և «Արտուտիկը երկիր մոլորակում» ներկայացումները: Միջոցառմանը մասնակցում էին 1800 երեխաներ, որոնք ստացան ամանորյա նվերներ:

2013-12-16
Հայաստանի և Վրաստանի խորհրդարանների նախագահները Դիլիջանում
Դեկտեմբերի 14-16-ը Լոռու մարզի Ալավերդի քաղաքում տեղի ունեցավ «Հայ-վրացական միջխորհրդարանական համագործակցության հեռանկարները» թեմայով խորհրդաժողով, որին մասնակցում էին ՀՀ Ազգային ժողովի նախագահ Հովիկ Աբրահամյանը, Վրաստանի խորհրդարանի նախագահ Դավիթ Ուսուպաշվիլին, ԱԺ փոխնախագահ Հերմինե Նաղդալյանը, երկու երկրների խորհրդարանների մշտական հանձնաժողովների նախագահներ, պատգամավորներ և ԵԱՀԿ երեւանյան գրասենյակի ներկայացուցիչներ: Դեկտեմբերի 14-ն` առաջին նիստից հետո, երկու երկրների պատվիրակությունները եղան Դիլիջանում, այցելեցին Ժողովուրդների բարեկամությունը խորհրդանշող «Միմինո» արձանախումբ, իրենց հարգանքի տուրքը մատուցեցին արվեստի նշանավոր գործիչներին: Պատվիրակությունների դիմավորման արարողությանը մասնակցում էին Տավուշի մարզպետ Արմեն Ղուլարյանը, Դիլիջանի քաղաքապետ Արմեն Սանթրոսյանը, հանրության և լրատվամիջոցների ներկայացուցիչներ:

2013-11-19
Ցուցահանդեսներ ժողարվեստի թանգարանում
Դիլիջանյան ներշնչանքով ու բարձր վարպետույթամբ

Օրերս Երևանի ժողարվեստի թանգարանի Դիլիջանի մասնաճյուղում բացվեց գեղանկարիչ, թանգարանի տնօրեն Գևորգ Մակվեցյանի ստեղծագործույթունների ցուցահանդեսը: Ներկայացված հարուստ ցուցադրության մեջ իր ուրույն տեղն է գրավում դիլիջանյան թեման` պատկերված մեծ ներշնչանքով ու վարպետությամբ:
Այցելուներին անմիջապես գրավում են գեղատեսիլ «Պարզ լճի» հայելանման արտացոլանքի պատկերը, հայրենի անտառի թովչանքն ու ողջ գրավչությունն արտահայող կտավները: Ցուցադրութան մեջ առանձնահատուկ տեղ են գրավում նատյուրմորտները:
Ընթացիկ տարում սա արդեն թվով 13-րդ ցուցահանդեսն է և այն իր հարուստ թեմատիկայով ու բարձրարվեստ արտահայտչականությամբ մեծ բավականություն է պատճառում Դիլիջանի արվեստասեր հասարակությանը:
Թանգարանն իր աշխատանքներում հատուկ տեղ է հատկացնում ցուցահանդեսների կազմակերպմանը, սերտորեն կապված է գեղարվեստի դպրոցի, «Հույսի Կամուրջ» և այլ հասարակական կազմակերպությունների հետ, սիրով ցուցասրահը տրամադրում է համապատասխան ցուցադրությունների կազմակերպման համար:

Ճապոնական կիրառական արվեստի ցուցադրություն

Նոյեմբերի 16-ին ժողարվեստի թանգարանում բացվեց Միջազգային գիտական կենտրոնի հոգեբանության բաժնի ուսանող Արմինե Ազիզբեկյանի աշխատանքների ցուցահանդեսը: Հեղինակը ներկայացրել էր ավելի քան 50 աշխատանքներ, մեծամասամբ թղթից` ճապոնական ավանդական օրիգամիի (բառացի` թուղթ ծալել) մեթոդով: Բացի դրանից ցուցադրված էին նաև նուրբ կտորե ժապավեններով պատրաստված գործեր և հելյունագործության նմուշներ:
Արմինե Ազիզբեկյանը, որպես կիրառական արվեստի այս ճյուղի ներկայացուցիչ արդեն իսկ ունի բավականին փորձառություն և ճանաչում: Սա հեղինակի թվով 6-րդ ցուցահանեսն է: Նա ցուցադրություններ է ներկայացրել տարբեր ցուցասրահներում, այդ թվում` Երևանի քաղաքապետարանում , Մոսկվայի տանը և այլ:
Ճապոնական կիրառական արվեստի այս տեսակը սկիզբ է առել 17-րդ դարում, սակայն նոր է սկսել ճանաչում ստանալ Հայաստանում: Դիլիջանում դրա ցուցադրումը հաճելի նորություն էր միջոցառման մասնակիցների համար: Ցուցահանդեսի բացմանը` բարձրաճաշակ և հետաքրքիր ստեղծագործությունների հեղինակին իրենց դրվատանքի խոսքն ասացին թանգարանի տնօրեն Գևորգ Մակվեցյանը, գիտաշխատող Անահիտ Կարապետյանը, «Հույսի Կամուրջ» հկ-ի նախագահ Արմինե Գրիգորյանը, «Դիլնետ սերվիս» ընկերության տնօրեն Աշոտ Հովհաննիսյանը, «Դիլիջան» արգելոց–թանգարանի գիտաշխատող Ռուզաննա Ասատրյանը և ուրիշներ:

2013-11-18
Արժեքավոր աշխատություն
Նոյեմբերի 15-ին երկրագիտական թանգարան-պատկերասրահի միջոցառումների սրահում կայացավ Հենրիկ Խառատյանի վերջերս լույս ընծայած «Նվիրյալ դիլիջանցիներ» գրքի շնորհանդեսը: Այս հատորով ամբողջական է դառնում հեղինակի տվյալ խորագրով եռահատոր կենսագրական բառարանը, որով նա ընթերցողին է ներկայացնում Հայաստանում և նրա սահմաններից դուրս հայտնի դարձած գիտության, մշակույթի, կրթության, առողջապահության և այլ բնագավառներում ժողովրդին և երկրին մատուցած ծառայությունների համար պատվավոր կոչումների և տիտղոսների արժանացած դիլիջանցի երախտավոր իր հայրենակիցներին: Եռահատոր կենսագրական բառարանում ընդգրկված են 120 անուններ:
Այս արժեքավոր գրքի լույս ընծայման առթիվ հեղինակին շնորհավորեցին և հետագա արգասաբեր գործունեություն մաղթեցին Դիլիջանի քաղաքապետ Արմեն Սանթրոսյանը, վետերանների խորհրդի նախագահ Լևոն Ջառահյանը և ուրիշներհիշատակելով նաև նրա մյուս աշխատություններն ու հոդվածները` դրվատանքի խոսքեր հնչեցնելով քաղաքի պատմության ուսումնասիրման գործում նրա ցուցաբերած ջանքերի և հետևողականության մասին:
Միջոցառմանը` հանդիսավար Անուշ Գրիգորյանը և ասմունքող Գայանե Գրիգորյանը հեղինակի կյանքն ու գրական գործունեությունը ներկայացնելուն զուգընթաց հատվածներ ընթերցեցին հեղինակի ստեղծագործությունների առավել ուշագրավ հատվածներից:
Հեղինակն իր շնորհակալական խոսքում նշեց, որ այսուհետև էլ մտադիր է ակտիվ գրական գործունեություն իրականացնել: Նա նաև իր երախտագիտությունն արտահայտեց Դիլիջանի քաղաքապետ Արմեն Սանթրոսյանին բարոյական և նյութական աջակցություն ցուցաբերելու համար:
Վաստակաշատ վետերանը քաղաքի և Հաղարծնի դպրոցներին ու երաժշտական դպրոցին նվիրեց օրինակներ իր գրքերից:
Միջոցառմանը մասնակցում էին Դիլիջանի փոխքաղաքապետ Արմեն Մակարյանը, քաղաքապետարանի կրթության ոլորտի պատասխանատուներ, արվեստասերներ, հկ-ների ու լրատվամիջոցների ներկայացուցիչներ:

2013-11-12
Պարգևատրում
2013թ. նոյեմբերի 7-ին համայնքների զարգացման գործում ներդրած ավանդի համար ՀՀ Տավուշի մարզի Դիլիջանի քաղաքապետարանի աշխատակազմի ֆինանսական բաժնի պետ ԳՈՀԱՐ ՀՐԱՆՏԻ ԴԱՎԹՅԱՆԸ պարգևատրվել է Անանիա Շիրակացի մեդալով:

2013-11-04
Նվիրված էր Արցախյան ազատամարտում զոհվածների հիշատակին
Նոյեմբերի 1-3-ը Դիլիջանի մարզահամալիրում անցկացվեց հունահռոմեական ըմբշամարտի հուշամրցում` նվիրված Արցախյան ազատամարտում զոհված դիլիջանցի ազատամարտիկների հիշատակին: Հուշամրցմանը մասնակցում էին մայրաքաղաքից և հանրապետույթան տարբեր մարզերից ժամանած 206 պատանի ըմբիշներ:
Մրցամարտի մասնակիցները նախ երթով շարժվեցին հուշարձանային համալիր և ծաղկեպսակ դրեցին Արցախյան ազատամարտում զոհվածների հուշարձանին: Մրցամարտի բացման արարողությանը մասնակցում էին Դիլիջանի քաղաքապետարանի աշխատակազմի քարտուղար Արա Մարտիրոսյանը, ՙԿոնվերսբանկի» գլխավոր տնօրենի տեղակալ Արթուր Հակոբյանը, քաղաքապետարանի կրթության և սպորտի պատասխանատուներ, մարզական ոլորտի և լրատվամիջոցների ներկայացուցիչներ: Միջոցառման հովանավորն էր ՙԿոնվերսբանկը»:
Դիլիջանից հուշամրցմանը մասնակցում էին 9 պատանի մարզիկներ, որոնցից 4-ը դարձան մրցանակակիրներ: Մարզադպրոցի սան Արտյոմ Ամիրխանյանը 50 կգ քաշային կարգում դարձավ մրցաշարի հաղթող, 58 կգ քաշային կարգում հանդես եկող Սամվել Հովսեփյանը և 63 կգ քաշային կարգում հանդես եկող Թելման Մարտիրոսայնը` գրավեցին երկրորդ տեղերը, իսկ 63 կգ քաշային կարգում հանդես եկած մեր մյուս մասնակիցը` Գարիկ Հովսեփյանը գրավեց 3-րդ տեղը: Մրցաշարի գլխավոր մրցավարն էր Թալոր Պետրոսյանը:


2013-10-23
Նախագահն այցելել է Տավուշի մարզ
Նախագահ Սերժ Սարգսյանը հոկտեմբերի 22-ին աշխատանքային այցով մեկնեց Տավուշի մարզ: Նախագահն այցելեց ՀՀ կենտրոնական բանկի «Դիլիջան» ուսումնահետազոտական կենտրոնի՝ ԿԲ աշխատակիցների համար կառուցված բազմաբնակարան շենք (64 ծառայողական բնակարաններով և 6300մ2 ընդհանուր բնակելի տարածքով), ծանոթացավ բնակարանային պայմաններին, զրուցեց Դիլիջան տեղափոխված ԿԲ աշխատակիցների և նրանց ընտանիքների անդամների հետ:

Սերժ Սարգսյանն այցելեց նաև շենքի 1-ին հարկում գործող միջազգային չափանիշներին համապատասխան ցերեկային ժամանցի մանկական կենտրոն, որտեղ հաճախում են ԿԲ աշխատակիցների 2-6 տարեկան 15 երեխաներ: Մանկական կենտրոնը նախատեսված է նաև Դիլիջանի և հարակից բնակավայրերի երեխաների համար:

Դիլիջանում նախագահը ծանոթացավ ԿԲ աշխատակիցների համար կառուցված բնակելի տարածքներին, որտեղ քոթեջներից բացի նախատեսվում է ունենալ նաև սպորտային միջոցառումների, առևտրի և սպասարկման ենթակառուցվածքներ, բացօթյա և փակ լողավազաններ:

Նախագահը եղավ նաև Կենտրոնական բանկի «Դիլիջան» ուսումնահետազոտական կենտրոնի՝ Հայաստանում Ամերիկյան համալսարանի հետ համատեղ ծրագրերի իրականացման կենտրոնում, ծանոթացավ վերջինիս գործունեությանը: Ս.Սարգսյանին այստեղ ներկայացրին կենտրոնի հիմնական նպատակը և ընթացիկ աշխատանքները, նշելով, որ ժամանակակից տեխնիկական և տեխնոլոգիական լուծումներով հագեցված ինստիտուտի ստեղծմամբ կիրականացվեն միջազգային չափանիշներին համապատասխանող, տնտեսագիտության և ֆինանսների բնագավառներին առնչվող տարածաշրջանային և միջազգային ուսումնական ծրագրեր, կվերապատրաստվեն ԿԲ աշխատակիցներ: Կենտրոնում այժմ աշխատում է Երևանից իրենց ընտանիքներով տեղափոխված ԿԲ 58 աշխատակից:

Նշվել է, որ կենտրոնում տարածքներ են հատկացված առևտրային բանկերի, ԱրՔա պրոցեսինգային կենտրոնի, ԱՔՌԱ-վարկային և ԱՊՊԱ-բյուրոների համար՝ վերջիններիս կողմից այնտեղ ռեզերվային սերվերներով պահուստային տվյալների շտեմարանների ստեղծման հնարավորությամբ: Տարածքում տեղակայված է նաև տարածքային դրամարկղային կենտրոնը, որի միջոցով կսպասարկվեն տարածաշրջանի ֆինանսական կազմակերպությունները: Կենտրոնում իր նիստերն է գումարում նաև ԿԲ խորհուրդը:

Այստեղ առանձին տարածք է հատկացված Հայաստանի ամերիկյան համալսարանի հետ համատեղ կրթական ծրագրերի իրականացման համար: 2013թ. սեպտեմբերից իրականացվում է Տնտեսագիտության մագիստրոս ծրագիրը՝ ձևավորված ԿԲ պահանջներին համապատասխան:

Ըստ պատասխանատուների, «Այբ» դպրոցի հետ համատեղ Դիլիջանում կառուցվում է դպրոցի նոր շենք, որի աշխատանքները նախատեսվում է ավարտել մինչև հաջորդ ուսումնական տարվա սկիզբը: Ներկայումս դպրոցի աշխատանքները կազմակերպվում են կենտրոնում, որտեղ ուսանում է ԿԲ աշխատակիցների և Դիլիջանի բնակիչների 45 երեխա:

Նախագահն այցելեց նաև Դիլիջանի միջազգային դպրոց, որտեղ նրան ներկայացվեց կրթական այդ հաստատության շինարարական աշխատանքների ընթացքը: Նշվեց, որ 2013թ. հոկտեմբերի դրությամբ դպրոցի շինարարության վրա աշխատել է մոտ 730 մարդ, միջին աշխատավարձը կազմել է 310. 000 ՀՀ դրամ:

2013թ. հունիս-հոկտեմբեր ամիսների ընթացքում, ըստ պատասխանատուների, մեծածավալ աշխատանքներ են իրականացվել կրթական, սպորտային, դիզայնի և տեխնոլոգիաների կենտրոնի, բուժկետի, տեխնիկական մասնաշենքների և հանրակացարանների կառուցման ուղղությամբ, ավարտվում են ջրամատակարարման, կոյուղու, ջերմային ցանցի, գազամատակարարման և մալուխային ցանցերի կառուցման աշխատանքները: Ընդգծվեց, որ Դիլիջանի միջազգային դպրոցն իր դռները կբացի 2014թ. սեպտեմբերին՝ առաջին ուսումնական տարում ընդունելով 90 աշակերտի, որոնց քանակը 2023-ին կհասնի 650-ի՝ 60 երկրներից:

Ս.Սարգսյանին այստեղ ներկայացվեց նաև «Դիլիջանի միջազգային դպրոց» հիմնադրամի առաջիկա ծրագրերը, ըստ որոնց հիմնադրամը տեխնիկական հանձնարարական է մշակում Դիլիջան քաղաքի գլխավոր հատակագծի հայեցակարգը մշակելու նպատակով միջազգային մրցույթ հայտարարելու համար: Հիմնադրամը նաև նախատեսում է վերանորոգել Դիլիջանի քաղաքային այգին՝ մշակութային և այլ միջոցառումներ անցկացնելու նպատակով:

հղում` www.panorama.am -ից


2013-10-21
Վերաբացվեց Հաղարծին վանական համալիրը
Հոկտեմբերի 19-ին Տավուշի թեմում, հանդիսապետությամբ Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի, տեղի ունեցավ Հաղարծնի վանական համալիրի բացման արարողությունը: Վանքը հիմնանորոգվել է Արաբական Միացյալ Էմիրությունների Գերագույն խորհրդի անդամ, Շարժայի կառավարիչ Նորին Գերազանցություն շեյխ դոկտոր Սուլթան Բին Մոհամմադ Ալ Քասիմիի սրտաբուխ բարերարությամբ: Բացման արարողությանը ներկա էին ՀՀ ԱԺ նախագահ Հովիկ Աբրահամյանը, Շարժայի կառավարիչ շեյխ Սուլթան բին Մոհամմադ Ալ Քասիմիի ներկայացուցիչ Համիդ Դիյա Ջաֆարը, ՀՀ Մշակույթի նախարար Հասմիկ Պողոսյանը, Մայր Աթոռի միաբաններ, Տավուշի մարզպետ Արմեն Ղուլարյանը, Դիլիջանի քաղաքապետ Արմեն Սանթրոսյանը, «Հայաստան» համահայկական հիմնադրամի տնօրեն Արա Վարդանյանը, ՄԱԷ-ում ՀՀ արտակարգ և լիազոր դեսպան Գեղամ Ղարիբջանյանը, Շարժայի հայ համայնքի անդամներ և հյուրեր: Ամենայն Հայոց Կաթողիկոսի նախագահությամբ կատարված վանքի բացման և օրհնության արարողությունից հետո ներկաներին ողջույնի խոսքով դիմեց Տավուշի թեմի առաջնորդ Տ. Եզնիկ արքեպիկոպոս Պետրոսյանը: Այնուհետև իր սրտի խոսքն ասաց տիար Համիդ Դիյա Ջաֆարը: Շնորհավորելով վանքի վերաբացման առիթով` տիար Ջաֆարը ամենքին փոխանցեց Շարժայի կառավարիչ Շեյխ Սուլթան Բին Մոհամմադ Ալ Քասիմիի ողջույններն ու բարեմաղթանքները, ինչպես նաև ափսոսանքը, որ չի կարողացել անձնապես ներկա գտնվել այս հատկանշական և մեծ իրադարձությանը: Շարժայի կառավարչի նվիրակն անդրադարձավ նաև Արաբական աշխարհում և մասնավորապես Միացյալ Արաբական Էմիրություններում բնակվող հայերի նկատմամբ արաբ ժողովրդի վերաբերմունքին: «...Արաբական աշխարհը մասնավորապես, հակառակ որ հիմնականում մահմեդական է, միշտ գնահատել է հայերին որպես եղբայրների և նրանց համար անվտանգ կեցություն ապահովել: Հայերն էլ իրենց հերթին դարեր շարունակ Արաբական աշխարհը ամենահարմար վայրն են նկատել իրենց ազգային ինքնության պահպանության համար և ի պատասխան` մեծապես նպաստել են իրենց երկրների շենացմանը` հաջողությամբ նեգրավվելով առևտրի, արհեստների և այլ ոլորտներում: Նորին Գերազանցություն Շեյխ Սուլթան Բին Մոհամմադ Ալ Քասիմին միշտ բարձր է գնահատել Շարժայի հայ համայնքին՝ որպես հասարակության բարեպաշտ, հավատավոր, վստահելի և աշխատասեր անդամների, ընդգծելով հատկապես հայորդիների սերը գիտելիքի և կրթության նկատմամբ: Նորին Գերազանցության սերն ու գնահատանքը Շարժայի հայ համայնքի հանդեպ լավագույնս դրսևորվեց, երբ նա տարածք նվիրաբերեց Արաբական Միացյալ Էմիրություններում միակ հայկական եկեղեցու կառուցման համար, որն օծվեց 1998 թվականին», - նշեց տիար Համիդ Ջաֆարն իր խոսքում` հավելելով, որ շեյխ Սուլթան Բին Մոհամմադ ալ Քասիմին մեծապես հպարտ է նաև պատմական Հաղարծնի վանական համալիրի վերանորոգության գործում ներգրավված լինելու համար: Իր խոսքում Շեյխ Քասիմիի նվիրակն ընդգծեց, որ Շեյխ Սուլթանը մեծ ակնածանք է տածում Ամենայն Հայոց Հայրապետի նկատմամբ և բարձր է գնահատում նրա գործունեությունը` նշելով, որ Վեհափառ Հայրապետը և Շարժայի կառավարիչն ունեն միևնույն տեսլականը մի շարք կարևոր հարցերի շուրջ, ինչպիսիք են մարդկության խաղաղ և անվրդով կյանքի հենասյուներ հանդիսացող շարունակական միջկրոնական երկխոսությունը, այլ կրոնների և մշակույթների հանդեպ հանդուրժողականությունը, փոխադարձ հանգանքն ու սերը:Այս առիթով տիար Ջաֆարը նաև շնորհակալություն հայտնեց ՀՀ ԱԺ նախագահին և տիար Վարուժ Ներգիզյանին` Հաղարծնի վանական համալիրի վերանորոգության գործում ներդրած ջանքերի համար: Ապա վանքի բացման առիթով ներկաներին շնորհավորեց ՀՀ ԱԺ նախագահ Հովիկ Աբրահամյանը: Իր խոսքում ԱԺ նախագահն անդրադարձավ մասնավորապես հայ-արաբական դարավոր բարեկամությանը և ներկայիս համագործակցությանը Հայաստանի և Միացյալ Արաբական Էմիրությունների միջև: Այնուհետև տիար Աբրահամյանը տեղեկացրեց, որ Արաբական Միացյալ Էմիրությունների Գերագույն խորհրդի անդամ, Շարժայի կառավարիչ Նորին Գերազանցություն Շեյխ դոկտոր Սուլթան բին Մոհամադ Ալ Քասիմիին ՀՀ նախագահ Սերժ Սարգսյանի կողմից պարգևատրվել է Պատվո շքանշանով: Իսկ Շարժայի կառավարչի ներկայացուցիչ Համիդ Դիյա Ջաֆարին տիար Աբրահամյանը հանձնեց «Անանիա Շիրակացի» մեդալ` տնտեսական կապերի զարգացման և ամրապնդման գործում կարևոր ներդրման համար:
Կրճատումներով` http://hetq.am/arm/news/30126/verabacvec-haxartsin-vanakan-hamaliry.html

2013-10-17
Տվերի պատվիրակությունը Դիլիջանում
«Քաղաքներ, երկրներ, ժողովուրդներ միավորող անուններ» միջազգային նախագծի շրջանակներում հոկտեմբերի 16-ին Ռուսաստանի Տվեր քաղաքի պատվիրակության ներկայացուցիչները ժամանեցին Դիլիջան: Այցելությունը կապված էր Ռուսաստանում` 1877- 1878 թթ. ռուս-թուրքական պատերազմում տարած հաղթանակի 135-ամյակի նշման հոբելյանական միջոցառումների հետ: Հոբելյանի նախաշեմին` «Գթության քույր Եկատերինա Բակունինայի անվան բարեգործական հիմնադրամի, Տվերի հայկական ազգային ինքնավարության «Արարատ» կազմակերպության և Սանկտ–Պետերբուրգի «Ոսկե գիրք» միավորման հետ համատեղ կազամկերպած այս այցելությունը կապված էր լեգենգար բուժքրոջ` Բակունինայի գործունեության պատմական վայրերի հետ: Ծնունդով Տվերից Եկատերինա Բակունինան 1877-1878թթ. ռուս–թուրքական պատերազմում եղել է Դիլիջանում գործող Անդրկովկասի զինվորական բոլոր հոսպիտալների Կարմիր խաչի գլխավոր բուժքույրը: Պատվիրակության ժամանման կապակցությամբ Դիլիջանի քաղաքապետարանում կազմակերպված ընդունելությանը մասնակցում էին քաղաքապետարանի աշխատակազմի քարտուղար Արա Մարտիրոսյանը, քաղաքապետարանի պատասխանատու աշխատակիցներ, հկ-ների և լրատվամիջոցների ներկայցուցիչներ: Ընդունելությունից հետո հյուրերը այցելեցին Հայրենական մեծ պատերազմի ակտիվ մասնակից, 90-ամյա բուժքույր Գալինա Եվդակիմովային, նրան հանձնելով` «Եկատերինա Բակունինայի անվան» հուշամեդալը: Այնուհետև Հուշարձանային համալիրում կատարվեց հիշատակի արարողություն, ծաղիկներ և ծաղկեպսակներ դրվեցին Հայրենական մեծ պատերազմում զոհված դիլիջանցիների հիշատակը հավերժացնող հուշարձանի հուշապատին և եղբայրական գերեզմանի շիրիմներին: Արարողությոան ավարտից հետո հյուրերը այցելեցին երկրագիտական թանգարան-պատկերասրահ և «Հին Դիլիջան» պատմամշակութային համալիր, ծանոթացան քաղաքի դիտարժան վայրերին:

2013-10-11
Ֆինանսական բացօթյա ցուցահանդես Դիլիջանում
ՀՀ կենտրոնական բանկի կողմից հանրապետությունում հայտարարված «Իմ ֆինանսների միամսյակը» խորագրով միջոցառումների շրջանակներում` ԱՄՆ ՄԶԳ «Ֆինանսներ տնտեսության զարգացման համար» ծրագրի կողմից հոկտեմբերի 11-ին Դիլիջանում կազմակերպվեց մեկօրյա բացօթյա ֆինանսական ցուցահանդես: Միջոցառման նպատակն էր նպաստել բնակչության ֆինանսական գրագիտության և իրազեկվածության բարձրացմանը, տրամադրել ֆինանսական խորհրդատվություն: Քաղաքային հրապարակում տեղադրաված Ժամանակավոր տաղավար- վրաններում ֆինանսական ինստիտուտները հանրությանը ներկայացրեցին իրենց կողմից մատուցվող ֆինանսական ծառայությունները, այցելուներին տրամադրելով բացատրական ու տեղեկատվական բուկլետներ, բրոշյուրներ: Կազմակերպությունների ներկայացուցիչները սիրով պատասխանում էին այցելուներին հետաքրքրող հարցերին: Միջոցառման կազմակերպիչները հոգ էին տարել նաև մասնակիցների ժամանցի մասին` կազմակերպելով վիճակախաղ: Միջոցառմանը մասնակցում էր նաև Քուանթերփարթ ինթերնեշնլ կազմակերպության ներկայացուցիչը:

2013-10-07
Դիլիջանի քաղաքապետ Արմեն Սանթրոսյանի շնորհավորական ուղերձը Գրադարանավարի օրվա առթիվ
Գրադարանային համակարգի հարգելի աշխատակիցներ.
Ջերմորեն շնորհավորում եմ ձեզ մասնագիտական տոնի` Գրադարանավարի օրվա և Ղ. Աղայանի անվան քաղաքային գրադարանի հիմնադրման 105-ամյակի կապակցությամբ: Մաղթում եմ բոլորիդ անձնական երջանկություն և հետագա աշխատանքային հաջողություններ:
Հանրությունը բարձր է գնահատում գրքի, գիտելիքի նկատմամբ սեր առաջացնելու, մշակութային գրավոր ժառանգությունը մեր հանրությանը ներկայացնելուն ուղղված ձեր շնորհակալ աշխատանքը, որը կարևոր նշանակություն ունի հատկապես մեր մատաղ սերնդի հոգեկերտվածքի ձևավորման գործում:
Դիլիջանի գրադարանային համակարգը իր կարևոր դերն է կատարում մեր մշակութային կյանքում և ես համոզված եմ, որ քաղաքի զարգացման ներկա փուլում ևս մասնագիտական պատրաստվածության և նվիրումի շնորհիվ ձեր ակտիվ ներդրումը կունենաք քաղաքի մշակութային ոլորտի առաջընթացում:

2013-10-04
Դիլիջանի քաղաքապետ Արմեն Սանթրոսյանի շնորհավորական ուղերձը Ուսուցչի օրվա առթիվ
Հարգելի ուսուցիչներ.
Սրտանց շնորհավորում եմ ձեզ` բոլորիս շատ հարազատ տոնի` Ուսուցչի օրվա առթիվ, մաղթում եմ անձնական երջանկություն և հետագա հաջողություններ` մատաղ սերնդի կրթության և դաստիարակության անչափ կարևոր և շնորհակալ գործում:
Ձեր նվիրումի և բարձր մասնագիտական պատրաստվածության շնորհիվ է, որ դպրոցներում ստանալով որակյալ կրթություն և հայեցի դաստիարակություն, մեր նոր սերունդը վստահորեն մտնում է ինքնուրույն կյանք, մեզ հետ կերտելով երկրի վաղվա օրը:
Մեր վաղվա քաղաքացիների ապագան կերտվում է հենց դպրոցներում և այդ գործի գլխավոր կազամկերպիչը դուք եք` մեր հարգելի մանկավարժներ: Այս տոնական օրը, արտահայտելով մեր հանրության երախտագիտությունը, ուրախ եմ նաև փաստելու այն կարևոր իրողությունը, որ մեր քաղաքում գնալով ընդլայնվում են կրթական հնարավորությունները: Արդեն երկրորդ տարին է, իր ակտիվ գործունեությունն է իրականացնում ՀՀ կենտրոնական բանկի «Գիտելիք հանուն զարգացման» կենտրոնը, օրերս մեկնարկեց Դիլիջանի կենտրոնական դպրոցը, իսկ միջազգային դպրոցի կայացմամբ քաղաքը հավակնում է դառնալու միջազգային կրթական կենտրոններից մեկը: Դիլիջանում տարածաշրջանային ֆինանսական կենտրոնի ձևավորման կառավարության ծրագիրը, միջազգային դպրոցը, հզոր խթան են հանդիսանալու քաղաքային կյանքի զարգացման գործում, իսկ յուրաքանչյուր առաջընթաց նախ և առաջ կարևորվում է նրանով, թե որքանով ենք պատրաստ գնահատելու մեր ձեռքբերումները և հետագա զարգացման նախադրյալներ ստեղծելու: Հուսով եմ, որ քաղաքի կրթական հաստատությունների մանկավարժական կոլեկտիվները, ինչպես միշտ, իրենց արժանի ներդրումը կունենան մեր քաղաքի զարգացման այս անչափ պատասխանատու փուլում:
Կրկին շնորհավորում եմ բոլորիդ` մաղթելով հետագա արգասաբեր գործունեություն:


2013-10-03
Դիլիջանի քաղաքային համայնքի ղեկավարի հաշվետվությունը
Դիլիջան համայնքի 2013թ. բյուջեն մշակվել է` հիմք ունենալով համայնքի 2013-2016թթ. քառամյա զարգացման ծրագիրը: Համայնքի գործունեությունը մեծապես կախված է բյուջետային գործընթացի լավ կազմակերպումից, բյուջեի եկամուտների արդյունավետ հավաքագրումից և միջոցների խնայողական օգտագործումից: 2013թ. երրորդ եռամսյակում տեղական մուտքերի արդյունավետ հավաքագրման շնորհիվ հավաքագրվել է 239000.0 հազ.դրամի եկամուտ, որը հնարավորություն է տալիս ավելի իրատեսորեն կանխագծելու առաջիկա անելիքները: Քաղաքապետարանի ուշադրության կենտրոնում են սոցիալապես անապահով ընտանիքները: 83 ընտանիքի յուրաքանչյուր նորածին երեխայի համար տրվել է միանվագ դրամական օգնություն: Դիլիջան քաղաքում գործող «Հույսի Կամուրջ» հասարակական կազմակերպություն հաճախող հաշմանդամ երեխաների ուսումնադաստիարակչական աշխատանքները առավել արդյունավետ կազմակերպելու և անցկացնելու համար համայնքի բյուջեից յուրաքանչյուր ամիս ցուցաբերվում է ֆինանսական աջակցություն: Քաղաքի դպրոցների առաջին դասարան հաճախող թվով 230 երեխաների համար սեպտեմբերի 1-ի կապակցությամբ ձեռք է բերվել և տրամադրվել նվերներ: ՏԻՄ խրախուսման դրամաշնորհային ծրագրի շրջանակներում Քաունթերփարթ ինթերնեշնլի հայաստանյան կազմակերպության հետ համատեղ իրականացվում է «Դիլիջանի երաժշտական դպրոց» ՀՈԱԿ շենքի վերանորոգման աշխատանքները: Վերակառուցվել են Աղայան փողոցի թիվ 4 հասցեի տանը հարակից հենապատը: Իրականացվել է քաղաքի ներհամայնքային նշանակության` Իվանովո, Օրջոնիկիձե, Շահումյան 3-րդ նրբ., ՈՒսանողական փողոցները և քաղաքային հիվանդանոցի հարակից տարածքի, Ուսանողական փ.2-րդ նրբ.թիվ 62 տնից մինչև Սայաթ-Նովա փողոցի ավտոտրանսպորտի երթևեկելի մասի փոսային նորոգման, Կամարինի փողոցի թիվ 25 հասցեի տան հարակից հենապատի վերակառուցման և Կամարինի փողոցի թիվ 1 տնից մինչև Կամարինի թիվ 19 տունն ընկած հատվածի ավտոտրանսպորտի երթևեկելի մասի փոսային նորոգման, Ուսանողական փ.2-րդ նրբ.թիվ 62 տնից մինչև Սայաթ-Նովա փողոց ավտոտրանսպորտի. երթևեկելի մասի բետոնացման աշխատանքներ, ինչպես նաև Գետափնյա ձախ փողոցի վերջնահատվածում գտնվող հեղեղատարի և Սայաթ-Նովա 24 և Սայաթ-Նովա 26 հասցեների բնակելի տներին հարակից հեղեղատարի մաքրման աշխատանքներ: Զգալի աշխատանքներ են իրականացվել լուսավորության, աղբահանության և սանիտարական մաքրման բարելավման, այն առողջարանային քաղաքին վայել կազմակերպեու ուղղությամբ: Դիլիջան քաղաքի տարբեր մասերում տեղադրվել են թվով 20 կենցաղային շարժական մետաղյա աղբամաններ: Քաղաքապետարանի կողմից անհրաժեշտ ուշադրություն է ցուցաբերվում սպորտի զարգացմանը: Մարզահամալիրի սաները մասնակցել են ըմբշամարտի հանրապետական մրցումներին:

2013-09-20
Տավուշի մարզպետ պ-ն Ա. Ղուլարյանի շնորհավորական ուղերձը Անկախության օրվա առթիվ
Հարգելի պարոն Սանթրոսյան. Շնորհավորում եմ Ձեզ և համայնքի բոլոր բնակիչներին Հայաստանի Հանրապետության Անկախության տոնի կապակցությամբ, մաղթում ծառայողական հաջողություններ, առողջություն և երջանկություն:

Հարգանքներով Ա. Ղուլարյան

2013-09-17
Գոշավանքի բակում բացվեց միջնադարի հանճարեղ մտածող, օրենսդիր և առակագիր Մխիթար Գոշի բրոնզաձույլ արձանը
Սեպտեմբերի 13-ին տոնախմբություն էր Գոշ գյուղում: Գոշավանքի բակում մեծ հանդիսավորությամբ բացվեց միջնադարի հանճարեղ մտածող, օրնսդիր և առակագիր Մխիթար Գոշի բորնզաձույլ արձանը: Հանդիսավոր արարողությանը մասնակցում էին Տավուշի մարզպետ Արմեն Ղուլարյանը, Դիլիջանի քաղաքապետ Արմեն Սանթրոսյանը, մարզի դատախազ Աննա Մանթաշյանը, պետական այլ բարձրաստիճան պաշտոնյաներ,Երևանից և Հայաստանի այլ քաղաքներից ու Ռուսաստանի Դաշնությունից ժամանած հյուրեր: Արձանի ստեղծման նախաձեռնության հեղինակն ու իրականացնողն էր ռուսաստանաբնակ գործարար- բարեգործ, ծագումով գոշեցի Անտոն Մեհրաբյանը: Արձանի հեղինակն է ճանաչված քանդակագործ Գևորգ Գևորգյանը: Տոնախմբության մասնակիցները նախ երթով շարժվեցին մեծ մտածողի գերեզմանը, ծաղիկներ ու ծաղկեպսակներ դրեցին նրա շիրիմին, ապա եկեղեցու բակում կատարվեց արձանի բացման հանդիսավոր արարողությունը: Գյուղապետ Գևորգ Ամիրխանյանի բացման խոսքից հետո կտրվեց կարմիր ժապավենը և գյուղի չքնաղ համայնապատկերին ավելացավ և միջնադարյան հռչակավոր համալիրին մաս կազմեց նրա հիմնադրի հոյակերտ արձանը: Տոնախմբությանը ելույթներ ունեցան Տավուշի մարզպետ Արմեն Ղուլարյանը, ՀՀ Սահմանադրական դատարանի աշխատակազմի ղեկավար Առուշան Հակոբյանը, Հայաստանի այլ մարզերից և Ռուսաստանյան Դաշնությունից ժամանած մտավորականներ: Արժանին մատուցելով հայ մտքի տիտաններից մեկին` Մխիթար Գոշին, ելույթ ունեցողները նաև իրենց երախտագիտությունն արտահայտեցին բարեգործին` գոշեցիների և ողջ Տավուշի մարզի բնակիչների վաղուց փափագած այդ երազանքը իրականություն դարձնելու համար: Միջոցառման կազմակերպիչները նախապատրաստել էին նաև գեղարվեստական հարուստ ծրագիր: Գեղարվեստական բարձրարվեստ կատարումներով հանդես եկան Վանաձորի, Դիլիջանի և Իջևանի գեղարվեստական համույթները և անհատ կատարողներ: Միջոցառմանը ելույթ ունեցավ ճանաչված ասմունքող Ջիվան Սարգսյանը: Իսկ գյուղի դպրոցի սաները ընթերցում էին Մխիթար Գոշի առակները: Կատարվեց ժամերգություն ձեռամբ Գեղարքունիքի թեմի առաջնորդ Մարկոս եպիսկոպոսի: Տոնախմբության վերջում եկեղեցու բակում տրվեց Սուրբ մատաղ ի նշանավորումն արժանահիշատակ օրվա:

2013-09-06
Տոնական համերգ Դիլիջանի միջազգային դպրոցի տարածքում
Սեպտեմբերի 5-ին Դիլիջանի միջազգային դպրոցի տարածքում դպրոցի հիմնադիրների նախաձեռնությամբ կազմակերպվեց տոնական համերգ, որին մասնակցում էին հազարավոր դիլիջանցիներ և մարզի համայնքներից ու Երևանից հրավիրված հյուրեր: Միջոցառմանը ներկա էին դպրոցի հիմնադիր` ռուսաստանաբնակ Ռուբեն Վարդանյանը, նրա տիկինը` Վերոնիկա Զոնաբենդը, ով ամուսնու հետ դպրոցի գաղափարի համահեղինակն է, դպրոցի համահիմնադիրներ ռուսաստանաբնակ գործարարներ Գագիկ Ադիբեկյանը և Վլադիմիր Ավետիսյանը: Համընդհանուր ոգևորության մթնոլորտում գործարկվեց խորհրդանշական ժամացույցը, որը սկսեց հետհաշվարկը, մինչև ուղիղ մեկ տարի հետո իր դռները կբացի Դիլիջանի միջազգային դպրոցը: Ներկաներին ջերմորեն ողջունեց Դիլիջանի քաղաքապետ Արմեն Սանթրոսյանը: Քաղաքապետը դիլիջանցիների անունից իր երախտագիտությունն արտահայտելով դպրոցի հիմնադիրներին այսպես կանխանշեց այն հսկայական դերը որ ունենալու է միջազգային դպրոցը քաղաքի առաջընթացում: «Այսօրվանից Դիլիջանում բաբախելու է նոր զարկերակ, մեր քաղաքի կյանքում սկսվելու է մի նոր ժամանակաշրջան և մեզնից յուրաքանչյուրը պետք է դառնա դրա մասնիկը և կերտողը»:

Միջոցառմանը ճոխ համերգային ծրագրով հանդես եկավ «D’Black Blues Orchestra» խումբը, որի մենակատարն է Վլադիմիր Ավետիսյանը: Խմբում ընդգրկված էին կատարողներ ԱՄՆ-ից Ռուսաստանից, Ֆրանսիայից, Իսպանիայից և Շվեյցարիայից: Միջոցառմանը մասնակցում էին Տավուշի մարզպետ Արմեն Ղուլարյանը, կառավարության անդամներ, հանրապետական և մարզային լրատվամիջոցների ներկայացուցիչներ:

2013-09-03
Նշվեց Գիտելիքի օրը
Սեպտեմբերի 1-ին տոնական տրամադրություն էր քաղաքի դպրոցներում և ուսումնական մյուս հաստատություններում: Ամենուր Գիտելիքի օրվան նվիրված հանդիսություններ էին, թևածում էր ուրախ երգն ու պարը: Տոնի կապակցությամբ դպրոցներ այցելեցին Դիլիջանի քաղաքապետ Արմեն Սանթրոսյանը, փոխքաղաքապետ Արմեն Մակարյանը, քաղաքապետարանի կրթության ոլորտի պատասխանատու աշխատակիցները, ովքեր շնորհավորելով միջոցառումների մասնակիցներին, անդրադարձան նաև քաղաքի կրթական ոլորտի զարգացման խնդիրներին և հեռանկարներին, կապված նաև միջազգային դպրոցի ծրագրի, ՙԳիտելիք հանուն զարգացման կենտրոնի» գործունեության և նորաստեղծ «ԱՅԲ» կենտրոնի հետ: Նոր ուսումնական տարին պատրաստ դիմավորեցին բոլոր կրթական հաստատությունները: Ամռան ամիսներին կատարվել են առաջնահերթ վերանորոգման աշխատանքներ: Դպրոցի տնօրենների կողմից ներկայացվեցին նախորդ ուսումնական տարվա ձեռքբերումները և նշվեցին նոր ուսումնական տարվա անելիքները: 230 առաջին դասարանցիներ քաղաքապետարանի կողմից ստացան նվերներ` պայուսակներ ու գրենական պիտույքներ: Հնչեց ավանդական առաջին զանգը` ազդարարելով նոր ուսումնական տարվա սկիզբը:



2013-08-20
Նվիրված էր Հովհաննես Շարամբեյանի ծննդյան 87-ամյակին
Օգոստոսի 17-ին Դիլիջանի երկրագիտական թանգարան-պատկերասրահում բացվեց ՀԽՍՀ վաստակավոր նկարիչ, հանրապետության մշակույթի վաստակավոր գործիչ Հովհաննես Շարամբեյանի ստեղծագործությունների անհատական ցուցահանդեսը: Անվանի նկարչի բազմաբեղուն գործունեության մի զգալի հատվածը կապված է Դիլիջանի հետ: 1947-ին Դիլիջանում հիմնադրել է նկարչական ստուդիա (1970-ից` նկարչական դպրոց), 1958-ին` երկրագիտական թանգարանին կից կիրառական արվեստի թանգարան (1979-ից` Հայաստանի ժողարվեստի պետական թանգարանի մասնաճյուղ): Շարամբեյանի անունով են կոչվում Դիլիջանի գեղարվեստի դպրոցը և իր վերակառուցած Դիլիջանյան հին փողոցը` հանրապետության լավագույն պատմաճարտարապետական համալիրներից մեկը` ՙՀին Դիլիջանը»:
Քաղաքի մշակութային կյանքում ներդրած մեծ ավանդի համար նկարիչն արժանացել էր ՙԴիլիջանի պատվավոր քաղաքացու» կոչման:
Ցուցահանդեսի բացմանը մասնակցում էին հանրապետության ճանաչված նկարիչներ, արվեստասերներ, հանրության և լրատվամիջոցների ներկայացուցիչներ:
Բացելով ցուցահանդեսը, նրա նախկին սան` Երևանի գեղարվեստի ակադեմիայի դոցենտ, նկարիչ Ղազարոս Ղազարյանը բնութագրելով նրա արվեստը, հանգամանալից անդրադարձավ նկարչի դիլիջանյան գործունեությանը:
Ելույթ ունեցան նաև Երևանի գեղարվեստի ակադեմիայի նկարիչ, պրոֆեսոր Լենմիր Բաղդասարյանը, նկարիչ Համլետ Ասատրյանը, Դիլիջանի վետերանների խորհրդի նախագահ Լևոն Ջառահյանը, նրա արվեստի երկրպագու, բժիշկ Իկրամ Հարությունյանը: Նրանք կարևորեցին նաև Շարամբեյան անհատի զուտ մարդկային հատկանիշները, որոնց շնորհիվ նա արժանացել է ինչպես իր սաների` նկարիչների, այնպես էլ մեր համաքաղաքացիների մեծ սիրուն և հարգանքին: Ցուցահանդեսի բացման կապակցությամբ իր երախտագիտությունն արտահայտեց նկարչի որդին` Արամ Շարամբեյանը:


2013-08-07
Փոխվարչապետն այցելեց Դիլիջան
ՀՀ փոխվարչապետ, տարածքային կառավարման նախարար Արմեն Գեւորգյանն այսօր Տավուշի մարզում ծանոթացավ Դիլիջանի միջազգային դպրոցի կառուցման աշխատանքների ընթացքին:
Տավուշի մարզպետ Արմեն Ղուլարյանի Դիլիջանի քաղաքապետ Արմեն Սանթրոսյանի ուղեկցությամբ Արմեն Գեւորգյանն այցելեց դպրոցի շինհրապարակ, տեղեկացավ իրականացվող աշխատանքների մասին: Ծրագրի պատասխանատուները, համապատասխան կառույցների ներկայացուցիչները փոխվարչապետին ներկայացրին շինաշխատանքների հետ կապված ընթացիկ հարցեր, քննարկվեց պետական ֆինանսավորմամբ իրականացվող ծրագրերի ընթացքը, որոնք ուղղված են համալիրն անհրաժեշտ ենթակառուցվածքներով ապահովելուն:
Դիլիջանի միջազգային դպրոցի շինարարությունը սկսվել է 2012թ-ին , եւ նախատեսվում է, որ դպրոցն աշակերտներ կընդունի 2014-ի սեպտեմբերից: Դպրոցը կառուցվում է նոր տեխնոլոգիաների կիրառմամբ, որոնք Հայաստանում առաջին անգամ են օգտագործվում:
Տավուշի մարզ կատարած այցի ընթացքում փոխվարչապետը մարզպետ Ա. Ղուլարյանի, Դիլիջանի քաղաքապետ Ա. Սանթրոսյանի եւ այլ պատասխանատուների մասնակցությամբ քննարկեց քաղաքում իրականացվող խոշոր ներդրումային ծրագրերի ընթացքը: Մասնավորապես`ներկայացվեց Կենտրոնական բանկի Ուսումնահետազոտական կենտրոնի, Պետական եկամուտների կոմիտեի Ուսումնական կենտրոնի կառուցման ծրագրերի կատարողականը, անդրադարձ կատարվեց քաղաքի զարգացմանն ուղղված` անհրաժեշտ ենթակառուցվածքների ստեղծմանն առնչվող հարցերի:



2013-07-30
Դիլիջանի ներքաղաքային տրանսպորտը չի թանկացել
Ի պատասխան Դիլիջանում ներքաղաքային տրանսպորտի թանկացման վերաբերյալ լրատվամիջոցներում տարածված լուրերի հայտնում ենք, որ դրանք չեն համապատասխանում իրականությանը:

Դիլիջանում ուղեվարձը նախկինի նման չափահաս քաղաքացիների համար մնում է 70 դրամ, դպրոցականների համար` 30:



Դիլիջանի քաղաքապետարան


2013-06-17
ՖԻԴԵ-ի կանանց Գրան Պրի. Դիլիջան- 2013
Հունիսի 15-ին Դիլիջանում մեկնարկեց ՖԻԴԵ-ի կանանց Գրան Պրի մրցաշարի երկրորդ շրջափուլը: Այն նվիրված է Տիգրան Պետրոսյանի տարած հաղթանակի 50-ամյակին: Մրցաշարի բացման հանդիսավոր արարողությունը կայացավ քաղաքի ամֆիթատրոնում: ՀՀ նախագահ, Հայաստանի շախմատի ֆեդերացիայի նախագահ Սերժ Սարգսյանի և իր անունից ներկաներին ողջունեց ՀՀ վարչապետ Տիգրան Սարգսյանը: Ապա ելութ ունեցավ ՖԻԴԵ-ի նախագահ Կիրսան Իլյումժինովը: Հաջողություններ մաղթելով մրցաշարի մասնակիցներին, իրենց ելույթներում վարչապետը և ՖԻԴԵ-ի նախագահը անդրադարձան այն մեծագույն ներդրմանը, որ կատարել է Տիգրան Պետրոսյանը` կրկնակի անգամ նվաճելով շախմատի աշխարհի թագը և նպաստելով մեր երկրում շախմատային ավանդույթների զարգացմանը: Նրանք նաև անդրադարձան Հայաստանում մարզաձևին ցուցաբերվող առանձնահատուկ մոտեցմանը և անձամբ հանրապետություն նախագահ Սերժ Սարգսյանի ներդրած մեծ ավանդին: Միջոցառմանը ներկա էին ՀՀ մշակույթի նախարար Հասմիկ Պողոսյանը, Տավուշի մարզպետ Արմեն Ղուլարյանը, Դիլիջանի քաղաքապետ Արմեն Սանթրոսյանը, ՀՀ շախմատի ֆեդերացիայի փոխնախագահ Սմբատ Լպուտյանը, մրցաշարի վճռաբեկ հանձնաժողովի նախագահ, կանանց աշխարհի 5-րդ չեմպիոնուհի, կանանց համաշխարհային օլիմպիադաների 11-ակի հաղթող Նոնա Գամփրինդաշվիլին, մայրաքաղաքից և մարզից ժամանած հյուրեր, սպորտի և արվեստի երկրպագուներ: Մրջոցառմանը նվիրված համերգային ծրագրում Հայաստանի պետական ֆիլհարմոնիկ նվագախմբի կատարմամբ հնչեցին հայ և համաշխարհային դասական կոմպոզիտորների ստեղծագործություններ, ելույթ ունեցան Շուշան Պետրոսյանը, ֆիլհարմոնիկի մենակատարներ Հովհաննես Այվազյանը, Իրինա Զաքարյանը: Պարային կատարումներով հանդես եկան «Բերդ» և մանկական` «Արևներ» պարի համույթները: Միջոցառման ավարտին հնչեց Ա. Խաչատրյանի «Սուսերով պարը»: Հունիսի -16-ին քաղաքի երկրագիտական թանգարան- պատկերասրահում սկսվեց մրցամարտը, որտեղ իրենց ուժերն են չափում աշխարհի 12 ուժեղագույն շախմատիստուհիները: Մրցամարտը կտևի մինչև հունիսի 28-ը:
ՖԻԴԵ- ի կանանց Գրան Պրի` Դիլիջան -2013-ի մասնակիցներն են`

1. Կանանց աշխարհի չեմպիոնուհի, միջազգային գրոսմասյտեր Աննա Ուշինինա (Ուկրաինա)

2.Միջազգային գրոսմայստեր Համփի Կոներու (Հնդկաստան)

3 Միջազգային գրոսմայստեր Աննա Մուզիչուկ (Հնդկաստան)

4. Միջազգային գրոսմայստեր Նանա Ձագնիձե (Վրասատան)

5. Միջազգային գրոսմայստեր Անտոանետա Ստեֆանովա (Բուլղարիա)

6. Միջազգային վարպետ Բելա Խոտենաշվիլի (Վրաստան)

7. Միջազգային գրոսմայստեր Տատյանա Կոսինցևա (Ռուսաստան)

8. Միջազգային գրոսմայստեր Վիկտորիա Չմիլիտե (Լիտվա)

9. Միջազգային գրոսմայստեր Հարիկա Դրոնավալի, (Հնդկասատան)

10. Միջազգային գրոսմայստեր Էլինա Դանիելյան (Հայաստան)

11. Կանանց միջազագյին գրոսմայստեր Օլգա. Գիրյա (Ռուսաստան)

12. Կանանց միջազգային գրոսմայստեր Բաթչիմեգ Տուվշինտուգս (Մոնղոլիա)

Մրցաշարի գլխավոր մրցավարն է միջազգային կարգի մրցավար Արմեն Նիկողոսյանը (Հայաստան)

2013-06-11
ՄԱԿ-ի անկյուն` «Գիտելիք հանուն զարգացման» կենտրոնում
ՄԱԿ-ի հայաստանյան գրասենյակը շարունակում է կարևորել երիտասարդության հնարավորությունների ընդլայնումը մարզերում: Այդ ուղղությամբ հերթական միջոցառումը հունիսի 10-ին ՄԱԿ-ի անկյունների բացումն էր ԵՊՀ-ի Իջևանի մասնաճյուղի գրադարանում, Դիլիջանի ՀՀ կենտրոնական բանկի «Գիտելիք հանուն զարգացման» կենտրոնում և Ստեփանավանի կենտրոնական գրադարանում: ՄԱԿ ՀՏՎ կողմից ՄԱԿ –ի նորաբաց անկյուններին տրամադրվեց ավելի քան 2,500 միավոր գրականություն, պաստառներ, գրքույկներ և այլ հրատարակումներ` թողարկված Նյու Յորքում, Վիեննայում և Ժնևում տեղակայված ՄԱԿ –ի գրասենյակների, ինչպես նաև Հայաստանում գործող ՄԱԿ –ի գործակալությունների, հիմնադրամների և ծրագրերի կողմից: Տրամադրված գրականությունը բազմաբնույթ է և վերաբերում է բոլոր այն ոլորտներին, որտեղ ՄԱԿ –ը իրականացնում է իր գործունեությունը: Այժմ հասարակության տարբեր խավերի ներկայացուցիչներն ավելի մեծ հնարավորություն կունենան ծանոթանալու ՄԱԿ –ի արժեքների, համաշխարհային օրակարգի և ՄԱԿ –ի հայաստանյան գրասենյակի գործունեության հետ: Դիլիջանի «Գիտելիք հանուն զարգացման» կենտրոնում կայացած միջոցառմանը մասնակցում էին Դիլիջանի քաղաքապետ Արմեն Սանթրոսյանը, ՄԱԿ ՀՏՎ ներկայացուցիչ Մարիա Դոցենկոն, քաղաքապետարանի պատասխանատու աշխատակիցներ, տեղական և մարզային լրատվամիջոցների ներկայացուցիչներ:

2013-05-24
Դիլիջանի քաղաքապետ Ա. Սանթրոսյանի շնորհավորական ուղերձը Վերջին զանգի կապակցությամբ
Սիրելի՛ շրջանավարտներ, Շնորհավորում եմ բոլորիդ դպրոցական ուսումնառությունն ավարտելու կապակցությամբ:
Համոզված եմ, որ գեղեցիկ ավանդույթի վերածված տոնական այս օրը հարազատ կրթօջախում հնչող վերջին զանգն ուղեկցելու է ձեզ ողջ կյանքի ընթացքում՝ հաճելի ու բարի հիշողություններ արթնացնելով դպրոցական մտերմիկ ու ջերմ միջավայրի, դասընկերների, սիրելի ուսուցիչների մասին:
Հուսով եմ, դպրոցական տարիներին ձեռք բերած գիտելիքներն ու ունակությունները կօգնեն ձեզ վստահորեն ոտք դնելու մեծ կյանքի ասպարեզ, իբրեւ պետության արժանավոր քաղաքացիներ՝ ձեր նպաստը բերելու մեր պետության հետագա զարգացման ու բարգավաճման գործում՝ արդարացնելով ձեր ծնողների եւ ուսուցիչների հույսերն ու ակնկալիքները, իրականություն դարձնելով ձեր ձգտումներն ու երազանքները:
Բարի երթ ու կանաչ ճանապարհ եմ մաղթում ձեզ հետագա ողջ կյանքի ընթացքում, հաջողություն ձեր հետագա բոլոր ձեռնարկումներին:

2013-05-20
«Պատիվ ունեմ ներկայանալու»
Բանակ–հասարակություն կապի ամրապնդման, զորամասերի և հանրության, հասարակական կազմակերպությունների հետ շփումները ավելի սերտացնելու նպատակով ՀՀ վարչապետի և պաշտպանության նախարարի նախաձեռնությամբ զորամասերում անց է կացվում «Պատիվ ունեմ ներկայանալու» անվամբ միջոցառումների շարք: Այս միջոցառումների շրջանակներում` մայիսի 19-ին Դիլիջանի մշակույթի պալատում զորամասի հրամանատարության կողմից կազմակերպվեց հանդիպում հանրության և ծառայողների ծնողների հետ: Հնչեց հայոց պետական հիմնը, ներս բերվեցին հանրապետության և զորամասի մարտական դրոշները: Հրամանատարի տեղակալ, կապիտան Վ. Ստեփանայնի ներածական խոսքից հետո զորամասի հրամանատար, փոխգնդապետ Ա. Գյոզալյանը հանրությանը ներկայացրեց իր կենսագրությունը: Հրամանատարը նաև ներկայացրեց զորամասի տարեգրությունը, որը կարևոր դերակատարում ունի պաշտպանության համակարգում և բազմիցս արժանացել է «Լավագույն տանկային զորամաս» պատվաբեր կոչման:Հրամանատարը նաև անդրադարձավ զորամասի առօրիային, զինվորների կենցաղային պայամններին և հանգստի կազմակերպմանը: Զորամասի և քաղաքի ավագ դպրոցի համագործակցությանը անդրադարձան զորամասի հրամանատարի տեղակալ` կապիտան Վ, Ստեփանյանը և դպրոցի աշակերտական խորհրդի նախագահ Ա. Պետրոսայնը: Զինվորների հետ տարվող դաստիարակչական աշխատանքների մասին խոսեց զինավանի հոգևոր սպասավոր Հովհաննես Մարտիրոսյանը: Ներկաները բավականությամբ ունկնդրեցին ավագ դպրոցի սաների գեղարվեստական եույթները: Ելույթ ունեցան զինվորական նվագախմբի դիրիժոր , լեյտենանտ Սպարտակ Պետրոսայնը, շարքայիններ Կարեն Պողոսյանը և Սիմոն Խաչատրյանը: Միջոցառման ավարտին հրամանատարը հրավիրեց ծնողներին զորամաս, տեղում ծանոթանալու ծառայողների կենցաղային պայմաններին:

2013-05-18
Աշխատանքի տոնավաճառ Դիլիջանում
Մայիսի 17-ին ՀՀ աշխատանքի և սոցիալական հարցերի նախարարության «Զբաղվածության պետական ծառայություն» գործակալության նախաձեռնությամբ Դիլիջանում կազմակերպվեց աշխատանքի տոնավաճառ: Մշակույթի պալատի նախասրահում տարբեր ոլորտների 28 գործատուների կողմից ներկայացված էին շուրջ 70 առկա և 11 սպասվելիք թափուր աշխատատեղերի առաջարկներ: Այցելուները լիովին հնարավորություն ունեցան մանրակրկիտ ծանոթանալ առաջարկվող աշխատանքային պայմաններին, ձեռք բերվեցին համապատասխան պայմանավորվածություններ: Աշխատանքի տոնավաճառը բավականին բազմամարդ էր: Յուրաքանչյուր գործատու կազմակերպություն իր սպասարկման սեղանի մոտ համապատասխան մասնագետների և պատասխանատու ներկայացուցիչների կողմից պատասխանում էր դիմորդներին: Զբաղվածության խնդիրների լուծման առաջնայնության և դրա իրականացման ուղղությամբ նման միջոցառումների արդյունավետության մասին խոսեցին Դիլիջանի քաղաքապետ Արմեն Սանթրոսյանը, «Զբաղվածության պետական ծառայություն» գործակալության պետ Արտյոմ Մանգասարյանը և Դիլիջանի զբաղվածության տարածքային կենտրոնի տնօրեն Ռոբերտ Հովհաննիսյանը: Նման տոնավաճառ Դիլիջանում կազմակերպվում է երկրորդ անգամ: Հատկանշական է, որ գնալով ավելի է սերտանում զբաղվածության կենտրոնի և առանձին հիմնարկ ների ու կազմակերպությունների համագործակցությունը: Զբաղվածության կենտրոնի հետ ակտիվ համագործակցելու համար «Հաղարծին» հյուրանոց-ռեստորանային համալիրի գործադիր տնօրեն Անահիտ Մուրադյանը, Դիլիջանի պետական քոլեջի տնօրեն Գրետա Թամրազյանը և «Դիլնետ սերվիս.» հկ-ի տնօրեն Աշոտ Հովհաննիսյանը արժանացել են «Զբաղվածության պետական ծառայություն » գործակալության շնորհակալագրերի:

2013-05-10
Հանդիսավոր արարողություն նվիրված Հաղթանակների տոնին
Մայիսի 9-ին` հուշարձանային համալիրում հազարավոր դիլիջանցիներ էին մասնակցում Հայրենական մեծ պատերազմում տարած հաղթանակի 68-ամյակին և Շուշիի ազատագրման և արցախյան բանակի կազմավորման 21-ամյակին նվիրված տոնական արարողությանը: Քաղաքապետարանի, զինվորականության, աշխատանքային կոլեկտիվների և կազմակերպությունների կողմից ծաղիկներ և ծաղկեպսակներ դրվեցին Հայրենական մեծ պատերազմում զոհված դիլիջանցիների հիշատակը հավերժացնող հուշարձանին և Արցախյան գոյամարտում ընկած ազատամարտիկների հիշատակը հավերժացնող հուշակոթողին: Զոհվածների հիշատակին խոնարհումի խոսք ասաց Դիլիջանի քաղաքապետ Արմեն Սանթրոսյանը: Ելույթ ունեցան նաև զորամասի հրամանատար, փոխգնդապետ Արմեն Գյոզալյանը, հրամանատարի տեղակալ, կապիտան Վահան Ստեփանյանը, Դիլիջանի վետերանների խորհրդի նախագահ Լևոն Ջառահյանը և Հաղարծնի վանահայր Արիստակես վարդապետ Այվազյանը: Բանակ-հասարակություն կապի ամրապնդման և երիտասարդության ռազմահայրենասիրական դաստիարակության գործում ներդրած ավանդի համար զորամասի հրամանատարության կողմից Դիլիջանի քաղաքապետ Արմեն Սանթրոսյանը արժանացել է շնորհակալագրի, իսկ մի խումբ վետերաններ` պատվոգրերի, որոնք հանադիսավոր պայմաններում հանձնեց զորամասի հրամանատար, փոխգնդապետ Արմեն Գյոզալյանը: Պատվոգրեր և շքանշաններ հանձնվեցին մարտական բարձր պատրաստությամբ աչքի ընկած զինվորներին և սպաներին: Զինվորները ցուցադրեցին նաև ռազմական վարժանքի հմտություններ:

Միջոցառումը եզրափակվեց զինվորականների հանդիսավոր քայլերթով:

2013-05-03
Ծառատունկ «Դիլիջան» ազգային պարկում
ՀՀ բնապահպանության նախարարարությունը հանդես էր եկել նախաձեռնությամբ Մայիսի 1-ին`, աշխատավորների միջազգային օրը «Դիլիջան» ազգային պարկում կատարել ծառատունկ: Մայիսի 1-ը, ինչպես նշեց ՀՀ բնապահպանության նախարարի պաշտոնակատար Արամ Հարությունյանը` ընտրված էր աշխատանքը փառաբանելու և բնության նկատմամբ հոգատարութուն դրսևորելու խորհրդով:
Նախաձեռնությանը միացել էին Տավուշի մարզպետրանը, Դիլիջանի քաղաքապետարանը, միջազգային դպրոցի ծրագիրն իրականացնող «Քեմպ Վենչուրս» ընկերությունը, «Դիլիջան» ազգային պարկի կոլետիվը: Այդ օրը Պարզ լճի հանգստյան գոտու 5-րդ կիլոմետրում տնկվեց շուրջ 1000 ծառ: Ծառատունկին մասնակցում էին և ներկաներին տոնի առթիվ շնորհավորեցին ՀՀ բնապահպանության նախարարի պաշտոնակատար Արամ Հարությունյանը, Տավուշի մարզպետ Արմեն Ղուլարյանը, Դիլիջանի քաղաքապետ Արմեն Սանթրոսյանը, «Քեմպ Վենչուրս» ընկերության տնօրեն Էդգար Մանուկյանը: Նրանք միջոցառման ավարտին պատասխանեցին նաև հանրապետական և տեղական լրատվամիջողների ներկայացուցիչների հարցերին, որոնք հիմնականում ուղղված էին անտառվերականգնման խնդիրներին: Դիլիջանի քաղաքապետ Արմեն Սանթրոսյանը նշեց, որ որպես առողջարանային քաղաք, մշատպես քաղաքապետարանի ուշադրության կենտրոնում է կանաչ տարածքների պահպանման և ավելացման խնդիրը և բացի ազգային պարկի իրականացված աշխատանքներից, համայնքի միջոցներով նույնպես յուրաքանչյուր տարի կատարվում է ծառատունկ: Այս գարնանը նույնպես քաղաքի տարբեր հատվածներում տնկվել է 1000-ից ավել ծառ և թուփ:

2013-04-23
Հայաստանի «Դիլիջան» միջազգային դպրոցում երեխաների մոտ 70 տոկոսն անվճար կրթություն կստանա. Ռուբեն Վարդանյան
Հայաստանի «Դիլիջան» միջազգային դպրոցում երեխաների մոտ 70 տոկոսն անվճար կրթություն կստանա, քանի որ դա ոչ թե կոմերցիոն, այլ բարեգործական նախագիծ է։ Այս մասին ասել է «Տրոյկա Դիալոգի» նախկին ղեկավար, Sberbank SIB-ի համաղեկավար, «Դիլիջան» միջազգային դպրոց նախագծի հիմնադիր Ռուբեն Վարդանյանը՝ Ведомости-ին տված հարցազրույցում:

««Դիլիջան» նախագծում, որ ես ու կինս իրականացնում ենք Հայաստանում, երեխաների 70 տոկոսն անվճար կրթություն է ստանալու, քանի որ նրանց վճարումներ են արվելու մասնավոր կարգով հավաքված կրթաթոշակային ֆոնդից: Մեզ համար դա ոչ թե կոմերցիոն, այլ բարեգործական նախագիծ է»,- ասել է Վարդանյանը՝ նշելով, որ այսօր բազմամշակութային դաստիարակությունը կրթության կարևոր բաղադրիչ է դառնում, իսկ ինքը՝ համակարգը՝ ոլորտ, որտեղ մեծ գումար է ներդրվում՝ ինչպես պետական, այնպես էլ մասնավոր:

Հայաստանի «Դիլիջան» միջազգային դպրոցը կդառնա Հայաստանի և ԱՊՀ տարածքի առաջին էլիտար դպրոց-պանսիոնը: Այնտեղ սովորելու են 13-18 տարեկան տղաներ և աղջիկներ: Դպրոցի կոնցեպցիան ենթադրում է բարձր ակադեմիական ուսում, ընդհանուր իդեալներ և կյանքի ուղղորդիչներ ունեցող ստեղծագործ, պատասխանատու անձանց ձևավորում: Այստեղ ուսուցումը վարվելու է անգլերենով, արտասահմանից հրավիրված մասնագետների կողմից:

Նախագծի իրականացումը համակարգում են նաև մասնագետներ՝ Անգլիայից, Ֆրանսիայից, ԱՄՆ-ից, Հայաստանից և Ռուսաստանից:

Ռուբեն Վարդանյանն ու իր տիկինն այս նախագիծը ներառել են հայկական գյուղերի և քաղաքների վերածնման նախագծերի շարքում: Նախատեսվում է, որ մինչև 2020 թ. դպրոցում 600 երեխա կսովորի, նրանցից 200-ը՝ ՀՀ քաղաքացիներ:


tert.am

2013-04-05
01.01.2013թ. – 01.04.2013թ. ընկած ժամանկահատվածում քաղաքապետարանի կատարած աշխատանքները
Դիլիջան համայնքի 2013թ. բյուջեն մշակվել է` հիմք ունենալով համայնքի 2013-2016թթ. քառամյա զարգացման ծրագիրը:
Համայնքի գործունեությունը մեծապես կախված է բյուջետային գործընթացի լավ կազմակերպումից, բյուջեի եկամուտների արդյունավետ հավաքագրումից և միջոցների խնայողական օգտագործումից:
2013թ. առաջին եռամսյակում տեղական մուտքերի արդյունավետ հավաքագրման շնորհիվ հավաքագրվել է 71655.8 հազ.դրամի եկամուտ, որը հնարավորություն է տալիս ավելի իրատեսորեն կանխագծելու առաջիկա անելիքները:
Քաղաքապետարանի ուշադրության կենտրոնում են սոցիալապես անապահով ընտանիքները: 13 անապահով ընտանիքների տրվել է դրամական օգնություն:
Յուրաքանչյուր նորածին երեխաների համար 30 ընտանիքի տրվել է միանվագ դրամական օգնություն:
Դիլիջան քաղաքում գործող ՙՀույսի Կամուրջ՚ հասարակական կազմակերպություն հաճախող հաշմանդամ երեխաների ուսումնադաստիարակչական աշխատանքները առավել արդյունավետ կազմակերպելու և անցկացնելու համար համայնքի բյուջեից յուրաքանչյուր ամիս ցուցաբերվում է ֆինանսական աջակցություն:
Հայրենական մեծ պատերազմի կին մասնակիցներին մարտի 8-ի կապակցությամբ տրամադրվել է դրամական օգնություն:
Պատվիրվել է Երաժշտականա դպրոցի վերանորոգման աշխատանքների,Մյասնիկյան փողոցի քաղաքային շուկայի հատվածից դեպի Մ. Գորկի փողոց տանող ոլորապտույտին հարակից հենապատի վերանորոգման աշխատանքների, Հակոբջանյան և Մյասնիկյան փողոցների հատման հատվածից մինչև Շահումյան փողոցի վերջնամասի կամուրջն ընկած փողոցների, Գետափնյա և Կալինինի փողոցների մայթերի հիմնանորոգման և գազոնների վերականգնման աշխատանքների, քաղաքի ներհամայնքային նշանակության ճանապարհների ավտրտրանսպորտի երթևեկելի մասի փոսային նորոգման աշխատանքների, ինչպես նաև Անդրանիկի թաղամասի որոշ հատվածների փողոցային լուսավորության ցանցի վերակառուցման աշխատանքների նախագծանախահաշվային փաստաթղթերիթղթերի կազմումը:
Հիմնանորոգվել է Շահումյան փող. թիվ 22 հասցեի բազմաբնակարան բնակելի շենքի տանիքը: Կատարվել է Գետափնյա փ. Բնակելի շենքերի շքամուտքերի պատուհանների և դռների փոխման աշխատանքներ:
Քաղաքապետարանը միջոցներ է ձեռնարկում իր ենթակայության ենթակառույցների նյութատեխնիակական բազայի ամրապնդման ուղղությամբ:
Զգալի աշխատանքներ են իրակնացվել լուսավորության, աղբահանության և սանիտարական մաքրման բարելավման, այն առողջարանային քաղաքին վայել կազմակերպեու ուղղությամբ:
Քաղաքապետարանի կողմից անհրաժեշտ ուշադրություն է ցուցաբերվում սպորտի զարգացմանը :

2013-03-26
Դիլիջանը կհյուրընկալի շախմատի կանանց միջազգային մրցաշարի մասնակիցներին
Հունիսին Դիլիջանը գտնվելու է աշխարհի շախմատասերների ուշադրության կնտրոնում: ՖԻԴԵ-ն հրապարակել է շախմատի կանանց Գրան Պրի նոր շրջափուլի վեց մրցաշարերի անցկացման վայրերն ու ժամկետները: Համաձայն ՖԻԴԵ-ի որոշման այս կարևորագույն միջազգային մրցաշարի փուլերից մեկը կանցկացվի Դիլիջանում:

2013-03-22
Դիլիջան քաղաքի շրջակա միջավայրի իրավիճակի վերլուծություն
Մարտի 21-ին և 22-ին Դիլիջանի Օրհուս կենտրոնում կայացավ «Կովկասյան տարածաշրջանային բնապահպանական կենտրոն»-ի փորձագետների հերթական հանդիպումը շահագրգիռ կազմակերպությունների, համայնքի ավագանու, հասարակական կազմակերպությունների և լրատվության ներկայացուցիչների հետ: Փորձագետների կողմից ներկայացվեց և քննարկվեց Դիլիջան քաղաքի շրջակա միջավայրի իրավիճակի վերլուծությունը և կատարվեց տվյալների վերանայում: Քննարկման ընթացքում մշակվեց գործողությունների պլան: Բնապահպանական խնդիրները գործողությունների ծրագրում առավել արդյունավետ ընդգրկելու նպատակով փորձագետներն առանձին հանդիպում–քննարկումներ անցկացրեցին նաև կենտրոնական բանկի ուսումնամեթոդական կենտրոնի և քոթեջային համալիրի շինարարությունն իրականացնող «Ռենկո-ԱրմԷստեյդ» ընկերության, ինչպես նաև քաղաքում աղբահանություն կատարող և շինարարություն իրականացնող այլ կազմակերպությունների ներկայացուցիչների հետ:

2013-03-18
Համագործակցության լայն հեռանկարներ
Մարտի 15-ին Սևծովյան երկրների համագործակցության ծրագրի շրջանակներում Դիլիջան ժամանեց Ռումինիայի, Մոլդովայի և Վրաստանի 23 քաղաքների քաղաքապետերի պատվիրակությունը: Պատվիրակության կազմում էին նաև ճարտարապետներ և քաղաքապետարանների պատասխանատու աշխատակիցներ: Այցը կազմակերպվել էր Ուրբան կայուն զարգացման հիմնադրամի նախաձեռնությամբ, որն իրականացնում է ԵՄ կողմից ֆինանսավորվող միջազգային ծրագիր` որի կարևոր նպատակներից է ուղիղ կապեր ստեղծել Հայաստանի, Ռումինիայի, Մոլդովայի և Վրաստանի քաղաքների միջև` եվրոպական ստանդարտներին համապատասխան քաղաքային զարգացման համատեղ ծրագրեր նախանշելու նպատակով: Այցին նախորդել էր Երևանում կազմակերպված կոնֆերանսը` նշված երկրների քաղաքների պատվիրակությունների մասնակցությամբ: Դիլիջանի քաղաքապետարանում ` Դիլիջանի, Վրաստանի Ցխալտուբո և Մոլդովայի Վադուլ Լուի Վոդա քաղաքների միջև ստորագրվեց բարեկամության հուշագիր: Եռակողմ հուշագրով քաղաքները հռչակվում էին քույր քաղաքներ, նշված էին փոխգործակցության ոլորտներն ու հիմնական անելիքները: Հուշագիրը ստորագրեցին Դիլիջանի քաղաքապետ Արմեն Սանթրոսյանը, Վադուլ Լուի Վոդայի քաղաքապետ Յուրի Օնոֆռիչուկը և Ցխալտուբոյի փոխքաղաքապետ Դավիթ Չիրգադձեն:
Քաղաքապետարանում կազմակերպված ընդունելությունից հետո հյուրերը քաղաքապետ Արմեն Սանթրոսյանի ուղեկցությամբ շրջեցին քաղաքում, այցելեցին ՀՀ կենտրոնական բանկի «Գիտելիք հանուն զարգացման» նորաբաց կենտրոն, «Հին Դիլիջան» պատմամշակութային համալիր և երկրագիտական թանգարան:


2013-02-27
Մեկնարկը տրված է
Փետրվարի 27-ին Դիլիջանում տրվեց սոցիալական բնակարանաշինության ծրագրի մեկնարկը:
Այս կապակցությամբ Դիլիջան էին ժամանել նաև ԱՍԲԱ-ի ներկայացուցիչները Հոլանդիայից: Քաղաքապետարանում կազմակերպված հանդիպմանը մասնակցում էին Դիլիջանի քաղաքապետ Արմեն Սանթրոսյանը, ԱՍԲԱ-ի խորհրդի նախագահ Ռուդի դե Յոնգը, սոցիալական բնակարանաշինության նիդեռլանդական ծրագրի ղեկավար Մարկ վան Վիիսը, Վոնբրոն կազմակերպության ներկայացուցիչ Դիկ Ռեյնդերը, ԱՍԲԱ հիմնադրամի տնօրեն Արա Նազինյանը, Աֆինա Պալադի շինարարական ընկերության տնօրեն Արթուր Գրիգորյանը, լրատվամիջոցների ներկայացուցիչներ:
Հանդիպումից հետո մասնակիցները ուղևորվեցին Շամախյան թաղամաս և շինտեղամասում կատարվեց հիմնարկեքի արարողություն:
ԱՍԲԱ հիմնադրամի տնօրեն Արա Նազինյանի խոսքով` Դիլիջանում մասնավոր կազմակերպությունների ներգրավմամբ այս տարի նախատեսվում է կառուցել 20-25 բանկարան, ծրագրի առաջին փուլի շրջանակներում` 50-52 բնակարան:
Դիլիաջնում կառուցվող բնակարանները անժամկետ վարձակալության են տրվելու ցածր և միջին եկամուտնոր ունեցողներին, քաղաքում ժամանակավորապես բնակվողներին: Շահառուները հնարավորությւոն են ունենալու նաև ձեռք բերել այդ բանկարանները:
Քաղաքապետ Արմեն Սանթրոսյանը իր խոսքում նշեց, որ բացի այն կարևոր հանգամանքից, որ ունենալու է ծրագիրը քաղաքի բնակարանային խնդիրների լուծման գործում, նաև նպաստելու է նոր աշխատատեղերի ստեղծմանը: Քաղաքապետն ավելացրեց, որ ծրագրում ընգրկվելու համար արդեն քաղաքապետարան են դիմել շուրջ 200 բնակիչներ, որոնց մի մասն էլ ցանկություն է արտահայտել ներգրավվելու շինարարությունում:
Հանդիպման և հիմնարկեքի արարողության ընթացքում կողմերը նաև իրենց գոհունակությունն արտահայտեցին համագործակցության վերաբերյալ և հույս հայտնեցին , որ շինարարական աշխատանքները կընթանան պահանջվող ժամկետներում:

2013-02-12
Դիլիջանի գեղարվեստի դպրոցը` միջազգային մրցույթում
Դիլիջանի` Հովհաննես Շարամբեյանի անվան գեղարվեստի դպրոցը մշտապես ակտիվ մասնակցություն է ունենում հանրապետական և միջազգային գեղանկարչական մրցույթներին և արժանանում բարձր պարգևների ու դրվատանքի: Հերթական հաղթանակը չուշացավ: Դպրոցը 2012թ-ին մասնակցելով Չեխիայի Լիդիցե քաղաքում կայացած միջազգային նկարչական 40-րդ հոբելյանական մրցույթին` ունեցավ մեծ ձեռքբերումներ: Միջազգային մրցույթին ներկայացվել էին 67 երկրների երեխաների 26 հազար աշխատանքներ: Դպրոցի յոթամյա սան Աննա Գևորգյանը լավագույն գեղանկարչական ստեղծագործության համար արժանացել է մրցանակաբաշխության ամենաբարձր պարգևին` «Լիդիցե վարդ» մեդալին և դիպլոմին: Նույն դպրոցի սաներ Էռնա Զանդյանը և Եվա Բոջիկյանը արժանացել են դիպլոմների: Լավագույն գեղանկարչական և գրաֆիկական աշխատանքներ ներկայացնելու համար «Լիդիցե» մեդալի է արժանացել նաև գեղարվեստի դպրոցը: Փետրվարի 11-ին Դիլիջանի` Հովհաննես Շարամբեյանի անվան գեղարվեստի դպրոցում կատարվեց պարգևների հանձնման հանդիսավոր արարողությունը, որին մասնակցում էին Դիլիջանի քաղաքապետ Արմեն Սանթրոսյանը, Հայաստանում Չեխիայի գործերի ժամանակավոր հավատարմատար Պետր Միկիսկան, արվեստագետներ, կրթամշակութային հաստատությունների աշխատակիցներ, հասարակական կազմակերպությունների և լրատվամիջոցների ներկայացուցիչներ: Հանձնելով պարգևները` պրն. Միկիսկան նշեց մրցույթի ողջ կարևորությունը և բարձր գնահատեց Դիլիջանի գեղարվեստի դպրոցի ամենամյա ակտիվ մասնակցությունը միջազգային այդ ստուգատեսին և հույս հայտնեց, որ առաջիկայում ևս ակնկալվում են մեծ հաջողություններ:Պարգևատրվածներին և ներկաներին ջերմորեն շնորհավորեց Դիլիջանի քաղաքապետ Արմեն Սանթրոսյանը:Իր ելույթում դրվատանքի խոսքեր ասելով գեղարվեստի դպրոցի գործունեության վերաբերյալ` նա միաժամանակ անդրադարձավ երեխաների ստեղծագործական կարողությունների զարգացման ուղղությամբ քաղաքում ստեղծվող նոր մեծ հնարավորություններին: Միջոցառումը եզրափակվեց գեղարվեստի դպրոցի նորաբաց պարի խմբի սաների ելույթներով:

2013-02-04
Գործարար-բարերար Արմեն Աբգարյանը արժանացել է Պատվավոր Տավուշեցու կոչման
Գործարար-բարերար, Դիլիջանի պատվավոր քաղաքացի Արմեն Ցոլակի Աբգարյանը մարզում ունեցած ծառայությունների և գործարարության համար մարզխորհրդի որոշմամբ արժանացել է Պատվավոր Տավուշեցու կոչման: Արմեն Աբգարյանը նաև արժանացել է մարզի գործարարների միության «2012թ. լավագույն գործարար» մրցանակին: Փետրվարի 2-ին` «Հաղարծին» հուրանոց-ռեստորանային համալիրի նորաբաց սրահում կատարվեց պարգևների հանձնման արարողություն: Պատվավոր Տավուշեցու հավաստագիրը հանձնեց Տավուշի մարզպետ Արմեն Ղուլարյանը: Գործարար-բարերարին շնորհավորեցին և հետագա հաջողություններ մաղթեցին Դիլիջանի քաղաքապետ Արմեն Սանթրոսյանը, Տավուշի հոգևոր թեմի առաջնորդ տեր Եզնիկ արքեպիսկոպոս Պետրոսյանը, մարզի գործարարների միության նախագահ Սերգեյ Բարսեղյանը: Միջոցառմանը ներկա էին Դիլիջանի փոխքաղաքապետ Արմեն Մակարյանը, Տավուշի մարզի առևտրա-արդյունաբերական պալատի նախագահ Վարդգես Հովակիմյանը, ԵԿՄ մարզային կառույցի ղեկավար Ռուդիկ Դավթյանը, Մատենադարանի գիտաշխատակից, Երևանի պետական համալսարանի դասախոս, պատմական գիտությունների դոկտոր Արծրունի Սահակյանը, գործարարներ, մտավորականության և լրատվամիջոցների ներկայացուցիչներ:

2013-01-29
Դեպի ապահով Հայաստան
Հայաստանի Հանրապետության նախագահի թեկնածու Սերժ Սարգսյանը հունվարի 26-ին այցելեց ՀՀ կենտրոնական բանկի Դիլիջանի ուսումնամեթոդական կենտրոն: Նա շրջեց նորակառույց համալիրում, ծանոթացավ կատարված աշխատանքներին: Դիլիջանը տարածաշրջանային ֆինանսական կենտրոն դարձնելու նախաձեռնությունը պատկանում է հանրապետության նախագահին։ Ուսումնամեթոդական կենտրոնը կառուցվել է ռեկորդային ժամկետներում և բացի իր կարևոր գործառույթներից, նաև ճարտարապետական իմաստով եզակի կառույց է։
Սերժ Սարգսյանը նաև ներկա գտնվեց «Տավուշ» բժշկական կենտրոնի բացմանը: Կենտրոնը ստեղծվել է նախկին պոլիկլինիկայի բազայի հիման վրա։
Կենտրոնի հիմնադիր Հարություն Քուշկյանի հավաստմամբ բժշկական կենտրոնի բոլոր բժիշկներն ու բուժքույրերը համապատասխան վերապատրաստում են անցել: Կենտրոնը հագեցած է ժամանակակից, ունիկալ սարքավորումներով` ճշգրիտ ախտորոշում կատարելու եվ ճշգրիտ բուժում իրականացնելու համար:
Սերժ Սարգսյանի մասնակցությամբ բացվեց նաև «Գիտելիք հանուն զարգացման» կենտրոնը:
Նախկին գրադարանի շենքում, որը հիմնանորոգվել է Կենտրոնական բանկի միջոցներով, ստեղծվել է էլկեկտրոնային գրադարան, դրամների թանգարան, գործելու է նաև պատանեկան ստեղծագործական կարողությունների զարգացման կենտրոնը։

2012-12-27
Դիլիջանի քաղաքապետ Արմեն Սանթրոսյանի շնորհավորական ուղերձը Ամանորի և Սուրբ Ծննդյան առթիվ
Հարգելի համաքաղաքացիներ.
Քաղաքապետարանի աշխատակազմի, համայնքի ավագանու և անձամբ իմ կողմից սրտանց շնորհավորում եմ բոլորիդ Ամանորի և Սուրբ Ծննդյան առթիվ, մաղթում եմ Ձեզ անձնական երջանկություն և արգասաբեր աշխատանքային գործունեություն:
Թող նոր` 2013 թվականը լինի բոլորիս հույսերի և նպատակների իրականացման տարի:
Մենք ապրում ենք քաղաքի զարգացման անչափ պատասխանատու փուլում;
Դիլիջանում իրականացվող ծրագրերը, ոչ միայն իրենց մասշտաբներով, այլև իրենց նշանակությամբ մեծապես նպաստելու են մեր քաղաքի տարբեր ոլորտների արագ և դինամիկ զարգացմանը, նրա համբավի էլ ավելի մեծացմանը:
Դիլիջանի առողջարանային համբավին ավելանալու է տարածաշրջանային ֆինանսական կենտրոնի համբավը, իսկ միջազգային դպրոցը, որի կառուցման աշխատանքները գտնվում են ակտիվ շինարարական փուլում, ոչ միայն նպաստելու է քաղաքի ավելի լայն ճանաչմանը, այլև մեր պատանիների և աղջիկների համար աննախադեպ հնարավորություն է ստեղծելու հարազատ քաղաքում ստանալու միջազգային չափանիշներին համապատասխան կրթություն: Արդեն 2013թ քաղաքային գրադարանում գործելու են պատանեկան ստեղծագործական կենտրոններ, որոնք մեծապես կնպաստեն մեր պատանիների և երիտասարդների ստեղծագործական կարողությունների զարգացմանը, պատրաստ լինելու համահունչ քայլելու 21-րդ դարի առաջընթացին:
Քաղաքի զարգացումը մեծապես նպաստելու է նաև նոր աշխատատեղերի ստեղծմանը, արտագաղթի նվազեցմանը:
Մենք նոր` 2013թ-ին կանենք հնարավորը թեթևացնելու Ձեր հոգսերը և համոզված եմ համատեղ ջանքերի շնորհիվ մեզ կհաջողվի լուծել մեր առջև դրված կարևոր խնդիրները և նոր առաջընթաց արձանագրել ինչպես քաղաքի զարգացման, այնպես էլ մեր ապրելակերպի բարելավման ուղղությամբ:
Կրկին շնորհավորում եմ բոլորիդ` մաղթում նորանոր հաջողություններ:

2012-12-26
2012թ. քաղաքապետարանի կատարած աշխատանքների մասին
2012թ. ընթացքում հավաքագրվել է 290000.0 հազ.դրամի եկամուտ, ինչն ուղղվել է համայնքի սոցիալ-տնտեսական խնդիրների լուծմանը: Համայնքային ենթակայության 13 ոչ առևտրային կազմակերպությունների, քաղաքապետարանի, քաղաքացիական կացության ակտերի գրանցման բաժնի, աղբահանության և սանիտարական մաքրման, ինչպես նաև լուսավորության սպասարկման բնագավառներում ֆինանսավորումները կատարվել են ժամանակին` ծրագրով նախատեսված ծախսերին համապատասխան:
Քաղաքապետարանի ուշադրության կենտրոնում են սոցիալապես անապահով ընտանիքները: Անապահով ընտանիքների երեխաների դասագրքերի վարձավճարը ապահովել է քաղաքապետարանը, այդ նպատակով հատկացվել է 939.4հազ. դրամ:
Յուրաքանչյուր նորածին երեխաjի համար ընտանիքին տրվում է միանվագ դրամական օգնություն:
Դիլիջան քաղաքում գործող «Հույսի Կամուրջ» հասարակական կազմակերպություն հաճախող հաշմանդամ երեխաների ուսումնադաստիարակչական աշխատանքները առավել արդյունավետ կազմակերպելու և անցկացնելու համար համայնքի բյուջեից յուրաքանչյուր ամիս ցուցաբերվում է ֆինանսական աջակցություն:
«Հույսի կամուրջ» Հ/Կ հաճախող սահմանափակ կարողություններով թվով 48 երեխաների համար, ինչպես նաև նախադպրոցական հասակի 33 երեխաների համար ձեռք են բերել և տրվել նվերներ:
«Հույսի Կամուրջ» հասարակական կազմակերպություն հաճախող անապահով ընտանիքների 20 հաշմանդամ երեխաների հատկացվել է գումար քաղաքային տրանսպորտից օգտվելու խնդիրները հօգալու համար: Դիլիջանի թիվ 4 դպրոց հաճախող հենաշարժողական խնդիր ունեցող երեխաների համար դպրոցի մուտքի մոտ կառուցվել է թեքահարթակ:
Դիլիջանի համայնքային ենթակայության նախադպրոցական հիմնարկությունների ավագ նախադպրոցական խմբեր հաճախող թվով 170 երեխաների ավարտական հանդեսի, իսկ 600 երեխաների Ամանորի միջոցառման համար ձեռք են բերվել և տրվել նվերներ:
ՀՀ Զինված ուժերում ծառայության մեկնող զորակոչիկների տրվել են նվերներ, կազմակերպվել է Ամանորի տոնական միջոցառում:
Դիլիջան քաղաքային համայնքի ենթակայության նախադպրոցական հիմնարկությունների թվով 85 աշխատողների տրվում է ֆինանսական աջակցություն հերթական բժշկական ստուգումների անցկացման համար:
Առանձնահատուկ ուշադրություն է դարձվում Հայրենական մեծ պատերազմի վետերանների կարիքներին:
Մեծ շուքով կազմակերպվում է և անցկացվում Հայրենական եծ պատերազմում տարած հաղթանակի տոնը: Հայրենական մեծ պատերազմի վետերաններ անվճար կերպով օգտվում են քաղաքային տրանսպորտից, ազատված են գույքահարկից, մշակույթի պալատում գործում է բարեգործական հիմնադրամ, որի միջոցով 60 հոգու տրվում է անվճար սննունդ: Քաղաքապետարանը միջոցներ է ձեռնարկում իր ենթակայության ենթակառույցների նյութատեխնիակական բազայի ամրապնդման ուղղությամբ: Իրականացվել է ՈՒսանողական, Աբովյան, Մյասնիկյան, Հակոբջանյան, Հովսեփյան, Օրջոնիկիձե փողոցների ավտոտրանսպորտի երթևեկելի մասի ասֆալտբետոնե ծածկի հիմնանորոգման աշխատանքներ:
Կատարվել է Շամախյան, Թախտա թաղամասերի, Թբիլիսյան խճուղու, Կամո, Անդրանիկի, Կալինինի, Հովսեփյան, Մխիթարյան, Սովետների, 26 Կոմիսարների, Զինվորական ավանի շրջակայքի փողոցների, Օրջոնիկիձե1-ին նրբ. դեպի բազմաբնակարան շենքեր տանող ճանապարհահատվածի ավտոտրանսպորտի երթևեկելի մասի ասֆալտի ջարդոնով փոսալցման և հարթեցման աշխատանքներ:
Շամախյան 2 բ և 3 բ հասցեների բազմաբնակարան շենքերի հարակից տարածքները բետոնացվել են: Վերակառուցվել են Առաջին փողոցի 25 հասցեի տանը, Հովսեփյան փողոցի թիվ 18 հասցեի տանը և 26 կոմիսարների 23, 25, 27, 29 տներին սպասարկող աստիճանները: Գետափնյա, Սայաթ-Նովա, Մյասնիկյան, Շահումյան փողոցներում կատարվել է փողոցների նշագծում և ավտոտրանսպորտի երթևեկելի մասում տեղադրվել են ռետինե արգելափակոցներ և ռետինե գունավոր տարբերանշաններ: Վերանորոգվել է Գետափնյա փողոցի վերջնահատվածում գտնվող և Շլորկուտի գերեզմանատներ տանող ճանապարհները: Բարեկարգվել է Շահումյան փողոցի վերջնահատվածից դեպի Պարզ լիճ տանող ճանապարհը, քաղաքի տարբեր հատվածներում տեղադրվել են ծաղկամաններ:
Վերանորոգվել է «Առյուծների աստիճաններ» կոչվող շքասանդուղքի մի հատվածը:
Թիվ 2 մանկապարտեզին հարակից տարածքում կառուցվել է հետիոտնի անցուղի: Իրականացվել է Մյասնիկյան 117 և Մյասնիկյան 144 Ա, Շամախյան 118 հասցեների տներին հարակից հենապատերի վերակառուցում, ինչպես նաև Կալինինի 255 հասցեի տանը հարակից պաշտպանիչ պատի կառուցում: Հենապատեր են կառուցվել նաև Սայաթ-Նովա, ՈՒսանողական, փողոցներում:
Հիմնանորոգվում են Շամախյան 3Ա և Գետափնյա 6, 8 և 12 հասցեների բազմաբնակարան շենքերի վերելակները: Վերականգնվել է Օրջոնիկիձե փողոցի թիվ 65 հասցեի բազմաբնակարան բնակելի շենքի վնասված ճակատային մասը: Գետափնյա 2,4,6,8,10 և 12 հասցեների շենքերի համար ձեռք են բերվել և տեղադրվել մուտքի դռներ ու պատուհաններ: Ամբողջովին հիմնանորոգվել է Շահումյան 22 հասցեի բազմաբնակարան բնակելի շենքի տանիքը: Շահումյան, Մյասնիկյան, Գայի, Կալինինի, Օրջոնիկիձե, Հակոբջանյան, Վ.Անանյանի և Այգեստան փողոցներում իրականացվել է փողոցային լուսավորության համակարգի հիմնանորոգում և համալրում:
ՀՊԾ-ի Սնունդ Աշխատանքի դիմաց» ծրագրի շրջանակներում Դիլիջանի համայնքների միության կողմից հաստատվել և ներկայացվել է ծրագիր, որի շրջանակներում կատարվում է Դիլիջան քաղաքային համայնքի ենթակայության թիվ 5 մանկապարտեզի մասնակի վերանորոգման աշխատանքներ, Շահումյան, Շամախյան փողոցների հեղեղատարի, Մոլդովական փողոցի ջրահեռացման համակարգի և Հակ ոբջանյան, Գայի փողոցների հենապատի վերակառուցման աշխատանքներ: Դիլիջան քաղաքային համայնքի ներդրումը նշված ծրագրերին կատարվել է նյութերի տեսքով:
Մաքսիմ Գորկի հասցեում կառուցվում է քաղաքային զուգարան:
Ձեռք է բերվել և քաղաքի տարբեր հատվածներում տեղադրվել 17 մանկական խաղահրապարակներ: Քաղաքն առավել բարետես դարձնելու, ինչպես նաև զբոսաշրջության սեզոնին նախապատրաստելու նպատակով քաղաքի տարբեր մասերում տեղադրվել են նստարաններ և աղբամաններ: Թաղամասերում տեղադրվել են 21 զրուցատաղավարներ: Քաղաքապետարանը միջոցներ է ձեռնարկում իր ենթակայության ենթակառույցների նյութատեխնիակական բազայի ամրապնդման ուղղությամբ:
ՏԻՄ խրախուսման դրամաշնորհային ծրագրի շրջանակներում Քաունթերփարթ ինթերնեշնլի հայաստանյան կազմակերպության հետ համատեղ իրականացվել է Դիլիջանի թիվ 4 մանկապարտեզի հիմնանորոգման աշխատանքներ:
Թիվ 1 մանկապարտեզում կատարվել է սան.հանգույցների վերանորոգման աշխատանքներ: Մանկապարտեզների համար ձեռք է բերվել փափոկ գույք,ինչպես նաև մահճակալներ:

Դիլիջանի քաղաքային զբոսայգին նոր սեզոնին նախապատրաստելու, ինչպես նաև բնակիչների ակտիվ հանգիստը առավել հարմարավետ և անվտանգ դարձնելու նպատակով իրականացվել է զբոսայգու խաղային ատրակցիոնների վերանորոգման աշխատանքներ:
Իրականացվել է հնգաթև հուշարձանի և օղակաձև խաչմերուկի հարակից տարածքների բարեկարգում և ճարտարապետական ձևավորում:
Տեղադրվել են լուսատուներ և շատրվանների եռագույն լուսադիոդային լուսավորման համակարգ: Զգալի աշխատանքներ են իրակնացվել լուսավորության, աղբահանության և սանիտարական մաքրման բարելավման, այն առողջարանային քաղաքին վայել կազմակերպեու ուղղությամբ: Կազմակերպվել և անց է կացվել սանիտարական մաքրման, բարեկարգման և կանաչապատման միամսյակ: Քաղաքային հրապարակում կազմակերպվել են համաքաղաքային միջոցառումներ նվիրված Երեխաների իրավունքների միջազգային պաշտպանության օրվան և վերջին զանգին: Քաղաքային ամֆիթատրոնում Արտավազդ արվստների ընկերության հետ համատեղ կազմակերպվել է պարային խմբերի հանրապետական փառատոն, շուրջ 1700 մասնակցով:
«Լույս» հիմնադրամի հետ համատեղ կազմակերպվել է միջոցառումների շարք` ցուցահանդես, համերգ, քայլերթ:
«Երկրագիտական թանգարանում կազմակերպվել է բաց դռների օր «Ճանապարհ» խորագրով(ցուցահանդես, հանդիպում արվեստագետի հետ, ասմունքի ցերեկույթ): Կազմակերպվել է միջոցառումների շարք նվիրված Հայաստանի Հանրապետության անկախության օրվան: Կազմակերպվել են Դպրության և գիտելիքի օրվան նվիրված միջոցառումներ, առաջին դասարան հաճախող 200 երեխաների տրվել են պայուսակներ և գրենական պիտույքներ: Հունվարի 27-ին Դիլիջանի զորամասում համայնքի ղեկավարի աջակցությամբ կազմակերպվել է համերգ-հանդիպում նվիրված բանակի օրվան: Հայրենական մեծ պատերազմի կին մասնակիցներին մարտի 8-ի կապակցությամբ տրամադրվել է դրամական օգնություն:
Հիշատակի արարողություն կազմակերպվեց և ծաղկեպսակներ դրվեցին Մեծ եղեռնի զոհերի հիշատակը հավերժացնող հուշարձան-խաչքարին: Մայիսի 9-ին` Հայրենական մեծ պատերազմում տարած հաղթանակի 67-րդ և Շուշիի ազատագրման 20-ամյակի կապակցությամբ կազմակերպվեց միջոցառում, հազարավոր դիլիջանցիներ իրենց հարգանքի տուրքը մատուցեցին զոհվածների հիշատակին:
Դիլիջանի երկրագիտական թանգարանում Բրիտանական խորհուրդը ներկայացրեց «Նորաձևության ճանապարհ` երկխոսության սահմանների խաչմերուկում» ծրագրի շրջանակում եվրոպացի և հայ մոդելավորողների ստեղծած հագուստի հավաքածուն: «Երևանյան հեռանկարներ» փառատոնի շրջանակներում «Դիլիջան» միջազգային փառատոնի մասնակիցները հյուրընկալվեցին Դիլիջանում: Քաղաքապետարանի կողմից ուշադրություն է ցուցաբերվում սպորտի զարգացմանը: Ապահովվում է դիլիջանցի մարզիկների մասնակցությունը հանրապետական միջոցառումներին, նրանց ցուցաբերվում է նյութական և բարոյական աջակցություն: Քաղաքապետարանի միջոցներով կազմակերպվում են մարզախաղեր և օլիմպիադաներ: Զգալի գործունեություն է ծավալվել քաղաքի երիտասարդական կյանքն ակտիվացնելու, երիտասարդական ներուժը համախմբելու ուղղությամբ: Քաղաքի երիտասարդների ու ՏԻՄ միջև համագործակցությունը ընդգրկել է մի շարք ոլորտներ, որոնց թվում բնապահպանություն, ոչ-ֆորմալ կրթություն, տեղեկատվության բարձրացում, մասնագիտական կողմնորոշում, քաղաքաշինություն, սոցիալ-տնտեսական, մշակութային և այլն:

2012-12-20
Համերգ` Քո ուշադրությունը հաշմանդամներին խորագրով
1992 թվականին ՄԱԿ-ը դեկտեմբերի 3-ը հռչակել է Հաշմանդամների միջազզգային օր, իսկ նոյեմբերի 15-ից դեկտեմբերի 15-ը հայտարարվել է Հաշմանդամների շահերի, իրավունքների պաշտպանության միամսյակ, որի նպատակն է վեր հանել նրանց հիմնախնդիրները բարձրացնել իրազեկությունը հասարակության մեջ:Այս տարի իրականացվեց այդ ծրագիրը համերգի տեսքով:
«Արվեստը սահմաններ չի ճանաչում, արվեստի միջոցով ջարդենք մարդկանց մեջ ծառացած կարծրատիպերը և ասենք ոչ’ կարծրատիպ մտածելակերպին և ընդունել նրանց»: Սա է ծրագրի կարգախոսը:
Ծրագրի շրջանակներում տեղի ունեցան Վաչե Գրիգորյանի մենահամերգները և սեմինարները Դիլիջանում և նրա հարակից համայնքներում:
Համերգին մասնակցում էին «Հույսի Կամուրջ» հկ-ի «Մեղեդի» երգի-պարի համույթը և «Հայացք» պարի համույթը: Ելույթների մեկնարկը սկսվեց նոյեմբերի 23-ին Գոշ համայնքում, իսկ դեկտեմբերի 3-ին մասնակիցները եղան Թեղուտում, դեկտեմբերի 6-ին` Հաղարծնում:
Համերգի ընթացքում հնչեցին սիրված հեղինակային և ժողովրդական կատարումներ Վաչե Գրիգորյանի կատարմամբ, այնուհետև ցուցադրվեց «Օղակից ներս» բնապահպանական ֆիլմը Վաչեի մասին պատմող ռեպորտաժով:
Դեկտեմբերի 19-ին կայացավ ծրագրի փակման արարողությունը:

2012-11-15
Նորընտիր ավագանու անդրանիկ նիստը
Նոյեմբերի 15-ին կայացավ Դիլիջանի նորընտիր ավագանու անդրանիկ նիստը: Մինչ նիստի օրակարգին անցնելը, քաղաքապետ Արմեն Սանթրոսյանը ջերմորեն շնորհավորեց ավագանու անդամներին` նրանց մաղթելով ակտիվ և բեղմնավոր գործունեություն: Քաղաքապետը նաև շնորհակալությունը հայտնեց նախկին ավագանու անդամներին, քաղաքի առջև դրված խնդիրների լուծման գործում նրանց ներդրած ջանքերի համար: Նիստում հաստատվեցին քաղաքապետարանի աշխատակազմի և ենթակա կազմակերպությունների կառուցվածքը, հաստիքացուցակը և պաշտոնական դրույքաչափերը: Հաստատվեցին տեղական տուրքերը և դրանց դրույքաչափերը: Քննարկվեցին և որոշումներ ընդունվեցին աղբահանության, որոշ բազմաբնակարան շենքերի վերանորոգման, փողոցների մասնակի բարեկարգման հարցերի վերաբերյալ: Ավագանու նիստում որոշում ընդունվեց առաջարկություն ներկայացնելու Դիլիջանի կոմպոզիտորների ստեղծագործական տունը անվանակոչելու հայ մշակութային ականավոր գործիչ էդվարդ Միրզոյանի անվամբ` հաշվի առնելով ոչ միայն ազգային երաժշտական արվեստին մատուցած նրա ծառայությունները, այլև այն, որ մեծանուն կոմպոզիտոր է, Դիլիջանի կոմպոզիտորների ստեղծագործական տան հիմնադիրը:


2012-11-12
Հանդիսավոր արարողություն թիվ 4 մանկապարտեզում
Նոյեմբերի 9-ին տոնական տրամադրություն էր տիրում քաղաքի թիվ 4 մանկապարտեզում. հանդիսավորությամբ նշվեց հիմնանորոգման աշխատանքների ավարտը: Երեխաները մեծ ուրախությամբ դիմավորեցին Դիլիջանի քաղաքապետ Արմեն Սանթրոսյանին և USAID Հայաստանի տարածաշրջանի ղեկավար Քերրեն Հիլարդին: Միջոցառմանը ներկա էին, ծնողներ, հանրության, հկ-ների և լրատվամիջոցների ներկայացուցիչներ: Ներկաները շրջեցին մանկապարտեզի բոլոր սենյակներով մոտիկից ծանոթանալով QOUNTERPART INTERNATIONAL-ի, USAID-ի և Դիլիջանի քաղաքապետարանի համատեղ ներդրումներով կատարված հիմնանորոգմանը: Քերրին Հիլարդը իր գոհունակությունը հայտնելով կատարված աշխատանքների վերաբերյալ միաժամանակ ավելացրեց.

-Ժողովրդին օգնելը մեր առաքելությունն է: Մենք համագործակցում ենք տեղական ինքնակառավարման մարմինների հետ, որն այս պարագայում շատ արդյունավետ եղավ: Համայնքը բացահայտել է կարիքը`մենք տրամադրեցինք օգնություն և համատեղ աշխատանքի շնորհիվ տեսնում ենք արդյունքները, որի համար շատ գոհ ենք և ուզում ենք նշել, որ ծրագիրը լինելու է շարունակական…Ինչպես նշեց Բարաք Օբաման իր նախընտրական քարոզարշավի ընթացքում «Ժողովրդի քաղաքացիական վերաբերմունքը չի ավարտվում քվեատուփի առաջ» այն պետք է շարունակելի լինի իր պահանջներով և ղեկավարության հետ համագործակցությամբ: Դուք Արմեն Սանթրոսյանին որպես քաղաքապետ ընտրել եք երեք անգամ, ինչը խոսում է նրա մասին, որ ձեր համագործակցությունը ավելի ամուր և ավելի արդյունավետ պետք է լինի:
Քաղաքապետն էլ իր խոսքում փաստեց, որ USAID-ի հետ իրականացրել են երեք ծրագիր, իսկ չորրորդի համար ձեռք է բերվել բանավոր պայմանավորվածություն, որը ենթադրում է թիվ 4 մանկապարտեզի կահավորման խնդրի լուծումը: Պաշտոնատար անձանց ելույթներից հետո ներկաները ունկնդրեցին երեխաների գեղարվեստական կատարումները: Ներկաները շատ տպավորված հեռացան վերադարձի խոստումով…








2012-11-05
Միջոցառում թիվ 3 մանկապարտեզում
Նոյեմբերի 2-ին Դիլիջանի քաղաքապետարանի և ՙՍեյվ դը չիլդրեն՚ կազմակերպության
կողմից կազմակերպեց երեխայի պաշտպանությանը նվիրված ՙԾնողական և մանկական սրճարաններ՚ համայնքային խորագրով միջոցառում: Միջոցառմանը ներկա էին ՄՀԵՓԱ (Միավորվենք հանուն երեխաների փրկենք ապագան) ծրագրում ընդգրկված նախադպրոցական հաստատության սաները, նրանց ծնողները, մասնագետներ, պետական ու հասարակական կառույցների, ԶԼՄ-երի ներկայացուցիչներ, քաղաքացիներ, Սեյվ դը չիլդրեն-ի ծրագրի պատասխանատուները:
Անց կացվեցին երեխայի իրավունքների, երեխայի հանդեպ բռնության հետևանքների, դրական ծնողավարության վերաբերյալ փոքրիկ դասընթացներ, որոնք վարեցին ՄՀԵՓԱ/ ծրագրով վերապատրաստված դասընթացավարները:
ՙՍեյվ դը չիլդրենի՚ կողմից տրամադրվել էին գրականություն, գրենական և այլ պարագաներ: Կարևորելով նման օգտակար նախաձեռնությունները, կազմակերպությունն այլ համայնքների իշխանությունների հետ նույնպես ձեռնամուխ է եղել միջոցառումների կազմակերպմանը: Միջոցառումը կազմակերպվեց ՄՀԵՓԱ ծրագրի շրջանակներում, որն իրականացվում է ,,Սեյվ դը չիլդրեն,, կազմակերպության հայաստանյան ներկայացուցչությունը` Եվրոպական միության ֆինանսավորմամբ և ,,Բաց հասարակության հիմնադրմաներ-Հայաստան,,-ի համաֆինանսավորմամբ:

2012-09-25
2012թ. սեպտեմբերի 23-ին կայացան ՏԻՄ ընտրություններ
2012թ. սեպտեմբերի 23-ի տեղական ինքնակառավարման մարմինների ընտրությունների նախնական արդյունքներն են`
Համայնքի ղեկավարի ընտրություններ.
Ընտրողների ընդհանուր թիվ -14589
Մասնակիցների ընդհանուր թիվ -8283
Անվավեր-243
Հարությունյան Գուրգեն Ռուստամի 428
Սահաբալյան Ժորա Մկրտիչի 2 824
Սանթրոսյան Արմեն Վովայի 4 688

2012-09-10
ԱՍԲԱ-ի ծրագիրը գործնական փուլում է
2012թ. ապրիլի 23-ին ԱՍԲԱ-ի և Հոլանդական Միջազգային Բնակարանային Երաշխիքներ (DIGH) կազմակերպության միջև ստորագրվեց անդրանիկ ներդրումային ծրագրի աջակցման համաձայնագիրը: Այս համաձայնագրի շնորհիվ առանց պետական երաշխիքների, զգալի օտարերկրյա ֆինանսական ռեսուրսներ են ներդրվում Դիլիջանում մատչելի բնակարանների ֆոնդի ձևավորման և հետագա շահագործման համար: Ծրագրի արդյունքում 2013-2014թթ. Դիլիջանում շուրջ 50 ընտանիքներ կապրեն նոր սոցիալական բնակարաններում, իսկ հետագայում այդ մատչելի սոցիալական բնակարանների ֆոնդը կընդլայնվի ևս 150 նոր բնակարաններով:
ԱՍԲԱ հիմնադրամի տնօրինության և Դիլիջանի քաղաքապետարանի միջև աշխատանքների 2-րդ` շինարարական փուլին անցնելու կապակցությամբ օգոստոսի 8-ին կնքվեց փոխգործակցության համաձայնագիր:
Համաձայնագրի կնքման արարողությունը կատարվեց հենց շինտեղամասում, հիմնանորագման ենթակա բազմաբնակարան շենքի բակում: Համաձայնագրի կնքման արարողությանը ներկա էին շահառուներ, թաղամասի բնակիչներ, լրատվամիջոցների ներկայացուցիչներ:
Շահառուների և բնակիչների հարցերին հանգամանալից պատասխաններ տրվեցին Դիլիջանի փոխքաղաքապետ Արմեն Մակարյանի և ԱՍԲԱ հիմնադրամի տնօրեն Արա Նազինյանի կողմից: Մի քանի օրից կհայտարարվի շինարարության մրցույթ: Նախատեսվում է հոկտեմբերից սկսել շինարարական աշխատանքները: Շինարարության համար հատկացվել է 10 000 քառ մետր տարածք:

2012-08-31
Դիլիջանի քաղաքապետ Արմեն Սանթրոսյանի շնորհավորական ուղերձը Գիտելիքի և դպրության օրվա առթիվ
Սիրելի աշակերտներ, ուսանողներ, հարգելի ուսուցիչներ, դասախոսներ և ծնողներ.
Սրտանց շնորհավորում եմ բոլորիդ` Գիտելիքի և դպրության օրվա կապակցությամբ:Առանձնահատուկ շնորհավորում եմ առաջին դասարան ոտք դրած մեր փոքրիկներին,որոնց կյանքում այս օրը մնալու է որպես քաղցր հիշողություն: Համոզված եմ, որ մեր սովորողները ըստ արժանավույն կգնահատեն գիտելիքի դերն ու նշանակությունը և ջանք չեն խնայի ձեռք բերելու ոչ միայն բարձր գիտելիքներ, այլև լավագույնս կտիրապետեն ժամանակակից տեխնիկական միջոցներին, որը հուսալի հիմք կհանդիսանա դիմակայելու մեր արագ զարգացող դարի մարտահրավերներին:
Մենք ապրում ենք Դիլիջանի զարգացման շատ կարևոր և պատասխանատու փուլում: Մեր քաղաքում իրագործվում են տարաբնույթ խոշոր ծրագրեր, այդ թվում կրթական ոլորտի` որոնք էական ազդեցությում են ունենալու քաղաքի զարգացման գործում և մեծ հեռանկարներ են բացում մեր պատանիների և երիտասարդության համար: Դիլիջանում է կառուցվում hանրապետությունում առաջին միջազգային դպրոցը, որը նախատեսվում է տալ միջազգային չափանիշներին համապատասխան որակյալ կրթություն և այդ դպրոցում սովորելու համար լայն հնարավորություններ են ստեղծված մեր առավել աչքի ընկնող պատանիների համար:
Լիահույս ենք, որ ձեռք բերելով որակյալ կրթություն և հայեցի դաստիարակություն` կդառնաք հայրենասեր, բանիմաց, ազնիվ քաղաքացիներ և միշտ բարձր կպահեք հարազատ քաղաքի անունը:

2012-08-27
Հանրային քննարկում
Օգոստոսի 24-ին քաղաքապետարանում կայացավ ԱՍԲԱ-ի «Մատչելի սոցիալական բնակարանային համալիր» ծրագրի հանրային քննարկում: Քննարկմանը մասնակցում էին Դիլիջանի փոխքաղաքապետ Արմեն Մակարյանը, ԱՍԲԱ հիմնադրամի տնօրեն Արա Նազինյանը, Դիլիջանի գլխավոր ճարտարապետ Նվեր Դանիելյանը, քաղաքապետարանի և ծրագրի հիմնադրամի պատասխանատու աշխատակիցներ, հանրության և լրատվամիջոցների ներկայացուցիչներ:
Դիլիջանի փոխքաղաքապետ Արմեն Մակարյանը և հիմնադրամի տնօրեն Արա Նազինյանը, նախ ներկաներին տեղեկացրին, որ ծրագիրը արդեն մտնում է գործնական փուլ. լուծված է հողահատկացման հարցը, օրերս կհայտարարվի շինարարական կազմակերպությունների մրցույթ և որ ծրագրի առաջին փուլի նախապատրաստական աշխատանքներն ավարտված են: Նրանք կրկին անդրադարձան ծրագրի էությանը, այն է` մատչելի վարձու բնակարններ առաջարկել ազգաբնակչության միջին և համեմատաբար ոչ ապահով խավերին, նպաստել բնակչության բնակարանային խնդրի լուծմանը: Նախագծի պարզաբանմամբ հանդես եկավ ճարտարապետական նախագծի հեղինակած ընկերության ներկայացուցիչ Մարինե Հայրապետյանը: Ցուցադրվեց նոր թաղամասի ճարտարապետական տեսքը, պարզաբանումներ տրվեցին ճարտարապետական լուծումների վերաբեյալ: Բնակելի նոր հատվածը կառուցվելու է Շամախյան թաղամասում։ Առաջին փուլում, որը մտադիր են ավարտել 2013-ը գարնանը, կառուցվելու են երկհարկանի քոթեջատիպ կցաշենքեր և վերակառուցվելու է մեկ բազմաբնակարան շենք: Կիրառվելու է շինարարական երկու մոդել՝ փոքր և մեծ բնակարանների: Քննարկման ընթացքում մասնակիցների կողմից տարբեր հարցեր բարձրացվեցին և առաջարկություններ արվեցին ճարտարապետական նախագծի վերաբերյալ, մասնավորապես ծածկերի հուսալիության, ինսոլացիայի էֆեկտիվության և դիլիջանյան ճարտարապետական ոճի տարրերի ընդգրկման անհրաժեշտության վերաբերյալ: Քննարկվեցին նաև շահառուների ընտրության սկզբունքների,վարձավճարների մոտավոր չափերի, կոմունալ սպասարկման վերաբերյալ հարցեր։
Քննարկման արդյունքներն ամփոփեցին հիմնադրամի տնօրեն Արա Նազինյանը և փոխքաղաքապետ Արմեն Մակարյանը:
Հավելենք, որ սոցիալական բնակարանաշինության այս ծրագիրը առաջինը իրականացվում է Դիլիջանում։

2012-08-27
Միջազգային դպրոցի ծրագրիը մտնում է նոր փուլ
Միջազգային դպրոցի ծրագրիը մտնում է նոր փուլ
Օգոստոսի 16-ին քաղաքապետարանում կայացավ միջազգային դպրոցի ծրագրի հետ կապված քաղաքի խնդիրները թեմայով խորհրդակցություն, որին մասնակցում էին Տավուշի մարզպետ Արմեն Ղուլարյանը, Դիլիջանի քաղաքապետ Արմեն Սանթրոսյանը, կառույցի ճարտարապետ Թիմ Քլինը, շինարարության պետ Դմիտրի Լետովը, ՌՎՎՑ հիմնադրամի մարկետինգի և հասարակայնության հետ կապերի բաժնի պետ Զառա Զեյթունցյանը, քաղաքի հյուրանոց ռեստորանային համալիրների և հյուրատների, առողջարանների և բուժ հաստատությունների, կրթամշակութային և սպասարկման ոլորտների կազմակերպությունների տնօրեններ, հկ-ների և լրատվամիջոցների ներկայացուցիչներ:
Զառա Զեյթունցյանը ներկայացրեց ծրագրի ընթացքը, անդրադառնալով նաև դպրոցի նշանակությանը, սովորողների ընդունելության սկզբունքներին, պատասխանեց ներկաներին հետաքրքրող հարցերին: Դպրոցի դերին ու նշանակությանը, ինչպես և ծրագիր հետ կապված քաղաքի խնդիրներին անդրադարձան Տավուշի մարզպետ Արմեն Ղուլայանը և Դիլիջանի քաղաքապետ Արմեն Սանթրոսյանը:


2012-07-26
Հակասողանքային ծրագիրը գործողության մեջ
Հայտնի է, որ Դիլիջանը հանրապետության սողանքային լուրջ խնդիրներ ունեցող բնակավայրերից մեկն է: Այդ իսկ պատճառով, դեռևս խորհրդային իշխանության տարիներին ամենալավ մասնագիտորեն հետազոտված և ուսումնասիրված քաղաքն է: Նախկին ԽՍՀՄ-ի վարչապետի կարգադրությամբ 11 մլն խորհրդային ռուբլու նախագծային արժեքով 70-ական թվականներին իրականացրել են խոշոր ծավալի աշխատանքներ, որը հիմնականում հանգում էր խոշոր դրենաժային կառուցվածքների` թունելների միջոցով կանխել սողանքային ակտիվությունը: Չնայած աշխատանքները լիովին չավարտվեցին, այնուամենայնիվ հիշյալ կառուցվածքները կարևոր նշանակություն ունեցան սողանքային երևույթների մեղմացման առումով: Հետագա տարիներին աշխատանքները ոչ միայն չշարունակվեցին, այլև փակվեցին թունելախորշերի մուտքերը, քանդվեցին որոշ հատվածներ,այդ իսկ պատճառով արդեն վերջին տարիներին նման իրավիճակում գտնվող հակասողանքային կառույցներով հնարավոր չէր պայքարել սողանքների ակտիվացման դեմ: Քաղաքապետարանը ինչպես ընդհանուր իրավիճակի, այնպես էլ առանձին հատվածներում ակտիվացող սողանքների վերաբերյալ պարբերաբար տեղեկացրել է վերադաս մարմիններին` ակնկալելով անհրաժեշտ աջակցություն,զուգահեռաբար սեփական միջոցներով հենապատերի կառուցման, առանձին հատվածների ամրացման և այլ աշխատանքներով, փորձելով մասնակիորեն մեղմացնել սողանքները: Քաղաքապետարանի և անձամբ Դիլիջանի քաղաքապետ Արմեն Սանթրոսյանի հետևողականության, նախաձեռնողականության և հանրապետության նախագահի անձնական մեծ աջակցության շնորհիվ արդեն իսկ իրականացվում է հակասողանքային միջոցառումների մեծ ծրագիր: Աշխատանքները սկսվել են 2011 թ-ից, այն իրականացնում է «Արփա-Սևանշին» ՓԲԸ «Թունել» շինտեղամասը: Այն սկսվել է կենտրոնական բանկի բնակելի վարչական շենքից(հին շուկայի տարածք): Սկզբնական խնդիրը եղել է 260 գծամետրի աշխատանք, սակայն տեսնելով արդյունքը, քաղաքապետի նախաձեռնությամբ հիմք նախապատրաստվեց շարունակելու աշխատանքները, որը 2- րդ փուլով շարունակվեց 2012 թ-ից: Այս փուլով նախատեսված է իրականացնել 667 գծամետր վերականգնողական աշխատանքներ: Նշենք նաև, որ գործող թունելը լիովին վերակառուցվելու է: Մաքրվելու և վերականգնվելու է նաև ավտոկայանի հատվածում գտնվող թունելախորշը և արդեն գործելու է դրենաժային հուսալի համակարգ: Ինչպես պատմեց «Արփա-Սևանշին» ՓԲԸ «Թունել» շինտեղամասի պետ Համլետ Մովսիսյանը, հաջողվում է օրական միջինը ապահովել 1,5 գծամետր վերակառուցման աշխատանքներ, որից հետո կատարվում է լցում և հորատանցքերի հորատացում: Ներկայումս թունելի շինարարության մեջ ընդգրկված են մոտ 90 աշխատողներ, որից շուրջ մեկ տասնյակը մեր համաքաղաքացիներն են:
Շինտեղամասի պետի հավաստմամբ օգտագործվում է բացառապես որակյալ շինանյութ:

2012-07-17
17.07.12 01.04.2012թ. – 01.07.2012թ. ընկած ժամանակահատվածում քաղաքապետարանի կատարած աշխատանքները
Դիլիջան համայնքի 2012թ. բյուջեն մշակվել է համայնքի 2009-2012թթ. քառամյա զարգացման ծրագրի հիման վրա:
Համայնքի գործունեությունը մեծապես կախված է բյուջետային գործընթացի լավ կազմակերպումից, բյուջեի եկամուտների արդյունավետ հավաքագրումից և միջոցների խնայողական օգտագործումից:
2012թ. երկրորդ եռամսյակում տեղական մուտքերի արդյունավետ հավաքագրման շնորհիվ հավաքագրվել է 128297.1 հազ.դրամի եկամուտ, որը հնարավորություն է տալիս ավելի իրատեսորեն կանխագծելու առաջիկա անելիքները:
Համայնքային ենթակայության 13 ոչ առևտրային կազմակերպությունների, քաղաքապետարանի, քաղաքացիական կացության ակտերի գրանցման բաժնի,
աղբահանության և սանիտարական մաքրման, ինչպես նաև լուսավորության սպասարկման բնագավառներում ֆինանսավորումները կատարվել են ժամանակին` ծրագրով նախատեսված ծախսերին համապատասխան:
Քաղաքապետարանի ուշադրության կենտրոնում են սոցիալապես անապահով ընտանիքները, որոնց պարբերաբար տրվում է դրամական օգնություն:
Յուրաքանչյուր նորածին երեխաների ընտանիքների (թվով 66),՝ տրվել է միանվագ դրամական օգնություն:
Դիլիջան քաղաքում գործող «Հույսի Կամուրջ» հասարակական կազմակերպություն հաճախող հաշմանդամ երեխաների ուսումնադաստիարակչական աշխատանքները առավել արդյունավետ կազմակերպելու և անցկացնելու համար համայնքի բյուջեից յուրաքանչյուր ամիս ցուցաբերվում է ֆինանսական աջակցություն:
Գարնանային զորակոչով ՀՀ Զինված ուժերում ծառայության մեկնող զորակոչիկներին տրվել են նվերներ:Դիլիջանի համայնքային ենթակայության նախադպրոցական հիմնարկությունների ավագ նախադպրոցական խմբեր հաճախող թվով 170 երեխաների ավարտական հանդեսի միջոցառումների համար ձեռք են բերվել նվերներ:
Իրականացվում է ՈՒսանողական, Աբովյան, Մյասնիկյան, Հակոբջանյան, Հովսեփյան և Օրջոնիկիձե փողոցների ավտոտրանսպորտի երթևեկելի մասի ասֆալտբետոնե ծածկի հիմնանորոգման աշխատանքներ: Կատարվել է Պապանինո թաղամասի գերեզմանատուն տանող ճանապարհի կառուցման աշխատանքներ: Բարեկարգվել է Շահումյան փողոցի վերջնահատվածից դեպի Պարզ լիճ տանող ճանապարհը, քաղաքի տարբեր հատվածներում տեղադրվել են ծաղկամաններ: Վերանորոգվում է «Առյուծների աստիճաններ» կոչվող շքասանդուղքի մի հատվածը: Թիվ 2 մանկապարտեզին հարակից տարածքում կառուցվել է հետիոտնի անցուղի:
Իրականացվել է Մյասնիկյան 117 և Մյասնիկյան 144 Ա հասցեների տներին հարակից հենապատերի վերակառուցում, ինչպես նաև Կալինինի 255 հասցեի տանը հարակից պաշտպանիչ պատի կառուցում;:
Հիմնանորոգվում են Շամախյան 3Ա և Գետափնյա 8 հասցեների բազմաբնակարան շենքերի վերելակները:
Շահումյան, Վ.Անանյանի և Այգեստան փողոցներում իրականացվել է փողոցային լուսավորության համակարգի հիմնանորոգում:
ՀՊԾ-ի «Սնունդ աշխատանքի դիմաց» ծրագրի շրջանակներում Դիլիջանի համայնքների միության կողմից հաստատվել և ներկայացվել է ծրագիր, որի շրջանակներում կատարվում է Դիլիջան քաղաքային համայնքի ենթակայության թիվ 5 մանկապարտեզի մասնակի վերանորոգման աշխատանքներ, Գայի փողոցի հենապատի և Շամախյան փողոցի հեղեղատարի վերանորոգման աշխատանքներ: Դիլիջան քաղաքային համայնքի ներդրումը նշված ծրագրերին կատարվել է նյութերի տեսքով:
Ձեռք են բերվել և քաղաքի տարբեր հատվածներում տեղադրվել վեց մանկական խաղահրապարակներ: Քաղաքն առավել բարետես դարձնելու, ինչպես նաև զբոսաշրջության սեզոնին նախապատրաստելու նպատակով քաղաքի տարբեր մասերում տեղադրվել են նստարաններ և աղբամաններ:
Քաղաքապետարանը միջոցներ է ձեռնարկում իր ենթակայության ենթակառույցների նյութատեխնիակական բազայի ամրապնդման ուղղությամբ:
ՏԻՄ խրախուսման դրամաշնորհային ծրագրի շրջանակներում Քաունթերփարթ ինթերնեշնլի հայաստանյան կազմակերպության հետ համատեղ իրականացվում է Դիլիջանի թիվ 4 մանկապարտեզի հիմնանորոգման աշխատանքները:
Դիլիջանի քաղաքային զբոսայգին նոր սեզոնին նախապատրաստելու, ինչպես նաև բնակիչների ակտիվ հանգիստը առավել հարմարավետ և անվտանգ դարձնելու նպատակով իրականացվել է զբոսայգու խաղային ատրակցիոնների վերանորոգման աշխատանքներ:
Զգալի աշխատանքներ են իրականացվել լուսավորության, աղբահանության և սանիտարական մաքրման բարելավման, այն առողջարանային քաղաքին վայել կազմակերպեու ուղղությամբ: Կազմակերպվել և անց է կացվել սանիտարական մաքրման, բարեկարգման և կանաչապատման միամսյակ:
Քաղաքային հրապարակում կազմակերպվել են համաքաղաքային միջոցառումներ` նվիրված Երեխաների իրավունքների պաշտպանության միջազգային օրվան և վերջին զանգին:
Ամֆիթատրոնում անցկացվեց «Պարի տոն Դիլիջանում» հանրապետական փառատոնը որին մասնակցում էին մայրաքաղաքից և տարբեր մարզերից ժամանած շուրջ 40 պարային խմբեր;
Հիշատակի արարողություն կազմակերպվեց և ծաղկեպսակներ դրվեցին Մեծ եղեռնի զոհերի հիշատակը հավերժացնող հուշարձան-խաչքարին: Մայիսի 9-ին` Հայրենական մեծ պատերազմում տարած հաղթանակի 67-րդ և Շուշիի ազատագրման 20-ամյակի կապակցությամբ կազմակերպվեց միջոցառում, հազարավոր դիլիջանցիներ իրենց հարգանքի տուրքը մատուցեցին զոհվածների հիշատակին:
Դիլիջանի երկրագիտական թանգարանում Բրիտանական խորհուրդը ներկայացրեց «Նորաձևության ճանապարհ` երկխոսության սահմանների խաչմերուկում» ծրագրի շրջանակում եվրոպացի և հայ մոդելավորողների ստեղծած հագուստի հավաքածուն:
«Երևանյան հեռանկարներ» փառատոնի շրջանակներում «Դիլիջան» միջազգային փառատոնի մասնակիցները հյուրընկալվեցին Դիլիջանում:
Քաղաքապետարանի կողմից անհրաժեշտ ուշադրություն է ցուցաբերվում սպորտի զարգացմանը: Մարզադպրոցում կազմակերպվեց մարզական խաղերի եզրափակիչ մրցումներ:


2012-06-29
«Պարի տոն Դիլիջանում» հանրապետական փառատոն
2012 թվականի հուլիսի 1-ին ժամը 11-ին քաղաքի բացօթյա ամֆիթատրոնում կազմակերպվելու է «Պարի տոն Դիլիջանում» հանրապետական փառատոն` Հայաստանի Հանրապետության տարբեր վայրերից ժամանած ավելի քան 45 պարային խմբերի մասնակցությամբ:

2012-06-12
Ամերիկյան «Դիլիջանը»՝ պլյուս աշխարհահռչակ արտիստներ
Հունիսի 12-ին Դիլիջանի արվեստի պետական քոլեջը հյուրընկալեց Լոս Անջելեսի «Դիլիջան» միջազգային փառատոնին, որի հիմնադիրն է ամերիկահայ ճանաչված երաժիշտ Մովսես Պողոսյանը: Վերջինս 2011-ին ստացել է «ֆորտե» մրցանակ՝ կատարողական արվեստում ունեցած նշանակալի ձեռքբերումների, նոր եւ ժամանակակից երաժշտության զարգացման համար:


Հայաստանում առաջին անգամ է «Դիլիջանը» նման ներկայացուցչական կազմով (Քիմ Քաշքաշյան, Միշել Զուկովսկի, Թոնի Արնոլդ, Վլադիմիր Չերնով, Կյունգ-Հի Կիմ-Սյուտր, Կունիկո Կատո, Ռոհան դե Սարամ եւ այլք): «Բոլորը հնչեղ անուններ, մոտ 19 երաժիշտ, որոնք 8 համերգի շրջանակներում շուրջ 12 հայազգի կոմպոզիտորների ստեղծագործությունների առաջին կատարողները կլինեն Հայաստանում:


Արդի երաժշտության ասպարեզում ունեցած ձեռքբերումների և Դիլիջան քաղաքի համբավի տարածմանը նպաստելու համար «Դիլիջան» միջազգային փառատոնը պարգևատրվեց Դիլիջանի քաղաքապետարանի պատվոգրով:

2012-05-25
Քաղաքապետ Արմեն Սանթրոսյանի շնորհավորական ուղերձը Վերջին զանգի առթիվ
Սիրելի՛ շրջանավարտներ.
Շնորհավորում եմ բոլորիդ դպրոցական ուսումնառությունն ավարտելու կապակցությամբ:
Համոզված եմ, որ գեղեցիկ ավանդույթի վերածված տոնական այս օրը հարազատ կրթօջախում հնչող վերջին զանգն ուղեկցելու է ձեզ ողջ կյանքի ընթացքում՝ հաճելի ու բարի հիշողություններ արթնացնելով դպրոցական մտերմիկ ու ջերմ միջավայրի, դասընկերների, սիրելի ուսուցիչների մասին:
Հուսով եմ, որ դպրոցական տարիներին ձեռք բերած գիտելիքներն ու ունակությունները կօգնեն ձեզ վստահորեն ոտք դնելու մեծ կյանքի ասպարեզ, իբրեւ պետության արժանավոր քաղաքացիներ՝ ձեր նպաստը բերելու մեր պետության հետագա զարգացման ու հզորացման գործում՝ արդարացնելով ձեր ծնողների եւ ուսուցիչների հույսերն ու ակնկալիքները, իրականություն դարձնելով ձեր ձգտումներն ու երազանքները:
Բարի երթ ու կանաչ ճանապարհ եմ մաղթում ձեզ հետագա ողջ կյանքի ընթացքում, հաջողություն ձեր բոլոր հետագա ձեռնարկումներին:

2012-05-21
Ռոմանի եւ Դիլիջանի միջեւ հաստատվեցին եղբայրական կապեր
Ռումինիայի Ռոման քաղաքի քաղաքապետ Լաուրենցիու Դան Լեորեանուն եւ Դիլիջանի քաղաքապետ Արմեն Սանթրոսյանը նախօրեին ստորագրեցին երկու քաղաքների միջեւ համագործակցության համաձայնագիր: Ստորագրման հանդիսավոր արարողությանը ներկա էր Ռումինիայում Հայաստանի դեսպան Համլետ Գասպարյանը: Այս համաձայնագրով առաջին անգամ պաշտոնապես եղբայրական կապ է հաստատվում Ռումինիայի եւ Հայաստանի քաղաքների միջեւ:

Համաձայնագիրը նախատեսում է համագործակցություն մշակույթի, գիտության, գեղարվեստի եւ սպորտի բնագավառներում, զբոսաշրջության զարգացման ծրագրերի կազմում, երկու քաղաքների բնակչության միջեւ տարաբնույթ կապերի հաստատում, համատեղ միջոցառումների կազմակերպում, երիտասարդության շրջանում համագործակցության ծրագրերի իրականացում եւ փոխշահավետ տնտեսական հարաբերությունների զարգացում:

Քաղաքների եղբայրացման մասին պայմանավորվածությունը կայացել էր անցյալ տարվա հոկտեմբերի վերջին, երբ Ռումինիայում Հայաստանի դեսպանության նախաձեռնությամբ ռումինական Պիտեշտ, Ռոման, Ֆոկշան, Գեռլա, Դումբրավեն եւ Ֆրումոասա քաղաքների քաղաքապետներն այցելել էին Հայաստան եւ ծանոթացել Գյումրի, Իջեւան, Դիլիջան, Բերդ, Նոյեմբերյան եւ Այրում քաղաքներին:

Քաղաքապետեր Լեորենաուն եւ Սանթրոսյանը, ինչպես նաեւ դեսպան Գասպարյանը Քաղաքային այգում Մանկական քաղաքի բացման արարողությանը հայտարարեցին, թե հայկական հազարամյա ներկայությունից հետո երկու ժողովուրդների միջեւ այժմ բարեկամության եւ համագործակցության նոր էջ է բացվում: Այս մասին հայտնում է ԱԳՆ մամուլի ծառայությունը:

hetq.am



2012-04-25
Հարգանքի տուրք Հայոց մեծ եղեռնի զոհերի հիշատակին
Ապրիլի 24-ին հուշարձանային համալիրում հազարավոր դիլիջանցիներ իրենց հարգանքի տուրքը մատուցեցին 1915թ Հայոց մեծ եղեռնի անմեղ զոհերի հիշատակին: Հոգևոր արարողությունից հետո, որը սպասարկում էր Տեր Շավարշ քահանա Սիմոնյանը, քաղաքապետարանի, հիմնարկությունների, կազմակերպությունների և քաղաքացիների կողմից ծաղկեպսակներ ու ծաղիկներ դրվեցին Մեծ եղեռնի զոհերի հիշատակը հավերժացնող հուշարձան- խաչքարին: Հիշատակի արարողությանը մասնակցում էրն Դիլիջանի քաղաքապետ Արմեն Սանթրոսյանը, փոխքաղաքապետ Արմեն Մակարյանը, քաղաքական, հասարակական կազմակերպությունների, լրատվամիջոցների ներկայացուցիչներ:

2012-04-23
Համաքաղաքային շաբաթօրյակ
Սանմաքրման, բարեկարգման և կանաչապատման միամսյակի շրջանակներում ապրիլի 21-ին Դիլիջանում անցկացվեց համաքաղաքային շաբաթօրյակ: Այն առավել արդյունավետ կազմակերպելու նպատակով ստեղծվել էր հանձնաժողով փոխքաղաքապետ Արմեն Մակարյանի նախագահությամբ: Առաջադրանքները հիմնականում ներառում էին հիմնարկների և դրանց հարակից տարածքները, ինչպես նաև քաղաքի այլ հատվածներ: Առանձնապես լուրջ սանմաքրման աշխատանքներ իրականացվեցին Գետափնյա, Շահումյան փողոցներում, «Առյուծների աստիճաններում» և այլ վայրերում: Կատարվեցին նաև ծառատնկման աշխատանքներ:
Դիլիջանի քաղաքապետ Արմեն Սանթրոսյանը, քաղաքապետարանի պատասխանատու աշխատակիցները շրջում էին բոլոր հատվածներում, ծանոթանում աշխատանքների վիճակին` տեղում կարգավորում առաջացած հարցերը:
Շաբաթօրյակին առավել ակտիվ իրենց դրսևորեցին քաղաքի դպրոցներն ու մյուս ուսումնական հաստատությունները, Էլցանցի, «Դիլիջան» ազգային պարկի կոլեկտիվները:
Օրվա վերջում ամփոփվեցին կատարված աշխատանքները:

2012-04-19
Հուշարձանների և տեսարժան վայրերի միջազգային օր
Ապրիլի 18-ին «Հուշարձանների և տեսարժան վայրերի միջազգային օրվա» կապակցությամբ քաղաքապետարանում կազմակերպվել է Կիևյան նախաձեռնության` «Մշակութային ժառանգության վերականգնումը պատմական քաղաքներում» պիլոտային ծրագրի իրականացման ուղղությամբ կատարված աշխատանքների իրազեկում: Միջոցառմանը մասնակցել են քաղաքապետարանի աշխատակիցներ, կրթամշակութային կազմակերպությունների ներկայացուցիչներ:
Ծրագրի մասին տեղեկատվություն տվեց ծրագրին աջակցող փորձագիտական խմբի անդամ, քաղաքի գլխավոր ճարտարապետ Նվեր Դանիելյանը:
Ստացված բրոշյուրները հատկացվել են «Դիլիջան ազգային պարկին» և կրթամշակութային կազմակերպություններին, էլեկտրոնային փաստաթուղթը` տեղադրվել է համայնքի վեբ կայքում:

2012-04-06
Դիլիջանի քաղաքային համայնքում կազմավորվել են ընտրական տեղամասային կենտրոններ
2012թ. մայիսի 6-ին Հայաստանի Հանրապետության Ազգային ժողովի ընտրություններին նախապատրաստվելու համար Դիլիջանի քաղաքային համայնքում կազմավորել 10 ընտրական տեղամասային կենտրոններ.


թիվ 1` Թիվ 3 մանկապարտեզ, Մոլդովական 46
թիվ 2` Ակումբ, Շամախյան 27/1
թիվ 3` Թեյարան, Կալինինի 237ա
թիվ 4` Արվեստի պետական քոլեջ, Կալինինի 57
թիվ 5` Թիվ 6 հիմնական դպրոց, Կամո 131
թիվ 6` Մշակույթի պալատ, Մյասնիկյան 53
թիվ 7` Թիվ 4 մանկապարտեզ, Օրջոնիկիձե 63/1
թիվ 8` Պետական քոլեջ, ՈՒսանողական 70
թիվ 9` «Մանուշակ» կինոթատրոն, Շահումյան 12/1
թիվ 10` Թիվ 4 հիմնական դպրոց, Շահումյան 6


2012-03-06
Դիլիջանի քաղաքապետ Արմեն Սանթրոսյանի շնորհավորական ուղերձը Կանանց միջազգային օրվա` Մարտի 8-ի առթիվ
Սիրելի կանայք.
Քաղաքապետարանի աշխատակազմի, համայնքի ավագանու և անձամբ իմ կողմից սրտանց շնորհավորում եմ բոլորիդ`Կանանց միջազգային օրվա`Մարտի 8-ի առթիվ: Մաղթում եմ ձեզ անձնական երջանկություն, անսահման սեր և բարեկեցություն ձեր ընտանիքներին: Գարնանային այս գեղեցիկ օրը միշտ տոնական է բոլորիս համար,որովհետև օրվա խորհուրդը հայ կինն է` մեր ազգային լավագույն ավանդույթների պահպանողն ու հետագա սերունդներին փոխանցողը և տոնը լավագույն առիթներից է կրկին մեր բոլորի ակնածանքն ու երախտագիտությունն արտահայտելու համար: Մեծ և անուրանալի է ձեր ներդրումը ինչպես երկրի, այնպես էլ մեր քաղաքի զարգացման գործում: Այն հատկապես նշանակալից է կրթության, առողջապահության և մշակույթի ոլորտներում,որտեղ աշխատողների մեծ մասը կանայք են: Այսօր մենք ոչ միայն ականատեսը,այլև ակտիվ մասնակիցն ենք Դիլիջանում իրականացվող խոշորամասշտաբ ծրագրերի և վստահ եմ,որ ինչպես միշտ` ձեր մեծ ներդրումն եք ունենալու մեր քաղաքի զարգացման այս անչափ պատասխանատու փուլում: Տարածաշրջանային ֆինանսական կենտրոնի ձևավորումը ոչ միայն ավելի է մեծացնելու առողջարանային մեր քաղաքի համբավը, այլև մեծ խթան է հանդիսանալու քաղաքի սոցիալ- տնտեսական խնդիրների լուծման, հատկապես նոր աշխատատեղերի ստեղծման առումով: Բոլորիս նպատակը մեկն է` շենացնել Դիլիջանը, հուսալի երաշխիքներ ստեղծել մեր ազգաբնակչության բարեկեցիկ կյանքի համար: Մեկ անգամ ևս շնորհավորում եմ ձեզ, մաղթում առողջություն, երջանկություն և հետագա հաջողություններ:




2012-02-27
Դիլիջանյան սիրով և ներշնչանքով
Փետրվարի 24-ին Հայաստանի նկարիչների տան մեծ ցուցասրահում բացվեց մեր համաքաղաքացի՝ գեղանկարիչ Համլետ Ասատրյանի ստեղծագործությունների անհատական ցուցահանդեսը։
Բազմամարդ արարողությունը ՀՆՄ շնորհավորագրի հրապարակմամբ բացեց միության նախագահ Կարեն Աղամյանը։ Ստեղծագործական միավորումը, ջերմորեն ողջունեց իր արժանավոր 65–ամյա անդամի մեծածավալ ցուցահանդեսը. «Սիրում եւ բարձր ենք գնահատում Ձեր կենսախինդ եւ պայծառ արվեստը։ Այսուհետև էլ թող որ նույն եռանդով շարունակվի Ձեր ստեղծագործական գործունեությունը»։
Այնուհետև պրն Աղամյանն ասաց. «Միշտ իրար կողքի ենք, միշտ իրար հետևում ենք, միշտ իրար օգնում ենք, խորհուրդներ տալիս, միմյանցով ուրախանում եւ հպարտանում։ Նրա արվեստը կենսախինդ է, նա մարդ է, ով սիրում է իր բնաշխարհը, այն հողը, որտեղ ծնվել, մեծացել ու կազմավորվել է որպես անհատ, որպես նկարիչ։ Եվ այս ամենը սիրով, ջերմորեն ու քնքշանքով արտահայտվել է իր նկարչության մեջ»։
Համլետ Ասատրյան մարդու եւ կերպարվեստագետի մասին խոսք ասացին գեղանկարիչներ Ղարիբ Եղիազարյանը, Հրանտ Թադևոսյանը, Գագիկ Ավետիսյանը, Լենմիր Բաղդասարյանը եւ ուրիշներ։
Նկարչին ողջունեց նաև բեմադրիչ, պրոֆեսոր Ռաֆայել Ջրբաշյանը՝ մասնավորապես անդրադառնալով մեկ տասնյակից ավելի բեմադրա–նկարչական համատեղ աշխատանքներին։
Շնորհակալություն հայտնելով ներկաներին՝ նկարիչն ասաց, որ «կյանքում շատ քննություններ եմ հանձնել, բայց առաջին անհատական մեծ քննությունը տալիս եմ այսօր, որը բավականին բարձր է ու դժվարին»։ Երախտագետ նկարիչը հիշեց և մեծարանքի խոսքեր ասաց իր ուսուցչի՝ ՀՀ վաստակավոր նկարիչ Հովհաննես Շարամբեյանի հասցեին։
Հ. Ասատրյանը ծնվել է Դիլիջանում, մասնագիտական կրթություն է ստացել Երևանում և Մոսկվայում։ Վարել է տարբեր պաշտոններ՝ Դիլիջանի քաղաքապետարանի մշակույթի բաժնի վարիչ, Տավուշի մարզպետարանի մշակույթի վարչության պետ և այլն։ Աշխատանքները պահվում են տարբեր երկրների թանգարաններում, մասնավոր հավաքածուներում ։ Ստեղծագործությունների մեջ իր ուրույն տեղն ունի «Հին Դիլիջան» թեմայով ստեղծագործությունների շարքը։
«Էտյուդնիկն ուսիցս կախ չափչփել եմ Հայաստանն ու Արցախը, բայց միեւնույն է, ոչ ես, ոչ մեկ ուրիշ նկարիչ չենք կարող սպառել բնությունը, աղբյուրն ինչպե՞ս սպառես։ Ըստ իս, գեղանկարչությունը քնարերգություն է՝ տեսանելի, պոեզիան՝ լսելի գեղանկարչություն» ասում է Համլետ Ասատրյանը։
Ցուցահանդեսի բացմանը մասնակցում էին և հեղինակին շնորհավորեցին ու հետագա ստեղծագործական հաջողություններ մաղթեցին Դիլիջանի քաղաքապետ Արմեն Սանթրոսյանը և նրա արվեստի երկրպագու մեր համաքաղաքացիները։

2012-01-30
Նվիրված էր Հայոց ազգային բանակի ստեղծման 20-ամյակին
Հունվարի 27-ին` Հայոց ազգային բանակի 20-ամյակի կապակցությամբ Արցախի ազատամարտում զոհվածների հիշատակը հավերժացնող հուշարձան կոթողում կատարվեց պսակադրության արարողություն: Քաղաքապետարանի, զինվորականության և հանրության ներկայացուցիչների կողմից ծաղկեպսակներ և ծաղիկներ դրվեցին հուշակոթողին:
Զորամասում անցկացվեց հոբելյանին նվիրված ռազմական շքերթ:
Ողջույնի խոսքով հանդես եկան տանկային զորամասի շտաբի պետ մայոր Ա. Բանաշյանը, քաղաքապետարանի ներկայացուցիչ Ա. Սիմոնյանը, քաղաքի վետերանների խորհրդի նախագահ Լ. Ջառահյանը, Հայրենական մեծ պատերազմի վետերան Ժ. Ժամհարյանը:
Հանդիսավոր պայմաններում` ծառայության մեջ աչքի ընկած զինվորները և սպաները ստացան ՀՀ պաշտպանության նախարարության և Դիլիջանի քաղաքապետարանի կողմից տրված պարգևներն ու նվերները:
Ակուբում միջոցառման մասնակիցների համար համերգային ծրագրով հանդես եկան քաղաքի մշակույթի պալատի համույթը, ավագ դպրոցի և ՙՀույսի կամուրջ՚ հասարակական կազմակերպության սաները:


2012-01-16
2011թ. քաղաքապետարանի կատարած աշխատանքների մասին
2011թ. ընթացքում հավաքագրվել է 502342.8 հազ.դրամի եկամուտ, ինչն ուղղվել է համայնքի սոցիալ-տնտեսական խնդիրների լուծմանը:
Քաղաքապետարանի ուշադրության կենտրոնում են սոցիալապես անապահով ընտանիքները: Անապահով ընտանիքների երեխաների դասագրքերի վարձավճարը ապահովել է քաղաքապետարանը, այդ նպատակով հատկացվել է 887.5 հազ. դրամ:
Յուրաքանչյուր նորածին երեխաների համար ընտանիքին տրվում է միանվագ դրամական օգնություն:
Դիլիջան քաղաքում գործող «Հույսի Կամուրջ» հասարակական կազմակերպություն հաճախող հաշմանդամ երեխաների ուսումնադաստիարակչական աշխատանքները առավել արդյունավետ կազմակերպելու և անցկացնելու համար համայնքի բյուջեից յուրաքանչյուր ամիս ցուցաբերվում է ֆինանսական աջակցություն: «Հույսի կամուրջ» Հ/Կ հաճախող սահմանափակ կարողություններով թվով 48 երեխաների համար, ինչպես նաև նախադպրոցական հասակի 33 երեխաների համար ձեռք են բերել և տրվել նվերներ: Գարնանային և աշնանային զորակոչով ՀՀ Զինված ուժերում ծառայության մեկնող զորակոչիկների, համայնքի տարբեր ոլորտներում զբաղված թվով 50 լավագույն աշխատակիցների տրվել են նվերներ, կազմակերպվել է Ամանորի տոնական միջոցառում: Դիլիջանի համայնքային ենթակայության նախադպրոցական հիմնարկություններ հաճախող թվով 566 երեխաների տրվել է ամանորյա նվերներ:
Դիլիջան քաղաքային համայնքի ենթակայության նախադպրոցական հիմնարկությունների թվով 85 աշխատողների տրվել է ֆինանսական աջակցություն հերթական բժշկական ստուգումների անցկացման համար:
Առանձնահատուկ ուշադրություն է դարձվում Հայրենական մեծ պատերազմի վետերաններին: Հիմնանորոգվել է Հայրենական պատերազմում զոհվածների հուշարձանի անմար կրակի տարածքը: Մեծ շուքով կազմակերպվում է և անցկացվում Հայրենական Մեծ պատերազմում տարած հաղթանակի տոնը: Հայրենական մեծ պատերազմի կին մասնակիցներին մարտի 8-ի կապակցությամբ տրամադրվել է դրամական օգնություն: Հայրենական մեծ պատերազմի վետերաններն անվճար կերպով օգտվում են քաղաքային տրանսպորտից, ազատված են գույքահարկից, մշակույթի պալատում գործում է բարեգործական հիմնադրամ, որի միջոցով 60 հոգու տրվում է անվճար սննունդ: Վերանորոգվել է և համալրվել նոր գույքով Կամո թաղամասի վետերանների շենքը:
Քաղաքապետարանը միջոցներ է ձեռնարկում իր ենթակայության ենթակառույցների նյութատեխնիակական բազայի ամրապնդման ուղղությամբ:
«Սեյվ դը չիլդրեն ֆեդերեյշն ինկ» կազմակերպության Հայաստանի մասնաճյուղի և Դիլիջանի քաղաքապետարանի միջոցներով իրականացվել է քաղաքի թիվ 3 մանկապարտեզի վերանորոգման աշխատանքներ: Հիմնանորոգվել է «Հ. Շարամբեյանի անվան գեղարվեստի դպրոց» ՀՈԱԿ շենքը:
Պետ.բյուջեից թիվ 4 մանկապարտեզի ջեռուցման համակարգի կառուցման համար հատկացվել է 8100,0 հազ.դրամ: Պետ.բյուջեի միջոցներով իրականացվել է նաև նշված մանկապարտեզի մասնաշենքի վերակառուցում տարրական դպրոցի:
Քաղաքում իրականացվում են շինարարական աշխատանքներ բարեկարգման, կենտրոնական հատվածի ճարտարապետական ամբողջական ձևավորման ուղղությամբ:
Ավարտվում է լուսավորության ցանցի վերականգնումը: Վերականգնվել է Այգեստան փողոցի, Ուսանողական փողոցի նրբանցքների, Մյասնիկյան փողոցի 1-ին նրբ. և Կալինինի փողոցի 2-րդ փակուղու փողոցային լուսավորության համակարգը: Վերակառուցվել է Հովսեփյան փողոցի վերջնահատվածի փողոցային լուսավորության համակարգը: Ձեռք են բերվել և տեղադրվել լուսարձակներ կախովի /33 հատ/ և լուսարձակներ սյուներին ամրացվող /62 հատ/:
Իրականացվել է Շահումյան փողոցի և Շահումյան և Սայաթ-Նովա փողոցներն իրար միացնող Շահումյան փ. 3-րդ նրբ. ճանապարհի ավտոտրանսպորտի երթևեկելի մասի ասֆալտբետոնե ծածկի հիմնանորոգման աշխատանքներ: Կատարվել է Մյասնիկյան փ. /հատված կմ 1+000 - կմ 1+250/ ճանապարհահատվածի ավտոտրանսպորտի երթևեկելի մասի ասֆալտբետոնե ծածկի փոսային նորոգման աշխատանքներ: Խճապատվել է Շամախյան թաղամասի Վ. Անանյան և Այգեստան փողոցը միացնող և ակումբի շենքից մինչև Վ. Անանյան փողոցին միացնող հատվածների ավտոտրանսպորտի երթևեկելի մասը: Կալինինի, Գետափնյա, Մյասնիկյան և Շահումյան փողոցներում կատարվել է ճանապարհային նշնանների տեղադրում և հետիոտնի համար նախատեսված անցումների նշագծում: Գետափնյա փողոցի ավտոտրանսպորտի երթևեկելի մասում տեղադրվել են ռետինե տարբերանշաններ: Իրականացվել է Շամախյան թաղամասի Վ. Անանյանի փ. 1-ին նրբ., Շամախյան փ. վերջնահատվածի, Վ. Անանյանի փ., Շամախյան փ. 1ին նրբ., Այգեստան փ. և Այգեստան փ. 1ին նրբ. գազաֆիկացման աշխատանքները: ՀՊԾ-ի «Սնունդ Աշխատանքի Դիմաց» ծրագրի շրջանակներում Դիլիջանի համայնքների միության կողմից ներկայացվել է ծրագիր, որի շրջանակներում կատարվել է Դիլիջան քաղաքային համայնքի ենթակայության թիվ 2, թիվ 3, թիվ 5 մանկապարտեզների և երաժշտական դպրոցի մասնակի վերանորոգման աշխատանքներ: Դիլիջան քաղաքային համայնքի ներդրումը նշված ծրագրին կազմում է 1786160 դրամ` նյութերի տեսքով: ՀՊԾ-ի «Սնունդ Աշխատանքի Դիմաց» ծրագրի շրջանակներում իրականացվել է նաև կենտրոնից դեպի հիվանդանոց տանող հետիոտն ճանապարհի վերանորոգման աշխատանքներ:
Մանկապարտեզների համար ձեռք է բերվել գույք` մահճակալ, սեղան, աթոռ: Թիվ 1 և թիվ 2 մանկապարտեզներում տեղադրվել է խաղահրապարակ և կատարվել ցանկապատի վերականգնում:
Նորոգվել են բազմաբնակարան շենքերի տանիքներ, մուտքեր: Հիմնանորոգվել են Շամախյան փ. թիվ 2Ա շենքի և Կալինինի փ. թիվ 243 շենքի վերելակները:
Փլված հենապատերի վերակառուցման զգալի աշխատանքներ են կատարվել: Վերակառուցվել և ամրացվել են Կալինինի փ. թիվ 144Ա հասցեի, Սայաթ-Նովա 121, Կալինինի փ. թիվ 144Ա , Օրջոնիկիձե փ.թիվ 35 , Իվանովո փ. թիվ 35, Սայաթ-Նովա 121, 106 և 108 տներին հարակից հենապատերը:
Դիլիջան քաղաքի կենտրոնական հրապարակն առավել գեղեցիկ դարձնելու համար ձեռք է բերվել և տեղադրվել լուսադիոդային ժամացույց – ջերմաչափ:
Զգալի աշխատանքներ են իրականացվել աղբահանության և սանիտարական մաքրման ուղղությամբ: Ձեռք են բերվել և տեղադրվել 70 հատ աղբարկղներ:
Քաղաքապետարանը անհրաժեշտ աջակցություն է ցուցաբերում առողջապահական ծրագրերի իրականացմանը, քաղաքացիների բուժսպասարկման բարելավմանը: Պարբերաբար կազմակերպում են բուժհետազոտությունների անվճար ակցիաներ:
Քաղաքապետարանի կողմից ուշադրություն է ցուցաբերվում սպորտի զարգացմանը: Ապահովվում է դիլիջանցի մարզիկների մասնակցությունը հանրապետական միջոցառումներին, նրանց ցուցաբերվում է նյութական և բարոյական աջակցություն: Քաղաքապետարանի միջոցներով կազմակերպվում են մարզախաղեր և օլիմպիադաներ:
Զգալի գործունեություն է ծավալվել քաղաքի երիտասարդական կյանքն ակտիվացնելու, երիտասարդական ներուժը համախմբելու ուղղությամբ: Քաղաքի երիտասարդների ու ՏԻՄ միջև համագործակցությունը ընդգրկել է մի շարք ոլորտներ, որոնց թվում բնապահպանություն, ոչ-ֆորմալ կրթություն, տեղեկատվության բարձրացում, մասնագիտական կողմնորոշում, քաղաքաշինություն, սոցիալ-տնտեսական, մշակութային և այլն:

2011-12-23
Դիլիջանի քաղաքապետ Արմեն Սանթրոսյանի շնորհավորական ուղերձը Ամանորի և Սուրբ Ծննդյան առթիվ
Հարգելի համաքաղաքացիներ, քաղաքապետարանի աշխատակազմի, համայնքի ավագանու և անձամբ իմ կողմից սրտանց շնորհավորում եմ բոլորիդ Ամանորի և Սուրբ ծննդի առթիվ և երջանկություն մաղթում ձեր ընտանիքներին: Նոր տարին նաև առիթ է գնահատելու նախորդ տարվա կատարվածը և լիովին հստակեցնելու մեր առաջիկա անելիքները: Մեր համատեղ աշխատանքի շնորհիվ հաջողվեց առաջընթաց իրականացնել սոցիալ–տնտեսական ոլորտներում, նպաստել մեր համաքաղաքացիների կարիքների որոշակի բավարարմանը: Դրանք հիմնանորոգված մանկապարտեզներն են, ասֆալտապատված ու բարեկարգված փողոցները, մանկական խաղահրապարակները: Անցնող տարվա ամենամեծ ձեռքբերումներից են հարյուրավոր աշխատատեղերը: Ակտիվացել է քաղաքի հոգևոր կյանքը:
2012թ. մեր ակնկալիքները կապված են առաջին հերթին համապետական և այլ խոշոր ծրագրերի հետ, որոնք գտնվում են ակտիվ շինարարական փուլում, իսկ ավարտից հետո ոչ միայն մեր քաղաքին ապահովելու են հարյուրավոր աշխատատեղերով, այլև մեծապես նպաստելու են քաղաքի տարբեր ինֆրաստրուկտուրաների և քաղաքային կյանքի զարգացմանը, նրա բարձր համբավի էլ ավելի տարածմանը:
ՀՀ Կենտրոնական բանկի «Դիլիջան» ուսումնահետազոտական կենտրոնի շահագործումը, որը նախատեսված է 2012թ վերջին, Դիլիջանը որպես տարածաշրջանային ֆինանսական կենտրոն դարձնելու ամենակարևոր նախապայմանն է, որը ուղեկցվում է քաղաքում ֆինանսա- բանկային գործընթացների ակտիվ զարգացմամբ: Ակտիվ շինարարական փուլ են թևակոխում տարածաշրջանում առաջին միջազգային դպրոցի և պետեկամուտների նախարարության ուսումնական կենտրոնի շինարարական աշխատանքները, գարնանից Շամախյան թաղամասում կսկսվի ԱՍԲԱ հիմնադրամի կողմից իրականացվող սոցիալական բնակարանաշնության ծրագիրը, որը նույնպես առաջինն է հանրապետությունում:
Մենք ապրում ենք քաղաքի պատմության շատ պատասխանատու մի շրջանում և մեր համատեղ աշխատանքից ու նվիրումից է կախված, թե որքանով կկարողանանք արժանին հատուցելու Դիլիջանի բարձր համբավին, մեր պապերի ու հայրերի ստեղծած արժեքներին ու բարի ավանդույթներին:
Համոզված եմ, որ ձեռք-ձեռքի տված կշենացնենք մեր հարազատ քաղաքը և 2012թ, կլինի մեծ ձեռքբերումների ու հաջողությունների տարի:
Շնորհավոր Ամանոր ու Սուրբ Ծնունդ:

2011-12-12
Կարողությունների գնահատում
Սոցիալական բնակարանաշինության ծրագրի հետ կապված դեկտեմբերի 9-ին ԱՍԲԱ հիմնադրամի կողմից «Բեստ Վեսթերն Փարադայզ» հյուրանոցային համալիրի նիստերի դահլիճում կազմակերպվեց սեմինար «Դիլիջան քաղաքի քաղաքապետարանի կարողությունների գնահատում» թեմայով։ Ինչպես տեղեկացվել է նախորդ հրապարակումներում, ծրագիրը մտել է գործնական փուլ և քննարկումը նպատակ ուներ վերլուծելով քաղաքապետարանում կատարված ուսումնասիրության արդյունքները, գործնականորեն քննարկել ԱՍԲԱ- քաղաքապետարան փոխգործակցության ներուժը, նպաստել քաղաքապետարանի հնարավորությունների ռացիոնալ օգտագործմանը։ Քննարկմանը իրենց տեսակետներն արտահայտեցին հիմնադրամի տնօրեն Արա Նազինյանը, Դիլիջանի քաղաքապետ Արմեն Սանթրոսյանը, փոխքաղաքապետ Արմեն Մակարյանը, ֆինանսական բաժնի պետ Գոհար Դավթյանը, քաղաքաշինության բաժնի պետ Նվեր Դանիելյանը, աշխատակազմի գլխավոր մասնագետներ Եղիշե Ավագյանը, Լամարա Մանթաշյանը, Սոնա Եգանյանը, Ռոբերտ Չապուխյանը, Լիլիթ Սաղաթելյանը։ Քննարկման արդյունքներն ամփոփեցին հիմնադրամի տնօրեն Արա Նազինյանը և քաղաքապետ Արմեն Սանթրոսյանը։

2011-11-28
Նախագահն այցելեց Դիլիջան
ՀՀ նախագահ Սերժ Սարգսյանը Գեղարքունիքի մարզից աշխատանքային այցով մեկնեց Տավուշի մարզ: ՀՀ Նախագահ Սերժ Սարգսյանը Տավուշի մարզի Դիլիջան քաղաքում այցելեց սեպտեմբերին շահագործման հանձնված «Բեսթ վեսթերն փարադայզ» հյուրանոց, ծանոթացավ կատարված աշխատանքերին:
«Բեսթ վեսթերն փարադայզը» շահագործման է հանձնվել 2011-ի սեպտեմբերին` հիմնանորոգումից հետո: 2002-ին շինությունը սեփականաշնորհվել էր, սակայն ֆիզիկական մաշվածության պատճառով այն ենթակա չէր շահագործման: Շուրջ 4 տարի տևած շենքի վերակառուցման և տեխնիկական վերազինման համար ներդրվել է 7 մլն ԱՄՆ դոլար, հյուրանոցի ողջ գույքը և տեխնիկական միջոցները ներկրված են արտերկրից` հատուկ պատվերով, և կրում են ընկերության պիտակավորումը:
Հյուրանոցային համալիրն ունի 58 հարմարավետ և բարձրակարգ համար, ռեստորան, բացօթյա սրճարան, 120 անձի համար նախատեսված նիստերի դահլիճ, լողավազան, մարզասրահ, մանկական խաղասրահ և այլն:
Հյուրանոցային համալիրն ապահովում է 50-70 աշխատատեղ` ցածր զբաղվածության սեզոնի ժամանակ, և մինչև 120 աշխատատեղ` բարձր զբաղվածության սեզոնի ժամանակ:
Աշխատակազմի 90 տոկոսից ավելին համալրված է տեղական աշխատուժով, ովքեր մշտապես և հետևողականորեն անցնում են միջազգային բոլոր չափանիշներին համապատասխան որակավորման դասընթացներ:
«Բեսթ վեսթերնը» աշխարհի խոշորոգույն հյուրանոցային ցանցերից է, որը գործում է ավելի քան 80 երկրում և ընդգրկում 4000-ից ավելի հյուրանոց:
Այնուհետև երկրի ղեկավարն այցելեց Կենտրոնական բանկի «Դիլիջան ուսումնահետազոտական կենտրոնի» շինհրապարակ, որտեղ նրան ներկայացվեցին կատարված ու ընթացիկ աշխատանքներն ու նախագծերը:

Կենտրոնի կառուցման հիմնական նպատակն է ստեղծել ժամանակակից տեխնիկական ու տեխնոլոգիական լուծումներով հագեցած ինստիտուտ, որտեղ կիրականացվեն միջազգային չափանիշներին համապատասխան տնտեսագիտության ու ֆինանսների բնագավառներին առնչվող տարածաշրջանային ու միջազգային կոնֆերանսներ, ուսումնական ծրագրեր և այլն: Կենտրոնի շինաշխատանքները կավարտվեն 2013-ին:

Լրագրողների հետ զրույցում ԿԲ նախագահ Արթուր Ջավադյանը նշեց, որ կենտրոնում միջազգային ճանաչում ունեցող տնտեսագետների հետ կանցկացվեն ազգային ու տարածաշրջանային դասընթացներ: Նա նշեց, որ արդեն պայմանավորվածություններ կան այնպեսի հեղինակավոր կազմակերպությունների հետ, ինչպիսիք են Արժույթի միջազգային հիմնադրամը, Համաշխարհային բանկը, Եվրոպայի զարգացման բանկը և այլն: Նախատեսվում է, որ այդ կենտրոնում տարեկան կանցկացվի 30 միջազգային սեմինարն:

ԿԲ նախագահը հույս հայտնեց, որ այդ ծրագրերը հնարավորություն կտան հայ մասնագետներին նոր գիտելիքներ ստանալ և փորձ ձեռք բերել արտասահմանցի գործընկերներից:

Նշվեց նաև, որ նախատեսվում է կենտրոնում աշխատող ԿԲ աշխատակիցների համար կառուցել բազմաբնակարան շենք, որի առաջին հարկում կտեղակայվեն մանկապարտեզ և առևտրային կենտրոններ:

Կենտրոնում տարածքներ կհատկացվեն առևտրային բանկերին ու վարկային կազմակերպություններին: ԿԲ կողմից կառուցվում է նաև Դիլիջանի նախկին գրադարանի շենքը, որտեղ նախտեսվում է ստեղծել ժամանակակից «Գիտելիք հանուն զարգացման» կենտրոն, որտեղ գործելու է տեխնիկապես հագեցված և արդի տեղեկատվական տեխնոլագիաներով կառավորվող ժամանակակից քաղաքային գրադարան:

2011-11-18
ՀՀ ՏԻՄ ձևավորման 15-ամյակը
ՀՀ ՏԻՄ ձևավորման 15-ամյակի կապակցությամբ «Հայաստանի Համայնքների Միության» վարչության որոշմամբ Դիլիջանի քաղաքապետ Արմեն Սանթրոսյանը պարգևատրվել է Միության ոսկե մեդալով:


2011-11-16
Հանրային քննարկում
Նոյեմբերի 15-ին Օրհուսի կենտրոնում, կենտրոնի նախաձեռնությամբ և մի շարք հասարակական կազմակերպությունների մասնակցությամբ անցկացվեց Դիլիջան համայնքի 2012թ բյուջեի և 2012-2022թթ. համայնքի ռազմավարական պլանավորման նախագծերի քննարկումներ:
Քննարկմանը մասնակցում էին Դիլիջանի քաղաքապետ Արմեն Սանթրոսյանը, աշխատակազմի ղեկավար Արա Մարտիրոսյանը, ֆինանսական բաժնի պետ Գոհար Դավթյանը, Օրհուսի խորհրդի անդամներ, կրթական հիմնարկների տնօրեններ, ՀԿ-ների և լրատվամիջոցների ներկայացուցիչներ:
Քաղաքապետարանի ֆինանսական բաժնի պետ Գոհար Դավթյանը համառոտակի ներկայացրեց քննարկվող փաստաթղթերի բովանդակությունը , կարևորագույն դրույթների վերաբերյալ տվեց անհրաժեշտ պարզաբանումներ:
Անդրադարձ եղավ նաև 2008- 2012թթ. քառամյա ծրագրի իրականացման ընթացքին, փաստվեց, որ նախատեսված հարցերը գրեթե լիովին կատարված են արդեն:
Քաղաքապետ Արմեն Սանթրոսյանը իր ելույթում առանձնացնելով նախագծերում պարունակվող հիմնական խնդիրները, ներկաների ուշադրությունը հրավիրեց ծրագրերի սոցիալական ուղղվածության վրա: Նա անդրադարձավ նաև քաղաքում իրականացվող համապետական ծրագրերի կատարմանը, առանձնահատուկ ուշադրություն դարձնելով դրանց հետ կապված սոցիալական խնդիրների լուծմանը` հատկապես նոր աշխատատեղերի ստեղծման առումով:
Քննարկման ընթացքում նշվեց, որ համայնքային ենթակայության բոլոր մանկապարտեզները ապահովված են ջեռուցմամբ, ստեղծված են բոլոր անհրաժեշտ պայմանները նախադպրոցական տարիքի երեխաների կրթության և հանգստի պատշաճ ձևով կազմակերպելու համար, իսկ զորամասի մանկապարտեզում բարեգործական հիմունքներղվ բավականին աշխատանքներ է իրականացրել «Ռոսգոսստրախ Արմենիա» ընկերությունը:
Փաստաթղթերի նախագծերի քննարկմանը իրենց հարցադրումներն ու առաջարկություններն արեցին թիվ 4 դպրոցի տնօրեն Ծ. Մկրտչյանը, Դիլիջանի պետական քոլեջի տնօրեն Գ. Թամրազյանը, «Դիլնետ սերվիս» կազմակերպության նախագահ Ա. Հովհաննիսյանը, համայնքի ավագանու անդամ, Դիլիջանի արվեստի պետական քոլեջի տնօրեն Հ. Մկրտումյանը, Օրհուս կենտրոնի համակարգող Ա. Հարոյանը, «Դիլիջան» ազգային պարկի աշխատակից Ռ. Բեգլարյանը:
Առաջարկությունները հիմնականում հանգում էին քաղաքի առանձին հատվածների բարեկարգման, բազմաբնակարան շենքերի տանիքների, կանգառների վերանորոգման, լրատվամիջոցների ընդլայնման, զբոսաշրջության համար բարենպաստ միջավայր ստեղծելու վերաբերյալ խնդիրներին:Կրկին
արծարծվեց եկեղեցու կառուցման խնդիրը:
Համայնքի ղեկավարի հավաստմամբ բոլոր օգտակար առաջարկությունները կքննարկվեն ավագանու նիստում և հավանության արժանանալու դեպքում կնդգրկվեն հիմնական փաստաթղթերում: Եկեղեցու վերաբերյալ ասվեց, որ անհրաշեշտ աշխատանք է տարվում գարնանից շինարարական աշխատանքները սկսելու համար:

2011-11-15
Գործնական քննարկում
Նոյեմբերի 14-ին «Հայկական սահմանադրական իրավապաշտպան կենտրոն» հասարակական կազմակերպության նախաձեռնությամբ Դիլիջանում կազմակերպվեց կլոր սեղան կապված փախստականների հիմնախնդիրների հետ: Ներկա էին Դիլիջանի փոխքաղաքապետ Արմեն Մակարյանը, ՀԿ-ների, մտավորականության, լրատվամիջոցների ներկայացուցիչներ, փախստականներ:
«Հայկական սահմանադրական կենտրոն» ՀԿ-ի նախագահ Գևորգ Մանուկյանը ողջունելով ներկաներին, նշեց, որ կազմակերպությունը ՄԱԿ-ի Փախստականների հարցերով Գերագույն հանձնակատարի հայաստանյան գրասենյակի աջակցությամբ իրականացնում է «Փախստականների իրավազորում` ուսուցման և իրազեկության բարձրացման միջոցով» ծրագիրը, որի շրջանակներում էլ հանրապետությունում անց են կացվում համանման միջոցառումներ:
Դիլիջանի փոխքաղաքապետ Արմեն Մակարյանը ողջունելով ներկաներին նշեց, որ 2011թվականը հոբելյանական է փախստականների իրավունքների պաշտպանության ոլորտի համար, հիշատակելով «Փախստականների կարգավիճակի մասին» 1951թ. Ժնևի համաձայնագիրը, «Անքաղաքացիության կրճատման մասին» 1961թ. համաձայնագիրը և Ազգերի լիգայի փախստականների հարցերով Գերագույն հանձնակատար, հայ ժողովրդի մեծ բարեկամ Ֆրիտյոֆ Նանսենի ծննդյան 150- ամյա հոբելյանը:
Փոխքաղաքապետը խոսելով փախսատականներին քաղաքապետարանի կողմից ցուցաբերվող աջակցության մասին, միաժամանակ նշեց, որ նրանց հարցերի լուծման գործում դեռևս բավարար չէ համապատասխան պետական մարմինների փոխգործակցությունը: Նա նաև նշեց որ փախստականի կարգավիճակում գտնվող մեր հայրենակիցների բնակարանային հարցի լուծմանը կարող է նպաստել արդեն իսկ գործողության մեջ դրված, Հոլանդիայի կառավարության կողմից ֆինանսավորվող սոցիալական բնակարանայի ծրագիրը, որի շինարարական աշխատանքները սկսվելու են գարնանից:
Քննարկման ընթացքում ելույթներ ունեցան Ադրբեջանից բռնագաղթած մեր հայրենակիցները, մեր համաքաղաքացի, Լիտվայի հայ համայնքի ներկայացուցիչ Ռուսլան Հարությունյանը, «Դիլնետ սերվիս» ՀԿ-ի նախագահ Ա.Հովհաննիսյանը: Քննարկման մասնակիցները եկան այն եզրակացության , որ փախստականների հարցերի լուծմանը մեծապես կարող է նպաստել տեղում համապատասխան հասարակական կազմակերպության ստեղծումը, իսկ Ա. Հովհաննիսյանը խոստացավ ըստ ամենայնի օգնել և աջակցել դրա կայացմանը և հետագա գործունեությանը:

2011-10-18
«Միմինո» արձանախմբի բացում Թբիլիսիում
Թբիլիսիի պատմական Հավլաբար թաղամասում` Թբիլիսիի հայկական պետական դրամատիկական թատրոնի շենքի մոտակայքում գտնվող պուրակում, բացվել է «Միմինո» կինոնկարի հերոսների և այդ ֆիլմի ռեժիսոր Գեորգի Դանելիային նվիրված հուշարձանները:
Ինչպես տեղեկացնում են ՀՀ ԱԳՆ-ից, բացման արարողության ժամանակ ողջույնի խոսքով են ասել Վրաստանում Հայաստանի դեսպան Հովհաննես Մանուկյանը, խմբաքանդակի հեղինակ Զուրաբ Ծերեթելին և Վրաստանի ժողովրդական արտիստ Վախթանգ Կիկաբիձեն:
Հանդիսավոր արարողությանը պատվավոր հյուրերի թվում ներկա էր Վրաստանի առաջին տիկին Սանդրա Ռուլոֆսը:
Միջոցառմանը ներկա Դիլիջանի քաղաքապետ Արմեն Սանթրոսյանը ներկաներին տեղեկացրել է, որ Դիլիջանի քաղաքապետարանի որոշմամբ՝ ֆիլմի դերասան Վախթանգ Կիկաբիձեին շնորհվել է Դիլիջանի պատվավոր քաղաքացու կոչում:

2011-10-10
Տոնական Դիլիջան
Հոկտեմբերի 8-ին Դիլիջանում անցկացվեց համաքաղաքային տոնախմբուէյուն նվիրված քաղաքի օրվան: Մեծ շուքով նշվեց քաղաքի հիմնադրման 467-ամյակը:
Հանդիսավոր արարողությանը տոնի առթիվ հյուրերին և համաքաղաքացիներին և հյուրերին շնորհավորեց Դիլիջանի քաղաքապետ Արմեն Սանթրոսյանը: Ողջույնի խոսքում անդրադարձ եղավ նաև քաղաքում իրականացվող համապետական ծրագրերի. Հատկապես ֆինանսական կենտրոնի ձևավորման հետ կապված քաղաքի հետագա զարգացման լուրջ հեռանկարին:
Ներկաներին ողջունեցին Տավուշի մարզպետ Արմեն Ղուլարյանը, Տավուշի առաջնորդական փոխանորդ Թորգոմ վարդապետ Տոնիկյանը, Երևանի Կոմիտասի անվան պետական կոնսերվատորիայի պրոֆեսոր, կոմպոզիտոր Արզաս Ոսկանյանը:
Դիլիջանի զարգացման գործում ունեցած ներդրման և քաղաքի հիմնադրման 467-ամյակի կապակցությամբ նախկին քաղաքապետ Ժորա Հենրիկի Պետրոսյանն արժանացավ Դիլիջանի պատվավոր քաղաքացի կոչմանը, պատվոգրերի և այլ պարգևների արժանացան կրթության և առողջապահության ոլորտի աշխատակիցներ:
Համաքաղաքային տոնախմբությանը մասնակցում էին ՀՀ փոխվարչապետ, տարածքային կառավարման նախարար Արմեն Գևորգյանը, ՀՀ ազգային Ժողովի պատգամավոր Հակոբ Հակոբյանը, ՀՀ կառավարության առընթեր Ջրային տնտեսության պետական կոմիտեի նախագահ Անդրանիկ Անդրեասյանը, ՀՀ ֆինանսների փոխնախարարներ Պավել Սաֆարյանը և Սուրեն կարայանը, ՀՀ-ում Ռուսաստանի դեսպանության խորհրդական-դեսպանորդ Սերգեյ Օվերչենկոն, Հայաստանի վետերանների խորհրդի նախագահ Սիմոն Եսայանը, Ռուսաստանի հայրենակիցների օգնության և համագործակցության ֆոնդի տնօրեն Իվան Սեմյոնովը, երևանաբնակ դիլիջանցիներ, հանրապետության ճանաչված արվեստագետներ…

2011-10-08
Դիլիջանի օրը
Սիրելի դիլիջանցիներ.
Սիրով հրավիրում ենք մասնակցելու Դիլիջան քաղաքի հիմնադրման 467-ամյակին նվիրված համաքաղաքային տոնախմբությանը, որը կկայանա 2011թ. հոկտեմբերի 8-ին:
Ծրագրում տեղ են գտել հետևյալ միջոցառումները.
ժ. 11.00-ին երկրագիտական թանգարան-պատկերասրահում դիլիջանցի աշխատանքների ցուցահանդեսը,
ժ.14-00-ին քաղաքային հրապարակում՝ EXPO-ցուցահանդես,
ժ.15-30 ին ամֆիթատրոնում համերգ արվեստի պետական քոլեջի, մանկական երաժշտական դպրոցի, մշակույթի պալատի և Մայր Աթոռ Էջմիածնի «հայորդաց տան» սաների և անհատ կատարողների մասնակցությամբ,
ժ.18.00-ին քաղաքային հրապարակում՝
-հանդիսավոր արարողություն
-տոնական համերգ
-դիսկոտեկ
-խաղարկություններ և մրցանակներ
-հրավառություն

2011-10-05
Դիլիջանի քաղաքապետ Արմեն Սանթրոսյանի շնորհավորական ուղերձը ուսուցչի օրվա առթիվ
Սիրելի մանկավարժներ.
Քաղաքապետարանի աշխատակազմի, համայնքի ավագանու և անձամբ իմ կողմից սիրով և երախտագիտությամբ շնորհավորում եմ ձեզ` մասնագիտական տոնի` ՈՒսուցչի օրվա կապակցությամբ: Մաղթում եմ առողջություն և անձնական երջանկություն: Մեր հասարակությունը միշտ բարձր է գնահատել ուսուցչի աշխատանքը, որից մեծապես կախված է մեր աճող սերնդի նկարագիրը:
Գոհունակությամբ պետք է նշել, որ մեր դպրոցների մանկավարժական կոլեկտիվները հաջողությամբ են իրականացնում կրթական ոլորտի բարեփոխումները, որոնք միտված են այն արդիականացնելու և միջազգային չափանիշներին համապատասխանեցնելուն:
Կրկին շնորհավորում եմ բոլորիդ և մաղթում նորանոր հաջողություններ` ձեր անչափ շնորհակալ աշխատանքում:

2011-10-03
Կարևոր հաղթանակ ետնապահի հետ խաղում.
Հոկտեմբերի 1-ին և 2-ին կայացան ֆուտբոլի ՀՀ Բարձրագույն խմբի առաջնության 24-րդ տուրի հանդիպումները: Տուրի առաջին հանդիպումը կայացավ «Հրազդան» մարզադաշտում, որտեղ Երևանի «Արարատը» հյուրընկալել էր Դիլիջանի «Իմպուլսին»: Առաջին խաղակեսը անցավ հավասար պայքարում, առանց դարպասի գրավման: Հանդիպման 54-րդ րոպեին Նորայր Գյոզալյանը նպաստավոր դիրքից շեշտակի հարվածով առաջ մղեց «Իմպուլսին»` 0-1: Խփած գոլից հետո «Իմպուլսի» խաղացողներն ավելի ակտիվացան: 58-րդ րոպեին Արթուր Մինասյանը ձեռքով խաղաց սեփական տուգանային հրապարակում, սակայն «Իմպուլսի» առաջատար Զավեն Բադոյանի 11 մետրանոց հարվածից հետո տանտերերի դարպասապահը կարողացավ որսալ գնդակը: 82-րդ րոպեին Բադոյանը մեն-մենակ հայտնվեց մրցակցի դարպասապահի դեմ դիմաց, սակայն կրկին անհաջող հարվածեց: Երևում է այդ օրը բախտը երես էր թեքել նրանից: 84-րդ րոպեին փոխարինման դուրս եկած Վահագն Այվազյանը սուր անկյան տակ, հեռահար հարվածով կրկնապատկեց հաշիվը` 0-2: Մրցավարի ավելացրած 2-րդ րոպեին Վաչիկ Եղիազարյանի հեռու տարածությունից կատարած հարվածից հետո գնդակը դիպավ դարպասաձողին և դուրս եկավ դաշտի սահմաններից: Հանդիպումն այսպես էլ ավարտվեց և «Իմպուլսը» ավելի մոտեցավ լավագույն եռյակին:
Տուրի մյուս հանդիպումների արդյունքները. Փյունիկ-ՈՒլիս` 0-0, Շիրակ-Գանձասար`1-0, Բանանց-Միկա` 3-1:
«Իմպուլսը» հաջորդ հանդիպումն անց է կացնելու հոկտեմբերի 14-ին ժ. 15:00-ին` հյուրընկալվելով Երևանի «Փյունիկին»: Հիշեցնենք, որ սա ՀՖՖ գործկոմի որոշմամբ 22-րդ տուրի վերախաղարկվող հանդիպումն է:

2011-09-05
Հիշատակի արարողություն
Երկրորդ համաշխարհային պատերազմի ավարտի 66-ամյակի կապակցությամբ սեպտեմբերի 3-ին Հայաստանի վետերանների խորհրդի, ՀՀ-ում Ռուսաստանյան ֆեդերացիայի դեսպանատան և Դիլիջանի քաղաքապետարանի նախաձեռնությամբ Հայրենական մեծ պատերազմի զոհերի հիշատակը հավերժացնող հուշարձանային համալիրում տեղի ունեցավ հիշատակի արարողություն: Միջոցառմանը մասնակցում էին Հայաստանում ՌԴ դեսպանատան պատասխանատու աշխատակիցներ, հանրապետության Վետերանների խորհրդի անդամներ, վետերաններ, հասարակայնության, հանրապետական և տեղական լրատվամիջոցների ներկայացուցիչներ: Մասնակիցները ծաղկեպսակներ դրեցին երկրորդ աշխարհամարտում զոհվածների հուշարձանին և եղբայրական գերեզմանին: Ելույթ ունեցան Դիլիջանի քազաքապետ Արմեն Սանթրոսյանը, ՀՀ-ում Ռուսաստանի դեսպանության խորհրդական-դեսպանորդ Սերգեյ Օվերչենկոն, դեսպանի խորհրդական Վիկտոր Կրեվոպոսկովը, Հայաստանի վետերանների խորհրդի նախագահ Սիմոն Եսայանը, Ռուսաստանի հայրենակիցների օգնության և համագործակցության ֆոնդի տնօրեն Իվան Սեմյոնովը: Ելույթ ունեցողները անդրադարձան նաև հուշահամալիրում իրականացված վերականգնողական աշխատանքներին: Այս աշխատանքները տարիներ շարունակ իրականացվել են Հայաստանում Ռուսաստանի դեսպանատան, Հայաստանում վետերանների խորհրդի, Դիլիջանի քաղաքապետարանի և Ռուսաստանի հայրենակիցների օգնության և համագործակցության ֆոնդի համատեղ ուժերով: Մեծ աջակցություն է ցուցաբերել ՎՏԲ Արմենիա բանկը, որի տնօրեն Վալերի Օվսյաննիկովը պարգևատրվեց Դիլիջանի քաղաքապետարանի շնորհակալագրով: Հիշյալ կազմակերպությունների կողմից ստորագրվեց հետագա աշխատանքների փոխգործակցության համաձայնագիր:

2011-08-16
Դիլիջանը 5-րդ համահայկական խաղերում
Դիլիջանի մարզիկները մասնակցում են օգոստոսի 13-21-ը Երևանում անցկացվող համահայկական 5-րդ խաղերին: Օգոստոսի 13-ին քաղաքի 30 հոգուց բաղկացած պատվիրակությունը քաղաքապետ Արմեն Սանթրոսյանի գլխավորությամբ մասնակցեցին Երևանի Վ.Սարգսյանի անվան հանրապետական մարզադաշտում խաղերի բացման հանդիսավոր արարողությանը: Պատվիրակության կազմում էին սպորտի վետերաններ, երիտասարդ մարզիկներ: Մեր մարզիկները իրենց ուժերը կչափեն թենիս, շախմատ, թեթև ատլետիկա մարզաձևերում:

2011-07-25
01.04.2011թ. – 01.07.2011թ. ընկած ժամանկահատվածում քաղաքապետարանի կատարած աշխատանքները
2011թ. երկրորդ եռամսյակում տեղական մուտքերի արդյունավետ հավաքագրման շնորհիվ հավաքագրվել է 69700.0 հազ.դրամի եկամուտ և նպատակաուղղվել քաղաքի սոցիալ-տնտեսական, հոգևոր մշակութային և առողջարանային ոլորտների հետագա առաջընթացի ապահովմանը:
Քաղաքապետարանի ուշադրության կենտրոնում են սոցիալապես անապահով ընտանիքները: 01.04.2011-01.07.2011թ. ընկած ժամանակահատվածում 30 անապահով ընտանիքների տրվել է դրամական օգնություն:
Թվով 55 նորածին երեխաների ընտանիքներից յուրաքանչյուրին տրվել է միանվագ դրամական օգնություն:
Դիլիջան քաղաքում գործող «Հույսի Կամուրջ» հասարակական կազմակերպություն հաճախող հաշմանդամ երեխաների ուսումնադաստիարակչական աշխատանքները առավել արդյունավետ կազմակերպելու և անցկացնելու համար համայնքի բյուջեից յուրաքանչյուր ամիս ցուցաբերվում է ֆինանսական աջակցություն:
Սկսվել է «Հ. Շարամբեյանի անվան գեղարվեստի դպրոց» ՀՈԱԿ շենքի վերանորոգման աշխատանքները:
Պատվիրվել են Շահումյան փողոցի և Շահումյան և Սայաթ-Նովա փողոցներն իրար միացնող Շահումյան փ. 3-րդ նրբ. ճանապարհի ավտոտրանսպորտի երթևեկելի մասի ասֆալտբետոնե ծածկի հիմնանորոգման նախագծանախահաշվային փաստաթղթերի կազմման և մշակման աշխատանքները:
Իրականացվում է Կամո 52 հասցեում գտնվող համայնքային սեփականություն հանդիսացող գրադարանի և ակումբի համար նախատեսված շենքի վերանորոգման աշխատանքների, Երկրագիտական թանգարանի պատկերասրահի հնագիտության և ազգագրության սրահների ցուցադրության կազմակերպման և կահավորման աշխատանքների, Կալինինի 243 և Շամախյան 2Ա հասցեների բազմաբնակարան շենքերի վերելակային տնտեսությունների վերակառուցման, Մյասնիկյան 53Ա հասցեում գտվող զուգարանի շենքի վերակառուցման և ավտոկայանին հարակից տարածքում քաղաքային զուգարանի կառուցման աշխատանքների, Այգեստան, Ուսանողական, Մյասնիկյան փողոցների և Կալինինի փողոցի 2-րդ փակուղու փողոցային լուսավորության համակարգի վերանորոգման համար նախագծանախահաշվային փաստաթղթերի կազմման և մշակման աշխատանքներ:
ՀՊԾ-ի «Սնունդ աշխատանքի դիմաց» ծրագրի շրջանակներում Դիլիջանի համայնքների միության կողմից հաստատվել և ներկայացվել է ծրագիր, որի շրջանակներում կատարվում է Դիլիջան քաղաքային համայնքի ենթակայության թիվ 2, թիվ 3, թիվ 5 մանկապարտեզների և երաժշտական դպրոցի մասնակի վերանորոգման աշխատանքներ: Դիլիջան քաղաքային համայնքի ներդրումը նշված ծրագրին կազմում է 1786160 դրամ` նյութերի տեսքով: Մանկապարտեզների համար ձեռք է բերվել գույք` մահճակալ, սեղան, աթոռ: Թիվ 1 և թիվ 2 մանկապարտեզներում տեղադրվել է խաղահրապարակ և կատարվել ցանկապատի վերականգնում:
Դիլիջանի քաղաքային զբոսայգին նոր սեզոնին նախապատրաստելու, ինչպես նաև բնակիչների ակտիվ հանգիստը առավել հարմարավետ և անվտանգ դարձնելու նպատակով իրականացվել է զբոսայգու խաղային ատրակցիոնների վերանորոգման աշխատանքներ: Կատարվել է բազմաբնակարան շենքերի տանիքների, մուտքերի նորոգման և Կամարինի 1-ին նրբ. թիվ 20 տան մոտով անցնող հեղեղատարի վերակառուցման աշխատանքներ:
Զգալի աշխատանքներ են իրականացվել լուսավորության, աղբահանության և սանիտարական մաքրման բարելավման, այն առողջարանային քաղաքին վայել կազմակերպելու ուղղությամբ: Ձեռք է բերվել և քաղաքի տարբեր փողոցներում տեղադրվել թվով 70 աղբաման:
Քաղաքապետարանի կողմից անհրաժեշտ ուշադրություն է ցուցաբերվում սպորտի զարգացմանը: Դիլիջանում անցկացվեց դպրոցականների հանրապետական 20-րդ սպարտակիադայի եզրափակիչ փուլը:

2011-07-04
Ֆրունզը, Կիկաբիձեն և Լեոնովը կրկին հանդիպեցին Դիլիջանում
Մհեր Մկրտչյանի 81-ամյակին «Միմինո» ֆիլմին նվիրված հուշարձան բացվեց ֆիլմում Մհեր Մկրտչյանի մարմնավորած հերոսի՝ Ռուբիկ Խաչիկյանի հայրենի Դիլիջան քաղաքում։ Բացման արարողությանը ներկա էին բարձրաստիճան պաշտոնյաներ, մշակութային գործիչներ։ Հուշարձանը բացեցին ՌԴ և Վրաստանի դեսպանները Հայաստանում։

Հուշարձանը երեք քանդակների կոմպոզիցիա է։ Առաջին պլանում հայ և վրացի ընկերներն են՝ Մհեր Մկրտչյանն ու Վախթանգ Կիկաբիձեն։ Հետին պլանում հայրենական պատերազմի վետերան Վոլոխովին մարմնավորած Եվգենի Լեոնովն է։

tert.am

2011-06-30
Հրավիրում ենք
Հարգելի համաքաղաքացիներ.
Բոլորիդ սիրով հրավիրում ենք մասնակցելու «Միմինո» արձանի բացման արարողությանը, որը կկայանա օղակաձև ճանապարհային հանգույցի` քաղաքային լճին հարող հատվածում, հուլիսի 4-ին, ժամը 3-ին:
Բացման արարողությունից հետո մշակույթի պալատում կցուցադրվի «Միմինո» ֆիլմը, այնուհետև բացօթյա ամֆիթատրոնում կկայանա համերգ վրացի անվանի դերասան եւ երգիչ Վախթանգ Կիկաբիձեի մասնակցությամբ:

2011-06-27
Սպարտակիադայի եզրափակիչ փուլը Դիլիջանում
Հունիսի 25-ին և 26-ին Դիլիջանում անցկացվեց Հայաստանի անկախության 20-ամյակին նվիրված դպրոցականների հանրապետական 20-րդ սպարտակիադայի եզրափակիչ փուլը, որին մասնակցում էին հանրապետության բոլոր մարզերի և Երևանի շուրջ 400 պատանի մարզիկներ: Քաղաքային մարզադաշտում կազմակերպված մեկնարկի հանդիսավոր արարողությանը պատանի մարզիկներին ողջունեցին ՀՀ կրթության և գիտության նախարար Արմեն Աշոտյանը, Տավուշի փոխմարզպետ Լևոն Սարգսյանը:
Մեկնարկի հանդիսավոր արարողությանը մասնակցում էին Դիլիջանի փոխքաղաքապետ Արմեն Մակարյանը, հանրապետության մարզական ընկերությունների և լրատվամիջոցների ներկայացուցիչներ, անվանի մարզիկներ: Մրցումներն անցկացվեցին քաղաքային մարզադաշտում,մարզադպրոցում, ավագ և թիվ 2 դպրոցներում: Այն ընդգրկում էր 4 մարզաձև: Մրցամարտն անցավ ակտիվ պայքարում: Հանդբոլ մարզաձևից առաջին տեղը գրավեցին Երևանի տղաների և աղջիկների հավաքական թիմերը, բասկետբոլից առաջին տեղը գրավեցին Երևանի տղաների և Գյումրիի աղջիկների թիմերը, վոլեյբոլից հաղթողի պատվանդանին կրկին Երևանի տղաների թիմն էր, իսկ աղջիկների մրցումներում հաղթող ճանաչվեց Սիսիանի հավաքականը: Ֆուտբոլ մարզաձևից բողոքարկման պատճառով արդյունքները չամփոփվեցին:
Հաղթողներին հանդիսավոր պայմաններում հանձնվեցին գավաթներ և համապատասխան դիպլոմներ:

2011-06-23
Հարգանքի տուրք
Հունիսի 22-ին «Վշտի և հիշատակի» օրվա կապակցությամբ Դիլիջանի հուշարձանային համալիրում կատարվեց հիշատակի արարողութուն նվիրված Հայրենական մեծ պատերազմի զոհերի հիշատակին:
Արարողությանը մասնակցելու համար Դիլիջան էին ժամանել Հայրենական մեծ պատերազմի վետերաններ, ռուս համայնքի ներկայացուցիչներ, բազմաթիվ այլ հյուրեր:
Մասնակիցների կողմից ծաղկեպսակներ դրվեցին Հայրենական մեծ պատերազմի զոհերի հիշատակը հավերժացնող հուշարձան-կոթողին և եղբայրական գերեզմանում թաղված զինվորների շիրիմներին:
Միջոցառմանը ելույթներ ունեցան «Ռուսաստանի հայրենակիցների օգնության և աջակցության հիմնադրամի» տնօրեն Իվան Սեմյոնովը, Հայաստանի միավորման խարհրդի նախագահ,գնդապետ Սիմոն Եսայանը, Դիլիջանի փոխքաղաքապետ Արմեն Մակարյանը, Հայրենական պատերազմի վետերանների կոմիտեի նախագահ, պահեստի գնդապետ Պետրոս Պետրոսյանը, վետերան, ՀՀ ԳԱ ակադեմիկոս Պավել Միրզոյանցը, Դիլիջանի վետերանների խորհրդի նախագահ Լևոն Ջառահյանը: Միջոցառումը եզրափակվեց Գալինա Հայրապետյանի՝ վետերաններին նվիրված բանաստեղծության արտասանությամբ:
Հիշատակի արարողությանը մասնակցում էին Հայաստանում ՌԴ դեսպանության ռազմական կցորդի ավագ օգնական, գնդապետ Վյաչեսլավ Գլագոլևը և դեսպանի խորհրդական Սերգեյ Կաշիրինը:

2011-06-14
Համայնքապետերի հանդիպում Դիլիջանում
Դիլիջանի քաղաքապետարանի աշխատանքային փորձին ծանոթանալու նպատակով հունիսի 11-ին կայացավ հանրապետության քաղաքային համայնքների ղեկավարների և Հայաստանի համայնքների ասոցիացիայի անդամների հանդիպում:
Միջոցառման ընթացքում Դիլիջանի քաղաքապետ Արմեն Սանթրոսյանը համառոտակի ներկայացրեց համայնքում իրականացվող աշխատանքների մասին, պատասխանելով ներկաներին հետաքրքրող հարցերին:
Այնուհետև հյուրերը քաղաքապետի ուղեկցությամբ եղան վերջին տարիներին միայն համայնքի միջոցներով կառուցված մշակութային օբյեկտներում: Նրանք առանձնապես տպավորված էին ամֆիթատրոնով և նորաբաց պատկերասրահ-թանգարանով:

2011-06-07
Արժանացել Է ՀՀ նախագահի մրցանակի
Երևանի պետական գեղարվեստի ակադեմիայի Դիլիջանի մասնաճյուղի ուսանող Հարություն Հովակիմյանը «Երբ մենք չաղոթեցինք» բանաստեղծությունների ժողովածուի համար արժանացել է Հայաստանի Հանրապետության նախագահի` 2010թ. երիտասարդական մրցանակին:
Դիլիջանի քաղաքապետ Արմեն Սանթրոսյանը քաղաքապետարանի աշխատակազմի անունից շնորհավորում է Հարություն Հովակիմյանին` գրականության ոլորտում Հայաստանի Հանրապետության նախագահի 2010թ. երիտասարդական մրցանակին արժանանալու կապակցությամբ և մաղթում ստեղծագործական հետագա հաջողություններ:

2011-05-13
Անվանի կոմպոզիտորը Դիլիջանում
Մայիսի 12-ին լրացավ հայ մեծանուն կոմպոզիտոր Էդուարդ Միրզոյանի
ծննդյան 90-ամյակը: Իր ապրած բազմաբովանդակ կյանքը, ստեղծագործությունների
պատմությունը, որպես Հայաստանի կոմպոզիտորների միության նախագահ 36-ամյա գործունեությունը մեծ արվեստագետը ամփոփել է «Едуард Мирзоян-Фрагменты» ինքնակենսագրական գրքում:
Անվանի կոմպոզիտորի նախկին սան, Երևանի Կոմիտասի անվան պետական կոնսերվատորիայի պրոֆեսոր Արզաս Ոսկանյանի նախաձեռնությամբ մայիսի 15-ին Դիլիջանում կազմակերպված գրքի շնորհանդեսին մասնակցում էին հեղինակը, Երևանից ժամանած արվեստագետներ, լրատվամիջոցների ներկայացուցիչներ:
Դիլիջանցիների ջերմ վերաբերմունքը Էդուարդ Միրզոյանի նկատմամբ պայմանավորված է ոչ միայն հայրենի մշակույթին նրա մատուցած ծառայություններով, այլև Դիլիջանի համար ունեցած նրա ներդրմամբ:
1960-ականներին, այդ նրա նախաձեռնության ու ջանքերի շնորհիվ էր, որ Դիլիջանում կառուցվեց ԽՍՀՄ կոմպոզիտորների ստեղծագործական տունը, որտեղ հանգստացել և ստեղծագործել են աշխարհահռչակ շատ արվեստագետներ, որոնք իրենց հետ տարել են դիլիջանյան անկրկնելի բնության և անզուգական հանգստի տպավորությունները, նպաստելով մեր առողջարանային քաղաքի բարձր համբավի էլ ավելի տարածմանը:
Իսկ այստեղ կազմակերպվող նախկին ԽՍՀՄ-ի և միջազգային երաժշտական փառատոններն ու համերգները, մշտական շփումները հայտնի երաժիշտների հետ իրենց բարերար ազդեցությունն են գործել քաղաքի երաժշտական կյանքի զարգացման ու մշակութային ավանդույթների ձևավորման վրա:
Գրքի շնորհանդեսին` օգտվելով առիթից վաստակաշատ կոմպոզիտորին ծննդյան հոբելյանի առթիվ շնորհավորեցին և իրենց բարի մաղթանքները տվեցին Տավուշի մարզպետ Արմեն Ղուլարյանը, Դիլիջանի քաղաքապետ Արմեն Սանթրոսյանը, Հայաստանի կոմպոզիտորների և երաժշտագետների ընկերության նախագահի տեղակալ, կոմպոզիտոր Դմիտրի Առաքելյանը, աշխատանքային այցով Տավուշի մարզ այցելած ՀՀ պաշտպանության նախարարության բանակի ռազմական գլխավոր տեսուչ գեներալ-գնդապետ Միքայել Հարությունյանը:
Դիլիջանի քաղաքապետ Արմեն Սանթրոսյանը Էդուարդ Միրզոյանին հանձնեց Դիլիջանի պատվավոր քաղաքացու կոչմանն արժանանալու վերաբերյալ վկայագիրը: Միջոցառման ընթացքում Արզաս Ոսկանյանը և Դիլիջանի արվեստի պետական քոլեջի տնօրեն Հասմիկ Մկրտումյանը ներկաներին ծանոթացնում էին գրքի բովանդակությանը, ընթերցելով առանձին հատվածներ: Իսկ բովանդակությունը շատ ընդգրկուն էր, սկսած ստեղծագործական գործունեությունից, 36-ամյա կազմակերպչական աշխատանքից մինչև արտասահման ուղևորություններր` ընդհուպ ընդունելություն Ջոն Քենեդիի և Ժակլին Քենեդիի մոտ, անմիջական տպավորություններ նախկին ԽՍՀՄ և ՀԽՍՀ ղեկավար աշխատողներից, նրանց բնութագրող յուրահատուկ հակիրճ ձևով:
Միջոցառման մասնակիցները դեռ երկար ժամանակ դժվարավում էին բաժանվել սիրված կոմպոզիտորից, շրջապատել էին նրան, անկեղծ և անկաշկանդ զրույցի բռնվել նրա հետ:

2011-05-11
Իտալիայի պատվիրակության այցը
ՀՀ կառավարության և Տավուշի մարզպետարանի հրավերով Հայաստան ժամանած
Իտալիայի Հանրապետության Ֆրիուլի-Վենետիկ-Ջուլիա նահանգի պատվիրակությունը` նահանգապետ Ռենտո Տոնդոյի գլխավորությամբ մայիսի 11-ին այցելեցին Տավուշի մարզ: Պատվիակության կազմում էին նահանգային ադմինիստրացիայի բարձրաստիճան պաշտոնյաներ և մասնավոր հատվածի ներկայացուցիչներ, ՀՀ–ում Իտալիայի արտակարգ և լիազոր դեսպան Բրունո Սկապինին: Այցի նպատակն էր Հայաստանում, հատկապես Տավուշի մարզում իրականացնել գործարար ծրագրեր, ստեղծել համատեղ ձեռնարկություններ, լայն փոխգործակցություն իրականացնել գիտամշակութային ոլորտներում: Մարզպետարանում երկու մարզերի միջև կնքվեց փոխգործակցության հուշագիր, ապա հյուրերը այցելեցին Դիլիջան:
Դիլիջանի քաղաքային զբոսայգում կազմակերպված տոնական միջոցառմանը կատարվեց այգու` հայ-իտալական բարեկամության այգու վերանվանման հուշաքարի բացման հանդիսավոր արարողություն: Ելույթներ ունեցան Տավուշի մարզպետ Արմեն Ղուլարյանը, Դիլիջանի քաղաքապետ Արմեն Սանթրոսյանը, Ֆրիուլի-Վենետիկ-Ջուլիա նահանգի նահանգապետ Ռենտո Տոնդոն, Հայաստանում Իտալիայի արտակարգ և լիազոր դեսպան Բրունո Սկապինին:
Հյուրերին ողջունեցին Դիլիջանի և Իջևանի պարային խմբերը: իտալական երգի բարձրասրվեստ կատարմամբ հանդես եկավ շնորհալի երգչուհի Աիդա Ուլիխանյանը:
Հյուրերը նաև ծանոթացան քաղաքին, եղան Հաղարծնի վանքային համալիրում և Դիլիջանի պատկերասրահ- թանգարանում:
Երկու մարզերի բարեկամական կապերը սկզբնավորվել են 2008թ. Ֆրիուլի-Վենետիկ-Ջուլիա նահանգի Ուդինե քաղաքում հայ-իտալական բարեկամությունը խորհրդանշող հուշարձանի բացման արարողողության կապակցությամբ Հայաստանի պատվիրակության այցելությամբ Պատվիրակության կազմում էին Տավուշի մարզպետ Արմեն Ղուլարյանը և Դիլիջանի քաղաքապետ Արմեն Սանթրոսյանը: Միջոցառման ընթացքում Դիլիջանը և Ուդինեն հռչակվեցին քույր քաղաքներ:


2011-05-09
Հաղթանակի և խաղաղության տոնը
Մայիսի 9-ին Հաղթանակի օրվա կապակցությամբ հազարավոր դիլիջանցիներ այցելեցին հուշարձանային համալիր իրենց հարգանքի տուրքը մատուցելով Հայրենական մեծ պատերազմում և Արցախյան հերոսամարտում զոհվածների հիշատակին:
Հայրենական մեծ պաերազմում տարած հաղթանակի 66-ամյակի և Շուշիի ազատագրման 19- ամյակի արարողությանը ելույթ ունեցան Դիլիջանի քաղաքապետ Ա. Սանթրոսյանը, ՀՀ Ազգային Ժողովի պատգամավոր Հ. Հակոբյանը, քաղաքի զինկոմ Գ.Ապինյանը, վետերանների տարածքային կազմակերպության նախագահ Լ. Ջառահյանը, զինծառայող Գ. Գևորգյանը:
Քաղաքապետարանի, զինվորականության, աշխատանքային կոլեկտիվների ու կազմակերպությունների կողմից ծաղկեպսակներ ու ծաղիկներ դրվեցին Հայրենական մեծ պատերազմի և Արցախյան հերոսամարտի զոհերի հիշատակը հավերժացնող հուշակոթողներին:
Արարողությունը եզրափակվեց զինվորականների պատվո քայլերթով:

2011-05-06
Դիլիջանում մեկնարկեց ՀՀ դպրոցականների շախմատի 6-րդ օլիմպիադայի եզրափակիչ փուլը
Մայիսի 5-8-ը Դիլիջանում անց է կացվում ՀՀ դպրոցականների շախմատի 6-րդ
օլիմպիադայի եզրափակիչ փուլը:
Մայիսի 5-ին, քաղաքի մշակույթի պալատում տրվեց օլիմպիադայի հանդիսավոր մեկնարկը:
Միջոցառմանը մասնակցում էին Տավուշի մարզպետ Արմեն Ղուլարյանը, Դիլիջանի քաղաքապետ Արմեն Սանթրոսյանը, ՀՀ Ազգային Ժողովի պատգամավորներ Կարեն Վարդանյանը և Միքայել Վարդանյանը, Հայաստանի շախմատի ֆեդերացիայի փոխնախագահ Սմբատ Լպուտյանը, մարզասերներ, լրատվամիջոցների ներկայացուցիչներ:
Մասնակիցներին ողջունեց Տավուշի մարզպետ Արմեն Ղուլարյանը: Ելույթ ունեցան նաև Հայաստանի շախմատի ֆեդերացիայի փոխնախագահ Սմբատ Լպուտյանը և գլխավոր մրցավար Վահագն Խաչատրյանը:
Միջոցառումը եզրափակվեց Դիլիջանի արվեստի պետական քոլեջի ժող գործիքների խմբի համերգով:
Օլիմպիադան անց է կացվում Դիլիջանի պատկերասրահ- թանգարանում, ուր հաղթողի կոչման համար պայքարում են հանրապետության 18 դպրոցների 72 պատանի շախմատիստներ:

2011-05-02
Հաղթանակ առաջատարի նկատմամբ
Ապրիլի 30-ին ՀՀ Ֆուտբոլի բարձրագույն խմբի առաջնության 7-րդ տուրի շրջանակներում Դիլիջանի «Իմպուլսը» արտագնա խաղում ուժերը չափեց ներկայիս առաջնության առաջատար Երևանի «ՈՒլիսի» հետ: Առաջին խաղակեսը անցավ հավասար պայքարում: Բացի հեռահար հարվածներից, այլ վտանգավոր պահեր չեղան կողմերի դարպասների մոտ:
Երկրորդ խաղակեսում, հանդիպման 55-րդ րոպեին «Իմպուլսն» ստացավ տուգանային հարված իրացնելու իրավունք: Ռոման Հարկուշայի հարվածից հետո գնդակը դիպավ «ՈՒլիսի» խաղացողներից մեկին և շեղվելով իր ուղեգծից, հայտնվեց դարպասում՝ 0-1: Հանդիպման 72-րդ րոպեին դաշտի տերերը կարող էին հավասարեցնել հաշիվը, սակայն «Իմպուլսին» «օգնության եկավ» դարպասաձողը: 81-րդ րոպեին հեռահար, գեղեցիկ հարված կատարեց Նարեկ Դավթյանը և դարպասաձողերով հավասարեցրեց հաշիվը: Խաղավերջում հանդիպման մրցավարը 5 րոպե ավելացրեց, սակայն «Իմպուլսի» փորձառու դարպասապահ Մայիս Ազիզյանը, ով այս խաղում շատ հուսալի էր գործում, պաշտպանների հետ միասին խաղը հասցրեցին տրամաբանական ավարտին: Առաջնության առաջատարը կրեց իր առաջին պարտությունը, այն էլ սեփական հարկի տակ, Իսկ «Իմպուլսը» կրկնեց իր նախորդ տարվա առաջին խաղաշրջանի ցուցանիշը՝ 7 խաղ 10 միավոր:
Տուրի մյուս խաղերի արդյունքները՝ Փյունիկ-Միկա 0-1, Գանձասար Բանանց 2-0, Շիրակ-Արարատ 1-1:
Հաջորդ տուրի շրջանակներում, մայիսի 7-ին, ժամը 19:00-ին «Իմպուլսը» կյուրընկալվի հանրապետության գործող չեմպիոն Երևանի Փյունիկին:

2011-04-28
Քննարկում քաղաքապետարանում
Ապրիլի 27-ին քաղաքապետարանի նիստերի դահլիճում կայացած խորհրդակցությանը, որին մասնակցում էին Հայաստանի համայնքների ասոցիացիայի նախագահ Նատալյա Երիցյանը և Եվրախորհրդի ծրագրերի վարչության փորձագետներ, քննարկվեցին քաղաքի զարգացման ռազմավարությանն առնչվող խնդիրներ:
Հայաստանն այս տարի առաջին անգամ ընդգրկվել է համայնքների ռազմավարական պլանների կազմմանն ու իրագործմանը աջակցելու Եվրոխորհրդի
ծրագրերի վարչության կողմից իրականացվելիք աշխատանքներում:
Հանրապետությունում ընտրվել է 5 համայնք այդ թվում ` Դիլիջանը:
Հաշվի է առնվել քաղաքի ցուցանիշները, զարգացման տեմպերն ու հեռանկարները:
Մինչ այժմ մի քանի մասնագիտական հանդիպումներ են եղել, իսկ ներկա հանդիպման նպատակն էր տեղում ծանոթանալ համայնքի ներուժին, օգնել 10-ից 15 տարվա ռազմավարական ծրագրերի կազմմանը, որին հաջորդելու է Եվրոխորհրդի ծրագրերի վարչության աջակցությամբ համապատասխան դոնոր կազմակերպությունների միջոցով ֆինանսավորման խնդիրների լուծումը:
Ծրագրի հետ առնչվող համայնքի զարգացման խնդիրների վերաբերյալ ծավալվեց լայն քննարկում, ուր կարևոր նշանակություն էր տրվում հատկապես տուրիզմին աջակցելուն:
Քննարկմանը մասնակցում էին և իրենց տեսակետներն արտահայտեցին կրթամշակութային հաստատությունների և զբոսաշրջային ոլորտին առնչող հասարակական կազմակերպությունների ներկայացուցիչները, քաղաքապետարանի աշխատակիցները, համայնքի ավագանու անդամները:
Քննարկման արդյունքներն ամփոփեց Դիլիջանի քաղաքապետ Արմեն Սանթրոսյանը:
Պայմանավորվածություն ձեռք բերվեց, ըստ որի ընթացիկ տարում ավարտելու են ներկայացվելիք ծրագրի նախապատրաստական աշխատանքները, որը 2012 թվականին հավանության արժանանալու դեպքում կդրվի գործողության մեջ:


Նորություններ  
Քարտեզ  
Հղումներ  
Մեր մասին  
Հիմնադրամներ  
 
 
Մշակված է՝ CIT