2010-08-10
Խոսք շնորհակալանքի | | Դիլիջանի քաղաքապետ Արմեն Սանթրոսյանը քաղաքապետարանի, համայնքի ավագանու և քաղաքի ազգաբնակչության անունից իր խորին շնորհակալությունն է հայտնում զորամասի հրամանատար, փոխգնդապետ` Աշոտ Ղազարյանին և զորամասի անձնակազմին օգոստոսի 4-ին` քաղաքի անտառային հատվածում բռնկված հրդեհի մարման ժամանակ ցուցաբերած անձնուրաց օգնության համար: |
2010-08-09
Հրդեհը մարվեց |  Օգոստոսի 4-ին, ժամը 19:30-ի սահմաններում, «Դիլիջան» ազգային պարկի վարչական շենքից ոչ հեռու, չոր, խոտածածք տարածքում, դեռևս չբացահայտված պատճառներով հրդեհ բռնկվեց, որն արագ տարածվելով ընդգրկեց շուրջ 2 հա. տարածք և արդեն մոտեցել էր մոտակա եղևնուտին: Հրդեհը արագ կերպով չմարելու դեպքում այն կարող էր ահավոր չափեր ընդունել և անդառնալի հետևանքներ ունենալ:
Չնայած կարճ ժամանակում արդեն դեպքի վայրում էր հրշեջ փրկարարների մեկ մարտական ջոկատ, որը ազգային պարկի աշխատակիցների հետ փորձում էր մարել հրդեհը, սակայն տեղանքի անհարմարության պատճառով հնարավորություն չստեղծվեց տեխնիկա օգտագործել և արդյունավետ գործողություններ իրականացնել: Իսկ հրդեհն արագ տարածվում էր:
Ահազանգ ստանալուց հետո հենց սկզբից դեպքի վայրում գտնվող Դիլիջանի փոխքաղաքապետ Արմեն Մակարյանը արագ գնահատելով իրադրությունը անմիջապես օգնություն խնդրեց զորամասի հրամանատարից: Հաշվված րոպեների ընթաքցքում զորամասի հրամանատար, փոխգնդապետ Աշոտ Ղազարյանի գլխավորությամբ դեպքի վայր հասան տանկային գումարտակի զինվորները, որոնք անձնուրացաբար, բահերով և այլ միջոցներով սկզբում լոկալիզացրեցին, ապա արդեն
9:30-ի սահմաններում հրշեջների հետ լրիվ հանգցրին հրդեհը: Դեպքի վայրում էր և աշխատանքների կազմակերպմանը մասնակցում էր նաև զինվորական կորպուսի շտաբի պետ` գնդապետ Կ.Այդինյանը: Հրդեհը մարելուց հետո փոխքաղաքապետն առաջարկեց, որպեսզի գիշերը ազգային պարկի և հրշեջ փրկարար ծառայության աշխատակիցների կողմից հերթապահություն սահմանվի, վտանգի կրկնությունը բացառելու համար: Նրա անհանգստությունը տեղին էր: Գիշերը կրկին բռնկվեց նոր հրդեհ, որն անմիջապես մարվեց:
|
2010-07-01
Առաջընթաց տեմպերով (01.04.2010թ. – 01.07.2010թ. ընկած ժամանակահատվածում քաղաքապետարանի կատարած աշխատանքները) | Դիլիջան համայնքի 2010թ. բյուջեն նպատակաուղղվել է ապահովել քաղաքի կայուն զարգացումը, բարելավել բնակչության սոցիալ-տնտեսական պայմանները հետևողականորեն բարեփոխումներ անցկացնելու ճանապարհով:
Նշված ժամանակահատվածում տեղական մուտքերի արդյունավետ հավաքագրման շնորհիվ հավաքագրվել է 253507.9 հազ.դրամի եկամուտ, որը հնարավորություն է տալիս ավելի իրատեսորեն կանխագծելու առաջիկա անելիքները:
Քաղաքապետարանի ուշադրության կենտրոնում են սոցիալապես անապահով ընտանիքները:01.04.2010.-01.07.2010թ. ընկած ժամանակահատվածում յուրաքանչյուր նորածին երեխաների համար 40 ընտանիքի տրվել է միանվագ դրամական օգնություն: Կամո թաղամասի Հայրենական պատերազմի վետերանների և բնակիչների ազատ ժամանցի, ինչպես նաև տարաբնույթ միջոցառումների կազմակերպման համար ձեռք է բերվել նոր շենք:Հիմնանորոգվել է Հայրենական պատերազմում զոհվածների հուշարձանի անմար կրակի տարածքը: Մեծ շուքով կազմակերպվել է և անցկացվել Հայրենական մեծ պատերազմում տարած հաղթանակի 65-ամյակին նվիրված տոնակատարությունը:
Քաղաքապետարանը միջոցներ է ձեռնարկում իր ենթակայության ենթակառույցների նյութատեխնիակական բազայի ամրապնդման ուղղությամբ:Քաղաքային համայնքի ենթակայության մանկապարտեզների նախադպրոցական խմբեր հաճախող թվով 158 երեխաների համար ձեռք են բերվել նվերներ:
Հիմնանորոգվում են քաղաքային նշանակության ճանապարհները, հիմնանորոգվել է 26կոմիսարների փողոցից մինչև Մյասնիկյան 84 բազմաբնակարան շենքն ընկած հատվածի ճանապարհը,ավարտվել է Այգեստան փողոցի 2 բ շենքին հարակից բակի բարեկարգման աշխատանքները: Կազմվել են Անդրանիկի թաղամաս տանող ճանապարհի հիմնանորոգման նախագծա-նախահաշվային փաստաթղթերը:
«Սնունդ աշխատանքի դիմաց» ծրագրի շրջանակներում Դիլիջանի համայնքների միության և ԳՏՀ ԱԻԿՀԿ Հայաստանյան գրասենյակի հետ համատեղ իրականացվել են Գետափնյա փողոցին հարակից տարածքի ճանապարհի վերանորոգման և Հակոբջանյան փողոցի հենապատի հիմնանորոգման աշխատանքները:
Զգալի աշխատանքներ են կատարվել շենքերի ներքին կոմունիկացիոն ցանցերի վերանորոգման ուղղությամբ: Վերանորոգվել են 3 բազմաբնակարան շենքերի տանիքներ: Վերակառուցվել է Սայաթ-Նովա 16 տանը հարակից հեղեղատարը:
Կազմակերպվող միջոցառումներն առավել արդյունավետ և հետաքրքիր դարձնելու նպատակով նորակառույց ամֆիթատրոնի համար ձեռք է բերվել տեսացուցադրման սարք: Զգալի գործունեություն է ծավալվել քաղաքի երիտասարդական կյանքն ակտիվացնելու, երիտասարդական ներուժը համախմբելու ուղղությամբ:
Քաղաքում կազմակերպվել և անց է կացվել համաքաղաքային սանիտարական մաքրման, բարեկարգման և կանաչապատման միամսյակ: Աշխատանքներ են իրականացվել և իրականացվում աղբահանության և սանիտարական մաքրման բարելավման, կանաչապատման, այն առողջարանային քաղաքին վայել կազմակերպեու ուղղությամբ:
|
|
